السلام عليكم ورحمه الله وبركاته
مبدئياً نرد السلام مهما كان كل واحد فينا له دين .. السلام لله وحده
انا عارفة انى داخلة منتدى مسيحى وانا مشتركة فيه وانا عارفة دة كويس جداً
انا حقيقى مش عارفة ابدأ كلامى ازاى بس مش عايزة حد يزعل منى انى دخلت وانا مسلمة .. وسطكم
بصراحة اللى خلانى اسجل انى حسيت بانكم مجموعة محترمة جداً وملتزمة وانا بحترم الشخص لشخصيته واحترامه للناس مهما اختلفت وجهات النظر او الديانات او حتى البلاد
كلنا عرب وكلنا بنعبد ربنا
يمكن مفيش حد مسلم هنا خالص غيرى
ودة شى مش مخيف بالعكس بس انا مش حابة تكونو متضايقن او حسين بعنصر غير متكافىء وغير مرغوب فيه وسطكم
على فكرة انا مش بحب الكدب ومشكلتى انى صريحة جداً
علشان كدة كتبت الموضوع دة من اول يوم سجلت فيه مش حابة بداية تعاملنا مع بعض تبقى على غش لا دينا ولا دينكم قال دة صح ...؟
انا مسلمة ومصرية لما جيت اسجل معرفتش اسجل باسمى المعتاد سندريلا وكتبته انجليزى وجيت بقى على اسم الكنيسة وسيبتها فاضية بس كان لازم املى الخانة دى وكتبت مارى جرجس دى فعلا اسم كنيسة قريبة مننا يعنى
احنا بنحترم الاديان السماوية كلها الحمد لله
انا مش داخلة لا اعمل فتنة ولا اجادل معاكم فى حاجة ولا اى حاجة
وبجد حسة بفرحة وانا معاكم
هتقولوا لية ..!!
هقولكم علشان بجد حسيت بحبكم لدينكم وقلبكم المليان حب دة والتزامكم وحبكم لدينكم خلانى احترم المكان دة اوى
غير كل المنتديات التانية اللى مش فارق معاهم حاجة
قريت شروط المنتدى الاول عجبتنى جداً وبجد ربنا يباركلكم فى المنتدى دة
وهدفى من الموضوع انكم تعرفونى علشان نبقى على نور
وهسالكم سؤال واحد
انتو حابين اكون معاكم هنا ولا مش حابين؟
لو مش حابين انا والله هنسحب بكل بساطة واتشرفت انى كنت فى يوم من الايام هنا معاكم بين اخوانى واخواتى
فياريت محدش يزعل ولا يقول انى زورت انا مكنتش عارفة اسجل غير ببيانات مش صحيحة لان التسجيل كدة
وبالنسبة للادارة لو حابة عدم تواجدى تبلغنى برسالة وانا مش هردها باذن الله
واسفة على الاطالة
وشكراً ليكم على الرد مسبقاً
واتمنى حقيقى اشوف ارائكم وردكم فى الموضوع
احترامى للجميع
مشاهدة صفحة طباعة الموضوع
أرسل هذا الموضوع إلى صديق
لحظة من فضلك ياريت تدخل ضرورى
المواضيع المتشابهه
العرض الشجري