[ظريف]

مره كنت معزوم عند قريبى على الغذاء وفوجئت من قريبى يقول لى !!!! إنت بتفح العيش وتبص فيه ليه ؟ متخفش مش حاططلك فيه حاجه وتيقظت فى الحال إن دى عاده فيا منذ الصغر وقريبى لفت نظرى إليها ...... ولى صديق بيلبس الكرافته قبل القميص ! وعندما لفتت نظره قال لى طول عمرى بعمل كده وأنا مش واخد بالى ...... عشان كده أنا كتبت هذا الموضوع فى المنتدى وياريت كل عضو يدخل يقول لنا عن شئ كان بيعمله طول حياته والآخرون لفتوا نظره على هذا الشئ
ياله ياشطرين ومتتكسفوش منتظر أضحك عليكم هههههههههههه
قصدى أضحك معاكم

المصدر: †† ارثوذكس †† - من قسم: صندوق مناقشات الاعضاء

[Malak sokar]

ههههههههههههههه
موضوع حلو اوي عمو ظريف بس انا مش متذكرة موقف دلوقتي بجد
بس اكيد هفتكر واقول لحضرتك
ربنا يزيدك نعمة فوق نعمة

[la tristeza y el dolor]

دايما باكل السندوتش من اخره و كل الناس بتستغرب ليه بعمل كدا .
على طول بسوق العربيه من غير شوز ولما اركن البسها وبضيع وقت كتير فى الموضوع دا .

[ظريف]

على طول بسوق العربيه من غير شوز

هى عربيتك بتلبس شوز نمره كام ؟

دايما باكل السندوتش من اخره

شكلك مستعجل يا نصه

ولما اركن البسها وبضيع وقت كتير فى الموضوع دا

عشان ماتضيعش وقتك ألبس الشوز وإنتا سايق على سرعة 140 كيلو

[kottah_sh]

ههههههههههههههههههههه

ايه ياعمو ظريف الموضوع اللى كله فضايح ده

بس بجد جميل جدا
انا عن نفسى مش فاكره حاجه فى الوقت الحالى
بس اوعدك لو افتكرت هدخل واضحكك عليا
قصدى معايا
ههههههههههههههههههههههه

كل سنه وحضرتك طيب
وهنستناك فى خروجه اليكس
مش تعمل زى المره اللى فاتت

[M!SS N@NO]

ههههههههههههههههههه
موضوع تحفه يا استاذ ظريف

وبالنسبه ليا بقا ناس كتير لفتت نظرى
الى انى مبخلعش الشبشب من رجلى خالص طول مانا فى البيت

وبقعد على كراسى او كنبة الانتريه او اى حاجه وارفع رجلى واستربع وهو فى رجلى

وتقريبا كده والله واعلم بنام بيه
هههههههههههههه

الحمد لله ان ماما بتمم عليا وانا نازله مشوار ولا حاجه
لانزل بيه الشارع
ههههههههههههه
ميرسى كتير لحضرتك

[ظريف]

المشاركة الأصلية كتبت بواسطة hanan sadeq وبالنسبه ليا بقا ناس كتير لفتت نظرى الى انى مبخلعش الشبشب من رجلى خالص طول مانا فى البيت وبقعد على كراسى او كنبة الانتريه او اى حاجه وارفع رجلى واستربع وهو فى رجلى وتقريبا كده والله واعلم بنام بيه

فكرتينى بأبن أختى لما كان صغير أبوه أشتراله جزمه الولد فرح بيها جدا ونام وهو لابسها ولما كان يخلعها من رجله كان يحضنها ولما يحضر ضيف الولد يلبس الجزمه بسرعه ولما لاحظنا عليه الموضوع ده قلناله هو إنتا لازم تقابل الناس بالملابس الرسميه ومن ساعتها الولد سمى الجزمه بتاعته الرسميه ولما كنت بتضايق منه أقوله حضربك بالرسميه

[نبيل نصيف جرجس]

موضوع حلو اوى يا استاز ظريف
صراحة مش عارف او مش فاكر حاجة فى حياتى
ربنا يخليك يا استاز ظريف وحياتنا اصلا كلها على بعضها نكتة ينضحك عليها

[finyara]

انا بقى طول مانا بذاكر كنت باكل البلاستيك بتاع القلم الجاف وممكن اكلى قد 3-4 القلام فى اليوم
يللا بالهنا والشفا وكفايه فضايح كده بقى
ههههههههههههههههههههههههه ههههه
ميرسى لحضرتك على الموضوع اللطيف ده

[ظريف]

المشاركة الأصلية كتبت بواسطة finyara انا بقى طول مانا بذاكر كنت باكل البلاستيك بتاع القلم الجاف وممكن اكلى قد 3-4 اقلام فى اليوم

المشاركة الأصلية كتبت بواسطة finyara يللا بالهنا والشفا

صحيح البلاستيك مغذى وياسلام لو تاكل قلم قبل المذاكره بساعتين
وشك يحمر وتبقى فله