الموضوع المرادي مختلف جدا جدا عن الاول
طبعا الخروجه الشهرية الثامنه زي ماكلنا عارفين انها هتكون يوم
5/11/2008
بس في فكرة جديده في الخروجه الشهرية الجاية
وعامل استفتاء عليها
وهي هل تحبوا اننا نغير مكانها ونخليها في اماكن اخري
ولا انتوا عاوزنها زي ماهي في الكاتدرائية
في مكانين مقترحين والتنافس عليهم بشده
الكاتدرائية المرقسية بالعباسية كالعاده
او عوامة مارمرقس
وعنوان العوامه مش صعب ولا حاجه
عوامه مارمرقس ياجماعه اسمها المعروف لدي الناس الدهبية
هقولها مرة تانيه ( الدهبية )
مكانها في الجيزة علي الكورنيش
خلف فندق الفور سيزون
وطبعا اللي يحب يجي ومش هيعرف يوصل
ممكن ينتظرني امام مطرانيه الجيزة بشارع مراد واخده
او لو ضاقت بيه اجبكم من ميدان الجيزة من امام عمر افندي القديم اللي في الميدان
واحد بيقولي اشمعني يعني هتغير وتخليها في المكان ده بالزات
هقولكم
اولا انتوا دخلتوا في دوامه الدراسة والمزاكرة
والواحد مابيصدق يخرج ويشم هوا
عوامة مارمرقس دي او الدهبية
عبارة عن مركب كبير اوي في النيل
مش بيتحرك
لا
هو ثابت
هنشم هوا جميل كلنا مع بعض
س / طب ليه المكان ده بالزات ماحنا ممكن نشم هوا في اي حته تانيه
جالي شكاوي ان الناس مش بتتجمع وكل واحد بيسرح مع نفسه ومش بنعرف نتقابل
فأنا عشان اربطكم كان لازم اختار مكان زي ده
عبارة عن طرابيزات علي المركب وكراسي كتير
هتلزمنا كلنا نقعد ونتكلم مع بعض ومحدش هيعرف يروح هنا ولا هنا
وكمان في مشروبات وبسكوتات وحاجات من دي
ولو جعان اوي ممكن تكلم دليفري من هنا لجاد او لأي مكان تحبه
س / هل المكان ده غالي اوي في الدخول
لا خالص
رسم الدخول 3 جنيه بس
ثلاثه جنيهات مصرية لا غير
وعلي فكرة
هيبقي في متكلمين معانا
وممكن طبعا لو الموضوع عجيكم واستقرينا علي قرار
اكلم ابونا بموا الكاهن المسئول عن المنتدي
يجي ويوعظ لينا عظة
ان شاء الله هننبسط وتبقي خروجه ترفيهيه وروحيه واجتماعيه في نفس الوقت
وفي نفس موعدنا برضوا
الساعه خمسة
اه نسيت اقولكم
العوامه دي مش بيخشها غير مسحيين فقط
وعلي فكرة
وانت داخل الراجل هيقولك فين كارنيه العضوية
يقصد الصليب اللي في ايدك
او كلمة مسيحي في البطاقة
عشان انا اول مرة رحتها قولتله مش مطلع كارنيه
هههههههههههههههههه
اوك
منتظر رائيكم في الاستفتااء بقي
عاوزين نخليها فين ؟؟؟؟
شارك برأيك ومتبقاش سلبي
اي استفسار تاني انا تحت امركم
ومنتظر اعرف مين جاي ؟؟؟
الكاتدرائية ولا الدهبية
المواضيع المتشابهه
العرض الشجري