[المحامي / شيرين شوقى]

أول هام ببعتلك رسالة وأحليها بالسلام
وتانى هام وبدون زعل أو خصام

ليا معاك كلمتين وهمسة عتاب يا أخويا المصري

ليه وانا من سنين جارك وداري عمره ما كان غير دارك
وابنك وجنبه ابني كانوا يناموا مطمنين

أزرع وتزرع أرضك وأرضي من نفس الميه ونفس الطين

ولو عطشت ترويك وترويني شربه واحدة من مية النيل

لسانى ولغتك .. الشكل والجوهر .. بيضللنا نفس النخيل

جدى وجدك .. الأصل مصري .. والشعب واحد أصيل
فى الفرح كنا واحد وفى الحزن عمرنا ما كنا اتنين

طاب إيه اللى حصل وليه أتغيرت يا بلدياتي
وياللي كنت اخويا وجاري عزوتي وسندي
فجاة وتحت ستر الليل تغدر بيا وبسهم مسمم بكره الغير
تهجم على دار كان دارك وتقتل يا ابن البلد جارك
وتموت الطير
وأرواح بريئة مسالمة دمها أمام اللي خلقك برقبتك ليوم الدين

عشان إشاعه وحجة كدابه تخدها شماعه وتقيدها بولاعة
وتقوم تلم جماعه وعصابه وتنفخ نار ما تنطفي
تقتل ولدي وتحرق غيطي ودكاني ورزقي
تتعدى يا ابو الشهامة على شرفي

بقيت يا جارى ياللي كنت بيك اتباهى
كنت فرحان أقول دا يا ناس ابن بلدي
يا ميت خسارة الشهم بين يوم وليلة بقي
قتال لنفوس بريئة وحرامي
وينام وضميره مرتاح وياكل من مال حرام
كان شقاي ومالي

أنا أقدر زيك .. أغدر بك .. أوعى تفكر ما قدرشي
وهاقول لو حتمت .. خربانه
ما فيه قانون ولا سجون .. ما تفرقشي
ومحاضر صلح .. ودم ضاع .. وكله يمشي
أقدر أشيل نفس سلاحك .. وأغدر بأبن بلدى وجاري
أقتل وأحرق واخطف نساوين .. وأدوس على شرف غيري
أوعى تقول أنك الأقوى .. ولا بالخارج هستقوى
كل العبارة .. رب السما عن سفك الدم .. يمنعني

لصالح مين .. حاول .. فكر .. قرب مني .. إفهمني
بص حواليك .. وشوف رياح الشر .. جايه منين
ما إحنا مع بعض سنين وسنين
وقلبك على قلبي

شوف أعداء مصر المتربصين
من جوه اللى عايز يخربها وفى ايده سبحه متخفي فى الدين
ومن بره على حدودها فى السواد لابدين
ومُناهم يوم ما البلد دى تخرب ونرفع على بعض السكاكين

فكر لصالح مين .. عمى العيون .. والقلوب الفايرة بالغضب
وشُغل الدراع واللي معاه حتة حديدة .. يفتكر إنه ما ينغلب
أصلها هاصت .. ويتحدى القاتل بعد قتلي
لو يوم واحد يتعاقب .. ويكون سجين

ويا عيني عليكي يا مصر ياللي الدهب ترابك والتبر هواكي
لما تشوفي ولادك بعنيكي
القوي ياكل الضعيف والعدل ضايع
وبقينا على صدر أمنا أعداء والكل عمل فيها صايع
والدم متنتور على ضفافك .. من هنا أو من هنا
وحدتنا بقيت أشلاء .. والدم كله دمنا

لا لصالحك ولا لصالحي .. السموم تسري على ارضنا
فيه ناس بره تتمني الخراب لمصرنا
وناس جوه عايزه الكراسي على لحمنا
يرضيك لما نيلك ونيلي يجرى فى ارضهم
وأرض المجد بلدنا تعيش تشحت عطفهم

فين راحت رجولتك ووطنية كانت تهزم جبال
فاكر دم الشهداء فى سيناء مهر الحرية لعروستنا
مين دفعه .. أنت وحدك .. ولا أنا وحدي .. إحنا كلنا

يا ابن بلدى أصحى .. أوعى تنفذ حلمهم
النار لو إنقادت مش هتفرق .. بينك وبيني
بقولها وخليك فاكرني وكلامي على البال

بكره هيكون .. بيك وبيا .. بولدك وولدي

أوعى تنسي فى يوم إنك مصري

سواء كنت مسلم ولاَّ قبطي

شيرين شوقى

المصدر: †† ارثوذكس †† - من قسم: القسم الادبي

[ملكه الاحزان]

موضوع جمييييييييييييييل مرسي اوووووووووي

[nermos1982]

كلمات جميلة اوى يا استاذ شيرين زى ماعودتنا دايما.ربنا يباركك ويكون معاك

[وردة حزينة]

تحففففففففففففففففففففففف ففففه بجد ياشيرين انت استاذ بجد

[قهوة ساده]

موضوووووووووووع راااااااااااائع بجد

ربنا يخليكي ليني وتبسطينا كمان وكمان

[كيرو رافت]

فين راحت رجولتك ووطنية كانت تهزم جبال
فاكر دم الشهداء فى سيناء مهر الحرية لعروستنا
مين دفعه .. أنت وحدك .. ولا أنا وحدي .. إحنا كلنا

الله بجد تحفه كلامك حلو قوى
وقدرت تعبر بطريقه رائعه عن نبض الشارع المصرى حاليا

[kottah_sh]

كلامك حلو اوى ومبسط جدا
بجد ميرسى اوى على الموضوع الرائع ده
ربنا ميحرمناش من كتاباتك

[الناى الحزين]

أنا أقدر زيك .. أغدر بك .. أوعى تفكر ما قدرشي
وهاقول لو حتمت .. خربانه
ما فيه قانون ولا سجون .. ما تفرقشي
ومحاضر صلح .. ودم ضاع .. وكله يمشي
أقدر أشيل نفس سلاحك .. وأغدر بأبن بلدى وجاري
أقتل وأحرق واخطف نساوين .. وأدوس على شرف غيري
أوعى تقول أنك الأقوى .. ولا بالخارج هستقوى
كل العبارة .. رب السما عن سفك الدم .. يمنعني

موضوع فعلا بجد روعه واكثر من رائع

بيجسد الشارع المصرى الحديث
لكن مين يفهم كلامك يا استاذ شرين
دول فعلا فاكرنها ضعف مننا وقله حيله
لكن معلش ربنا موجود

وقادر انه يرجع للناس عقوله

شكر من القلب لحضرتك يا استاذ شرين

[عماد حسنى]

شكرا استاذ شرين موضوع رائع فعلا
شكرا جدا جدا ليك
ومنتظرين المزيد

[elphilasouf]

برافو بجد كلام جميله اوي
ومعانيه حلوه خالص
مرسي كتير جدا
وبجد منور المنتدي