علامة أستفهام
تعالوا نتكلم عن الحب .. نتكلم عن الغرام والعشق
نتكلم عن الشوق والهيام .. ونشوف أية اخرة الكلام
ها نتكلم عن العيون ونص نظره بالجفون
ولا نتكلم عن السلام بالرمش والابتسام والهمس
نتكلم عن السرحان وكل ساعه بحال
ولا نتكلم عن التفكير والسهر طول الليل
نتكلم عن الاغانى الرومانسيه ولا الموسيقى الكلاسيكيه
نتكلم عن ثومه وحليم ونجاه ولا كاظم واليسا وجنات
نتكلم عن الرقه والمشاعر والاحساس
ولا ندقق اكتر فى كل قلب حساس
ولا تعالوا نتكلم عن الحب اللى زى التيك واى
واللى بيجى بسرعه وبيعمل اللى عليه
نتكلم عن افلامه اللى بتتمثل قوام
ولا نشوف الحكايات اللى فيها كل الرويات
نتكلم عن الورد اللى بيتقال عليه بلون الخد
ولا نتكلم عن صوباع الروج الاحمر ؛وكمان الروز
ولا نتكلم عن القصات الدجراديه ولا الماشيت والجانجيه
ولا الجيب الاسود والبدى السيمون ولا الجينز والكاجوال والشافون
ولا نتكلم عن نظرات الاعجاب والقلب من لحظه تلاقيه داب
عن اللى بيحب من غير حساب ويوهم حبيبته ان الضباب سحاب
ولا نتكلم عن تضيع الوقت واللعب بس بأى حد
ولا نتكلم عن الحزن والنواح عن واحده باعت والتانى راح
كده اتكلمنا عن نوعين ولسه فى ياما ملايين
مبقاش للحب أنواع ولا قوانين
دلوقتى الحب على هوى المحبين
ممكن يكونوا فاهمين ممكن يكونوا مجانين
ممكن يكونوا فى منتهى العقل بس احياناً تايهين
قولولى هو ده الحب ولا مجرد كلام
ولو دى صور الحب .. يبقى علامه استفهام ؟
تعالوا نوصف الحب كل واحد وحكمته
تعالوا نتكلم بجد والكل يوصف نظرته
وأنا هبداء بالكلام أصل اللى فات كان هزار والسلام
هتكلم عن اتنين بيموتوا بجد .. أتنين ضحوا لما عرفوا الحب
اتنين مافرقش معاهم اى بعد .. بدلوا قلوبهم وعاشوا بالوعد
الف حاجه كانت رافضه القرب .. رضيوا بنصيبهم بس روحهم فى بعض
أصل الحب عمره ما كان كلام .. تضحيه للنهايه تضحيه باحترام
لما تضحى وبضميرك مرتاح .. احسن الف مره من اللوم والجراح
لو هاتكلم هاقول كتير .. هاقول الحب شىء جميل
هاقول الحب وضع خطير .. هاقول الحب تعب وويل
هاقول الحب جبال احزان .. هاقول سعاده وكمان حرمان
هاقول الحب ..واستنا شويه .. هاقول حنيه وهاقول قاسيه
هاقول طيب لما يبقى قريب .. واقول لما يبعد بيدمر ويعند
هاقول غلاب وميت الف باب .. هاقول أبوابه مفاتيحها العذاب
هاقول احلام وكمان حقيقه .. والحالتين بيموت فى كل دقيقة
هاقول حيره وناره كبيره .. فى البعد والقرب بيحرق كل ليله
هاقول وجوع من غير رجوع .. هاقول شموع بتقدها الدموع
مش سهل تعريفهُ مع انه معروف .. يديك الامان ويملاك بالخوف
قولولى هو ده الحب ولا مجرد كلام
ولو دى صور الحب .. يبقى علامه استفهام ؟
تعالوا نوصف الحب كل واحد وحكمته
تعالوا نتكلم بجد والكل يوصف نظرته