خد شيل عنى
الحمل تقيل خد شيل عنى .. قلبى وتعبان من شيل همى
ما تاخدنى فى حضنك وتطبطب .. متسبيش الموجه تغرقنى
خد شيل عنى
تعبان وهموم قلبى كتيرة ومشاكل العالم رابطانى
كل مافكر او اجيب سيرة عن حبك بيزيد عصيانى
وقساوتى بتبقى جبال عالية .. وضباب وسحاب ورياح عاتية
وسنينى بيملاها فى ثانية .. الخوف من انك تنسانى
الحمل تقيل وبيكسرنى...
خد شيل عنى
انا كنت كتير عامل ناصح فى الضيقة وبس اكون ابنك
بسمع لمشورتك وبقاوح .. عايز رأيى اللى يكون حُكمك
وبقول دى ارادتك وانا راضى .. بس إعمل رأيِى المرادى
ماطبيعى تلبى طلباتى ..مهما تكون صعبة ده انا ابنك
تعبان يا الهى .. ريحنى ..
خد شيل عنى
باصص خطوات من تحتيا ..وبعول الهم عشان بكره
واللى انت عملته زمان ليا ..بغرابه اتحول بقى ذكرى
وانت مافيش يوم تغفل عنى !! ولبكره كتير بتطمنى
وتقوللى العصافير ترعاها .. ايش حال انت الغالى يا ابنى!!
انا خجلى ياربى مقيدنى ...
خد شيل عنى
بيشوى جرجس
مايو 2010