استاذتى
تفتكرى انك مافيكيش ولا عيب ؟
كل بنى ادم مهما كانت درجة قداستة لازم يكون عندة ضعف فى حتة معينة .. مافيش حد ف الدنيا كامل.
لكن فى اخطاء ينفع الانسان يتقبلها وحاجات تانية ماينفعش .
فأنتى شوفى لو هو عيبة السجاير - فأنا بقولك ان السجاير دى غالبا بيشربها الانسان من سن صغير بيكون فية مش فى كامل شخصيتة لكن للاسف بتستمر معاة لحد مايكبر ويكون شخصيتة ويبقى لية اتجاهات وشخصية تانى - وممكن يشوف بشخيصتة الجديدة انة غلط لما شرب سجاير لكن ساعتها بتكون السجاير بقت ف دمة ومش قادر يبطلها ويصلح القرار الغلط لكن الشئ الاكيد انة لو رجع بية الزمن ماكنش شربها من البداية.
عشان كدة ماتحكميش علية انة انسان تافة لمجرد غلطة غلطها ايام ما كان غير واعى .
والسجاير فعلا كما اثبت العلم انها ادمان وايقاف التدخين شئ غير سهل بالمرة - الشخص ممكن يبطل الهروين اسهل من انة يبطل سجاير (ودة حقيقى ماحدش يتريق عليا) لكن دة مايمنعش ان التدخين ينفع يتبطل بس بيحتاج حافز قوى وارادة قوية تنبع من داخل الانسان نفسة وليس بتاثير من شخص اخر كالاب او الام او الخطيبة وبأخذ قوة من الله قبل الكل.
فلو الشخص دة مشكلتة السجاير بس احمدى ربنا واتوكلى على الله - احسن من لو كان عندة طبع وحش او عادة اخرى اسوأ او اى شئ (قضى اخف من قضى)
عن نفسى نصيحتى ليكى ...وليكى الحق انك تقبليها او تناقشيها وترفضيها :
اهم حاجة الارتياح النفسى للشخص الاخر والاحساس انك بتحبية وانة قريب منك فى التفكير دمة شبة دمك روحك شبة روحة - ممكن تفهمية من نظرة عنية وهو كمان ممكن يفهمك من غير ماتتكلمى . بيحس بيكى لما تزعلى ويحس بيكى لما تفرحى .. بيعرف ازاى يقولك على عيبك من غير مايجرحك .. بيقدر شعورك ورأيك وبيحترمك .. ممكن يسامحك على غلطة غلطتيها .. بيتقبل اخطاءك بس ينصحك بالصح .. وغيرة
دى الحاجات اللى تشوفيها فية ودى الاهم - لو موجودة فية يبقى اكيد هاتعيشة مع بعض فى سعادة
انما عادة زى السجاير اكيد مع الوقت ممكن يبطلها وربنا يديلة القوة وانتى تساعدية ف انة يتغلب عليها مش ترفضية بسببها -
وهو اصلا اكيد مش مبسوط من نفسة انة بيشرب سجاير واكيد نفسة يبطلها بس مش قادر يبقى مهمتك انك تساعدية
سلام ليكى يااختى