دموعنا
يارب دموعنا اليك بتنادى 00 وانت بتقول انتوا ولادى
ولادك غدروا بيهم المجرمين 00 ولادك ياربى اللى ليك مخلصين
ياربى تعالى انت وحاكم 00 تعالى لولادك أحكم وأقضى
عشمنا لا يمكن يكون فى محاكم 00 ولا شعارات وكلام بيعدى
ياربى دموعنا ماليا عينينا 00 والحزن مالينا بيقطع فينا
الظلم بيكتر أوى حوالينا 00 محتاجين عدلك تعالى نجينا
ياربى ولادك سبونا وراحوا 00 مش قادرين على بعادهم
بس عندك هما ارتاحوا 00 تعالى وعزينا على فراقهم
تعالى وخد ياربى بحقنا 00 من اللى استحلوا لنفوسهم دمنا
من اللى بيموتوا ولادنا 00 وقتلوا بغدرهم زهور عمرنا
تعالى لأم أبنها راح 00 وريها عدلك علشان ترتاح
وريها غلاوه ابنها أيه 00 ماهو أبنك وأنت فاديه
ياربى ولادك ماتوا خيانه 00 ماتوا وهما اد الامانه
ماتوا ياربى وشايلين أسمك 00 ماتوا وهما هدفهم شخصك
ياربى أبداً مش هتنسانا 00 ولا هنقضى العمر حزانا
مهما العالم يتحدانا 00 صليبك لينا كل منانا
مهما يحابوا ويقوموا علينا 00 مهما هايخدوا ما تملك ايدينا
أصل وطنا بينده علينا 00 واحنا رجانا فى سماك يا فادينا
الغربه مرار وكله هلاك 00 صابرين فيها بنتبع خطاك
انت ياربى كل حياتنا 00 فى السما والارض احنا معاك