[عماد حسنى]

حوار مع نفسى

هو انت بتحلم بأيه
يا عم ماكفايه أحلام !!
اللى راح ولا اللى جاى
كلهُ بقى اوهام ..

هاتنسى القديم بجديد
مالقديم كان جديد زمان
هو انت ناسى انك
انسان بلا انسان ..

انا بجد زهقت منك
لأمتى هاتكون تعبان
لأمتى هاتبقى حزين
ولامتى هاتفضل خسران ..

كتير اللى بعدوا عنك
وهابعد انا كمان
خلاص مش هابقى منك
مش هاكتملك جوايا بركان ..

مش قادر تواجه نفسك
أصلك أنسان جبان !!
هاضغط واجرح مشاعرك
مانت اتعودت تتهان ..

يمكن تراجع نفسك
او يمكن تكون غلطان
يمكن تعرف تعيش
او حتى تعرف تنام ..

عايز ايه م الدنيا ؟؟
عايز ايه من الناس؟؟
أيه مخليك بتموت
وأيه بيجبرك تنداس ..

حب ؟؟ ياسيدى ماشبعنا احساس
كرامه ؟؟ كل سنه وانت طيب خلاص
اوعى تقولى مشاعر
او يتهيألك أخلاص ..

او تقولى تفكير ورا تفكير
او الحمل عليك تقيل
او تقولى الليل مابيمشيش
بتستناه مابيعديش ..

هافوقك لو هاتموت
هو انت كده انسان !!
دانت حلال فيك الألآم
دانت موتك أحسن ماتعيش ..
!!!!

طب جربت تصلى !! مارضيتش
طب حتى تغنى !! مانفعش
طب وانت بتحكى !! ماريحش
طب حاجه تطمن !! مابتطمنش

طب هاقولك كلمه اخيره
اصلى تعبت كل ليله
وحاولت أاسى عليك
لقيت اللى فيك مكفيك

ومش هاين عليا أجرحك
مانا شايف اللى بيدبحك
هاخدك من إيديك ونروح
هانروح للمسيح يريحك ..

اصل مش بأديك أى حاجه
منا معاك فى كل حاجه
هاخدك وناخد حزننا
وهو باحضانهُ هيضمنا ..

جربها وأخر مره
انا عارف حياتك المره
هانخدلهُ كل جراح
جرب مايمكن ترتاح ..

مكسوف ومليان بالحيره
وذليل وذنوبك تقيله
هانروحله مكسورين
وهانشوف .. هو مين

اصلك أقل الناس؟
ده فى نظر القليلين
لكنه هايحن عليك
وهاتحس انك ثمين ..

ده يسوع الأب
ده الفادى الأمين
ده نبع الحب
اللى بايدهُ بيمسح
كل عين

_____________

المصدر: †† ارثوذكس †† - من قسم: القسم الادبي