[Dr.PeRO]

+ قررنا انا وصديق لي أننا نقضى قداس كل يوم فى الكاتدرائية بمناسبة الصيام لمدة كام يوم كده على قد ما نقدر يعني .. قولنا نستغل فرصة ان القداسات بتبدأ متأخر فى الصيام ..
+ ربنا سمح وساعدنا الحمدلله وقدرنا نروح .. انا كان بقالى كتيييير مرحتش الكاتدرائية وحتى لما كنت بروح مكنتش بلف فيها ولا اتمشى .. كنت بخلص اللى بعمله فيها وبمشى على طول ..
+ لكن المرة ديه كنا بنتمشى ان وصاحبي بعد القداس وكنا بنجيب فطار من الكافيتريات هناك وكنا مبسوطين إلى حد ما .. لكن للأسف الشديد شوفت اللى مكنتش أتوقع أبداً انى ممكن أشوفه فى يوم هناك ...
+ البداية كانت ساعة الدخول من البوابة .. فيه طبعاً البوابة الالكترونية بتاعت كشف المعادن .. ولما الجهاز صفر، وقفونى عشان التفتيش، واثناء التفتيش كان جنبي بحوالى متر بوابة السيدات، وعدت منها شابة فى منتهى الشياكة الممزوجة بالمسخرة، لم أنتبه لها إلا لما لقيت كل الرقاب بتتلوح وبتبص عليها، وهى ماشية ولا هنا .. الراجل اللى كان بيفتشني كان سرحان اصلاً ومكنش باصصلى وقالى عدى عدى ..!!! البنت كان منظرها ولبسها يلفت بطريقة كبيرة حتى ان البنات والسيدات اللى كانوا معديين كلهم بصوا عليها.
+ عديت وكنت بسرع عشان ألحق القداس (مش عشان ألحقها ولا حاجة لا سمح الله ) بدأ القداس برفع بخور باكر، لكن انا سميته ساعتها: (قلب بخور باكر) عشان اتكروت كله بالنبوات وصلوات السواعى والأواشى والانجيل فى 10 دقائق!! كان بيتوزع المزامير علينا وفى أقل من دقيقة كنا بنقلب على اللى بعده .. استغربت جدااا ومقدرتش أفهم ليه الكروته المبالغ فيها ديه .. وأول ما رفع بخور خلص .. لقيت الكاهن سكت وقال فى المكرفون ان الصلاة هتقف لحد ما سيدنا الأنبا (..) يوصل بالسلامة عشان هايصلى هو !!! استغربت برضه وقولت فى سري طب هو ليه الاسقف مايصليش رفع بخور هو كبير على الصلاة ؟؟ لكن قولت اعدى عادى يعني .. فضلنا مستنيين لحد حوالى ساعة إلا ربع عقبال ما الاسقف جه!!
وفى هذه المدة الطويلة لم تتوقف الأحداث المؤسفة أن تتوالى .. كان فيه ناس مستواها عالى ومن أهل وأقارب ناس مهمة فى القيادات الدينية، وكانوا جالسين مستنيين سيدنا لما يجي .. شوية بشوية لقيت ناس غلبانين (أغلبهم سيدات) دخلوا الكنيسة وقعدوا قدام جنب الناس المهمة، وابتدوا يشحتوا ويحكوا ظروف ليهم صعبة .. سمعت واحدة منهم بتقول انها هى وكام واحدة معاها جم من الاسكندرية وفلوسهم خلصت وعاوزين يروحوا تانى ومافيش فلوس! لكنى استغربت من "الاسلوب الغلس" فى طريقة الشحاته .. لحظات بسيطة و دخل اتنين من الخدام بالكاتدرائية وخدوا معاهم الستات اللى كانت بتشحت ديه وعرفوهم علطول اول لما شافوهم !! وبعديها عرفت ان الستات دول اصلا موظفات فى الحكومة ومش من اسكندرية ولا حاجة وده كله كدب فى كدب ..!!
بعديها اتصدمت أكتر لما عرفت انهم طلعوهم المرة ديه بس من الكنيسة لتواجد شخصيات هامة بها، لكن فى المرات العادية لما بيكون فيه ناس عادية هى اللى حاضره .. بيسيبووهم عادى يقفروا الناس!
+ وبعد طول نتظار .. وصل الاسقف وكان ساعتها المعلم (وكالعادة هو أعمي) ماسك عصايته وماشى خارج من الكنيسة معرفش ليه، وقابله فى وشه الاسقف وسأله رايح فين يا معلم، استنى احنا هانصلي بسرعة اصبر .. دخل الاسقف وبدأ القداس وانتهى بسرعة كبيرة، الصلاة طبعاً اتكروتت عشان هو فى الاصل متأخر جامد. حتى ان فيه ناس كتيرة مشيت وناس غيرها تانى جم.
+ خلصنا القداس وانا شاعر ان اليوم من أوله مش مظبوط .. روحت انا وصاحبي كافيتريا عشان نجيب كام ساندوتش نفطر بيهم .. وكان فى انتظارنا برضه بعض الستات قاعدين جنب الكافيتريات بيشحتوا .. وكل ما بمشى متر بلاقيهم .. مكانوش بيخلصوا .. وشافينك معاك أكل بقى فا إزاى انت تدفع فى الأكل وماتديهومش هما!! وكان باين من اسلوب شحاتتهم انهم كدابين ,, وده ملحوظ عشان بالذات لجنة البر فى الكاتدرائية وكمان نيافة الأنبا يوأنس بيوزعوا بسخاء جامد على كل محتاج .. وكمان الستات ديه عاوزة تشحت لكن ماحدش منهم عاوز يشتغل ويكسب من شغله ..
+ شوية صغيرة وعرفنا خبر ان الأنبا يوأنس هاينزل من مقره وهيخرج، فروحنا عشان نسلم عليه .. وأول لما الناس شافته عالسلم لقيت هجوم فظيع عليه من الستات اللى كانوا دايرين بيشحتوا ,, كله هجم على عشم انه يطلع يدي كل واحد حاجة ... حتى هو نفسه كان متضايق من المنظر جداا ... أصل ماينفعش ابن أو بنت المسيح يشحتوا .. ماينفعش!
+ لفينا انا وصاحبي شوية قلنا نشوف الاماكن اللى مشوفناهاش قبل كده بقالنا كتير ... الحقيقة انى حزنت لأنى لاقيت ان الحوش أتقلب مزار للحبيبة!! وكنت نادراً ما بشوف شلة أو جروب مع بعض لكن كنت بشوف دايما اتنين اتنين .. couples يعنى .. حزنت ايضاً لأن كان منظر الشباب منظر مقزز جدااا .. كله بدون استثناءات كان لابس لبس لا يليق .. مش الشابات بس لكن حتى الشباب، البنطلونات المقطعة والساقطة واللى فاتحين صدرهم .. انتوا عارفين أكيد. والبنات طبعاً بنطلونات ضيقة جداا أو الشاربات اللى بتتلبس لوحدها ديه، معرفش ايه الموضه الهبلة ديه كمان .. اللى أعرفه ان ده شراب بيتلبس تحت الهدوم خاصة اننا فى فصل الشتا، ايه اللى خلاه بقى السنة دي يبقى بنطلون ويتلبس لوحده!!!
+ اللى انا بحكيه ده كان بيتكرر كل يوم تقريباً مع اختلافات بسيطة .. احنا روحنا أربع ايام ورا بعض والحقيقة كل يوم كنا بنقابل مواقف رخمة كتيير .. حتى فى مرة شوفنا بنت مع ولد بيتمشوا، وكنا شوفناها فى اليوم اللى قابله علطول كانت مع واحد تانى !!! معرفش ديه كانت بتختبرهم عشان تنقى واحد ولا بتعمل ايه؟! اللى حكيته ده كان ملخص سريع لسلبيات كتير انا كتبت بعض منها عشان اتفاجئت بجد باللى شوفته لأنى كنت فاكر انى كنت هازور الكنيسة الأم وكنت هافخر بيها .. لكن اللى حصل العكس تماماً تماماً ..
+ المواقف ديه كلها اتجمعت وفكرتنى بآيه قلها المسيح أيام حياته على الأرض: بيتي بيت الصلاة يدعى و انتم جعلتموه مغارة (..ضع هنا ما تشاء..)
ربنا يرحم بجد

المصدر: †† منتدى ارثوذكس †† - من قسم: كلام فى الممنوع

[aymonded]

بدء الحكمة مخافة الله ومعرفة القدوس فهم
وان انعدمت مخافة الله لا تندهش مما يخرج من قلب الإنسان الميت بالخطايا والذنوب
والذي لا يريد أن يعود لله الحي فينال من البراءة والطهارة ونقاوة النفس
وهذه البلوى المحرقة التي بيننا نستحق عليها كل تأديب وأن لا ينصفنا الله
بل يتركنا لنسقط تحت نير عدم احترامنا لبيته المقدس
وكما ترك أورشليم وأدبها إذ سلمها لأعدائها
هكذا يترك كل من لا يهابه ولا يريد أن يحفظ وصاياه
فقبول دينونة مخيف من الله الحي الفاحص القلوب
ويعرف الذين هم له والذين أهانوا اسمه وبسببهم يجدف على الاسم الحسن
النعمة معك

[رويس]

معلش انا عندي استفسار استغربت ليه لما قريت الموضوع

اقتباس

+ وبعد طول نتظار .. وصل الاسقف وكان ساعتها المعلم (وكالعادة هو أعمي) ماسك عصايته وماشى خارج من الكنيسة معرفش ليه،

يعني ايه وكالعادة هو أعمي ؟ ايه المغزي منها في الموضوع علشان تحطها في أقواس وكأنها توضيح !!!

[emmmy]

وانا كمان ليا استفسار
دلوقتى انت قررت انت وصاحبك انكم تقضوا يومين حلوين فى الكاتدرائية وتواظوا على القداسات يوميا قد ما تقدروا على حد تعبيرك
ودة جميل جدا وكلنا محتاجينة وخصوصا دلوقتى
عزيزى دكتور بيتر --
انت لما دخلت وتعمقت فى الفكرة اللى قررتها انت وصاحبك انكم تقضوا شوية ايام داخل الكنيسة الشيطان جالك وبوظ صفاءك واعثرك للاسف
لما لفت انتباهك للامور الذى ذكرتها
دلوقتى فى سؤال --
اية الهدف من انك تحكى المهازل والسلبيات والسخفات اللى انت شفتها داخل جدران الكنيسة
احنا سبق واتكلمنا فى الموضوع دة كتير
ومش بيتحل بعرضة على صفحات النت
بالعكس تماما
تفتكر لما واحد من الاغراب اصحاب الديانات الاخرى يدخلوا ويشوفوا موضوعك وكلامك ووصفك لكنيستك وشباب كنيستك واللى بيحصل للاسف فيها هيفكروا فيك وفيا وفينا كلنا ازاى هيشوفوا المسيح ازاى وهيقولوا اية بينهم وبين نفسهم وبين بعضهم خارج الشاشات وعلى ارض الواقع
انا مش بنكر ان فى حاجات كتيرر للاسف مخزلة ومحزنة للاسف
بس
انا وانت نقدر نميز الحنطة عن الزوان ونقدر ناخد الحلو ونفهم ان مفيش مجال ابدا خالى من السلبيات مهما كان -- مها كان يا بيتر
بس فى ناااس كتير مش بتعرف تشوف غير الوحش وبس مش بتعرف تشوف غير الزوان وبس
لو اضمن ان الكل هيشوف ان الكنيسة زى ما فيها اللى ذكرتة انت وغيرك وهيشوف بردوا الحلو اللى فيها من نعمة وقداسة وطهارة وان كنيستنا صلبة وقوية ومبنية على صخرة المسيح وصخرة الايمان العتيد بدليل بقائقا لحد دلوقتى برغم الاضهادات على مر العصور بفضل شغل ربنا فى اولادة اللى حملوا سماتة وشهدوا لاسمة
هحييك على موضوعك وكلماتك اللى هتوضح للناس الاخطاء علشان على الاقل ياخدوا بالهم
لان ممكن جدا يكون فى ناس من اللى انت شفتهم واقفين فى الكنيسة يكونوا واقفين لهدف حلو او يكونوا اخوات او او او الخ بقى مش معقول كلهم واقفين لهدف ولد وبنت فاضيين
انت عندك ميزة حلوة اوى اوى مش عند غيرك كتير انت بتقول شفت سيدنا الانبا فلان وسيدنا الانبا عيلان وكنت فى الكاتدرائية دة معناة انك ممكن توصل كلامك للاباء الاساقفة دول فى الاجتماعات والندوات نحل مشاكلنا بينا وبين بعض يا بيتر ونتكلم فيها بجراة وصراحة مفيش مشكلة وابائنا لو هيقفوا يتفرجوا على المهازل دى من غير موقف ايجابى وحكيم ويمارسوا دورهم كاباء ورعاة ومعلمين يبقى ملوش لزوم عرض السلبيات والمهازل دى على الشاشات يا بيتر
سيدنا اللى كان نازل من على السلم مشافى المهازل دى والاباء اللى عايشين هناك مش بياخدوا بالهم من الحاجات دى ؟؟
مفتكرشى ابداااا

[جانيت سمير]

.. وشافينك معاك أكل بقى فا إزاى انت تدفع فى الأكل وماتديهومش هما!! وكان باين من اسلوب شحاتتهم انهم كدابين ,,

مش يمكن فعلا معهومش ومحتاجين وخصوصا الايام الصعبة دى ناس كتير معندهاش شغل
ربنا هو بس الى عالم بظروف وحال الناس دى
وبعدين مفيش حاجة اسمها ماينفعش واحد مسيحى يشحت وبلاش كلمة يشحت
ليكن كلامكم كل حين بنعمة مصلحا بملح لتعلموا كيف يجب ان تجاوبوا كل احد(كو 4 : 6)
سامحنى على كلامى وعلى الاطالة

[M@@@NOOOO]

هو مش عيب اننا نذكر اخطائنا ونصارح بيها بعض

بس من العيب والقبح اننا نذكر مكان بعظمه وقوه الكنيسه بالمنظر ده !!

الكنيسه الام او الكاتدرائيه المفروض انها مكان مقدس بجميع اركانها

ومهما حصل فيها هاتفضل مقدسه

فيها ايه لما شباب يتعرفوا على بعض داخل الكنيسه !!

مش احسن مايخدوا بعض ويروحوا مكان تاني !!

اما اذا كان عل اللبس ف دي حريه شخصيه

وربنا ومكان ربنا ليه احترامه وكل واحد شايف ان دي طريقه احترامه لربنا !!

وده دور خدامنا وابائنا عل توعيه الناس بأحترام مكان زي ده ..

اما بالنسبه للقداس والصلاه

سيبك انت من اللي بيكروت واللي بيوقف القداس عشان مستني حد

واللي بيشحت واللي داخل واللي خارج .... والخ

اللي عاوز يصلي ويحس انه مع ربنا

مـــــــــــش هايغلب

وربنا يبارك حياتك

[Dr.PeRO]

اقتباس

المشاركة الأصلية كتبت بواسطة aymonded

بل يتركنا لنسقط تحت نير عدم احترامنا لبيته المقدس
وكما ترك أورشليم وأدبها إذ سلمها لأعدائها
هكذا يترك كل من لا يهابه ولا يريد أن يحفظ وصاياه
الذين أهانوا اسمه وبسببهم يجدف على الاسم الحسن
النعمة معك

متشكر خالص لرد حضرتك يا فندم، انا بس عاوز أقول حاجة ان أتردد كتير قبل ماكتب الموضوع ده بس انا من النوع اللى لما بشوف حاجات غلط (حتى لو كنت انا اللى بعملها) ببقى هتجنن واصلحها، لأن انا فى الآخر نفسي اشوف الكتيسة عامة فى أقدس وأطهر شكل، ومش عيب ابداً انى اذكر اى سلبيات اشوفها طالما انها بتزيد ومش بتتعالج .. ده غير انى اتصدمت عشان كنت فاكر ان هناك الدنيا افضل من كده بكتيييييير، فالصدمة كانت جامدة عليا شوية !!

[Dr.PeRO]

اقتباس

المشاركة الأصلية كتبت بواسطة رويس

معلش انا عندي استفسار استغربت ليه لما قريت الموضوع

يعني ايه وكالعادة هو أعمي ؟ ايه المغزي منها في الموضوع علشان تحطها في أقواس وكأنها توضيح !!!

لأ ده أنا اللى عندى استفسار ، حضرتك سيبت الموضوع كله وعلقت على النقظة ديه بالذات ليه؟؟؟
وعموماً، انا حطيتها بين قوسين مش عشان التوضيح، ده عشان أبين ان المعلم كان طالع وبيمشى بره الكنيسة ومش واخد باله (لأنه مش بيشوف ) ان الاسقف كان جاى فى وشه .. يعنى مجدر سرد للواقعة مش أكتر ..

[Dr.PeRO]

الأسئلة اللى قولتيها كتيرة اوى يا إيمي، انا قربت أعيط، هجاوب على ايه ولا ايه دلوقتى

اقتباس

اية الهدف من انك تحكى المهازل والسلبيات والسخفات اللى انت شفتها داخل جدران الكنيسة
احنا سبق واتكلمنا فى الموضوع دة كتير
ومش بيتحل بعرضة على صفحات النت
بالعكس تماما

الهدف ببساطة شديدة أن انا عارف ان فيه شباب وشابات كتييييير عندهم نت وممكن يشوفوا الكلام اللى قولته ده ويفتكروا كويس ان "بيبتك يارب تليق القداسة" وان اللى بيحصل ده لايليق أبداً وكمان لما يتنبه فى مواقع ومنتديات كتيير وفعظات وفندوات وكمان الأهالى تنتبه، السلبيات هتقل كتييييير لحد ما يبقى ان اللى بيعمل الغلط هيتكسف يعمله عشان هيلاقى نفسه بيعمله لوحده، لكن لما ده يبقى العادى، يبقى خلاص بقى كله هيتجرأ واللى لسه مجربش يجرب!!
صوتى وصوت اى حد بيفضح الغلط (فى أى مكان) بيبقى كأنه زن عالودن عشان اللى ماشى غلط أو اللى ناوى او اللى متهاون يفوق، ماتنسيش ان فيه زن أشد وأشرس شغال فى الودن التانية هو اللى صوته أعلى وللاسف بيكسب، اللى هو زن ابليس.

اقتباس

تفتكر لما واحد من الاغراب اصحاب الديانات الاخرى يدخلوا ويشوفوا موضوعك وكلامك ووصفك لكنيستك وشباب كنيستك واللى بيحصل للاسف فيها هيفكروا فيك وفيا وفينا كلنا ازاى هيشوفوا المسيح ازاى وهيقولوا اية بينهم وبين نفسهم وبين بعضهم

يعنى الواحد ده مش هاياخد باله من اللى بتشوفه عينه وهو معدى كل يوم من جنب أى كنيسة وهياخد باله لأنه مشترك فى منتدى مسيحي وقرأ الموضوع ده بالصدفة!!
وبعدين كلهم عارفين وواخدين بالهم من كل حاجة، بدليل الشتايم اللى كل يوم بنسمعها والإشاعات اللى بتتطلع كنتيجة للى بيشوفوه فى الأصل!!
وبعدين هل انا يهمنى بالدرجة الأولى الآخرين ممكن يشوفوا المسيح ازاى، ولا ولاده اللى فى الصل من خرافه وهما بيضيعوا واصبحوا مسيحيين بالاسم بس!!
الله فى الأصل كان ليه شعب (شعب بنى اسرائيل) وبعده لما سابوه سابهم لهلاكهم واجتذب ليه شعوب أممية آخري قبلت دعوته (اللى منهم إحنا)

اقتباس

وهيشوف بردوا الحلو اللى فيها من نعمة وقداسة وطهارة

الحلو ده انا مش محتاج اذكره لأنه المفروض انه هو الطبيعى، انا المفروض أصلح من الأخطاء مش أسيبها وأقعد أمدح فى الحسنات! بجانب ان قنواتنا الفضائية مش بتجيب غير كل شئ حلو ومركزة كويس على كل الايجابيات.. مين بقى هينضف السلبيات؟!
أكيد مش انا بس لو كل واحد قال وانا مالى يبقى الدنيا هتخرب زيادة
انا يكفيني حد واحد: أم أو أب أو اى شاب أو شابه شاف الموضوع وغير من نفسه وحاول يغير اللى حواليه .. بكفيني انه مجرد يراجع نفسه قبل أى قرار لما يقرأ السلبيات بطريقة تشعره انها بالفعل "سلبيات" بل و"حماقات" مش مجرد أمور عادية ويومية!

اقتباس

لان ممكن جدا يكون فى ناس من اللى انت شفتهم واقفين فى الكنيسة يكونوا واقفين لهدف حلو او يكونوا اخوات او او او الخ

لا طبعاً الغالبية معروفة انهم couples .. ده غير انه بيبان من اللبس والميكب ان دول مش منظر اخوات .. فى الاغلب الولد بيخاف على اخته وبيخليها تتصرف صح وتلبس صح حتى لو هو اصلا ولد فاسد!! والاخوات دول هتلاقيهم قاعدين حاضرين القداس مش جايين وقاعدين بره بيلفوا من قبل القداس و مكملين لبعده!

اقتباس

انت بتقول شفت سيدنا الانبا فلان وسيدنا الانبا عيلان وكنت فى الكاتدرائية دة معناة انك ممكن توصل كلامك للاباء الاساقفة دول فى الاجتماعات

لأ انا بشوفهم وروحت الكاتدرائية فعلا لكن معرفش معرفة شخصية ولا واحد منهم
يعنى معنديش واسطة الحمدلله، أخرى أعرف أب اعترافى وخلاص
انا اللى هاوصله البحث اللى كنت عامله للأنبا مارتيروس عشان فيه حلول كتيير ممكن حد يستفاد منها لو حب .. لكن السلبيات ديه زى ما انتى قولتى انهم بيشوفوها كل يوم وعارفين اكتر منى ومنك كل حاجة، يبقى احنا نحاول مع الشباب والأهالى نفسهم لأن الاساقفة مش هايقدورا يعملوا حاجات كتيير، ومشغولياتهم كتير جداا

متشكر لردودك ونورتى الموضوع
ربنا يباركك

[aymonded]

سلام لنفسك يا محبوب الله الحلو
أنا بالطبع لا أذكر أن ذكرك لهذه الأمور نابع من شيء آخر غير الصدمة وعدم التصديق لما يحدث ، وأنا اقصد أن أظهر أن المشكلة الرئيسية في عدم سكنى مخافة الله في القلب ، لأن عدم المخافة يجعل الإنسان يفقد كل إحساس بحضور الله القدوس الحاضر بملء مجده ويستهين بالحضرة الإلهية فيترك الله المكان ويؤدب الإنسان كما فعل في أورشليم حينما طرد الباعة وكل من يستغل بيت الله في غير العبادة بكل مهابة وتقوى ...

المشكلة أن كل هذه الأمور واضحة امام الكل ، بل وأمام الغريب قبل القريب وكل من لا يحيا بالتقوى فبسببه يجدف على الاسم الحسن ، وكل إنسان غريب عن الكنيسة ويدخل الكاتدرائية أو أي مكان آخر ليس فيه خوف الله بالطبع ينتقد الموقف لأن الخطا لن يُخفى على أحد ، والكلام كله لكي ننتذر ونذكر الرب ونتوب ، ولكننا تعودنا أن نخفي عن أنفسنا ما هو ظاهر بحجج واهية تُديننا أمام الرب ، لأن مبرئ المذنب ومذنب البريء مكرهة لدى الرب ، وأن لم نواجه أنفسنا ونعرف عارنا لن نكون قادرين على أن نطلب مجدنا بالتوبة الصادقة والحقيقية ، فأن رفضنا أن نواجه أنفسنا فستفضحنا أعمالنا ، وأن أخفينا عن عيون العالم كله أخطأنا لأننا نخجل ونخاف من أن يتصيدوا شيئاً علينا ، فكم نخجل أمام رب الجنود الكامل الذي أهنا اسمه العظيم القدوس بتصرفات لا تليق ...

لماذا نعمل حساب الناس لئلا ينظروا أخطاءنا وشرورنا القبيحة ولا نخجل من الديان العظيم في داخل الكنيسة والقداس الإلهي !!! وهذا هو السؤال الذي أطرحه على الجميع ، لماذا نُهين القدوس البار ملك المجد ونخشى الناس ولا نخشاه هو !!!

ويا أحبائي كاتب الموضع لا يفضح أحد ولا الأماكن مقدسة ، لأني اعتقد كلنا رأينا بأعيننا والغريب قبل القريب يعلم يقيناً كل شيء ، إنما نحن نريد أن نجمل صورتنا أمام الناس ونسينا الله وطفأنا الروح القدس داخلنا ، فلنستفيق ونعلم أن الرب قريب ، وماذا ننتفع لو مدحنا كل الناس وأخفينا أخطانا عن الآخرين والتي هي محل عثرة الجميع ، وسقطنا من الحياة الأبدية ولم يعد لنا مكان وسط القديسين وفردوس النعيم !!!

ليت الناس كلها تذمنا ومدحنا يكون من الله ، عوض أن يمدحنا الناس ويظنوا فينا حسناً ونحن في الواقع العملي قبوراً مُبيضة من الخارج ومن الداخل مملوءة عفونة الموت وصرنا مكرهة عند الرب وغنيمة لعدو كل خير ...

أنصحك يا صديقي الحلو كما علمنا الآباء القديسين ، أن نهرب من اي مكان ليس فيه خوف الله وحتى لو كانت كنيسة أو دير أو قلاية أو إنسان ، ونذهب للمكان الذي نجد فيه عبادة حية بالروح والحق في هدوء القداسة ومخافة الله القدوس ، لأننا لا نشترك في أعمال الظلمة بل نوبخها بكلمة الله وسلوكنا المستقيم بالنعمة حسب قول الرسول ، أقبل مني كل حب وتقدير النعمة معك ومع الجميع آمين