لا أدعى كونى شاعر لكن هذا مجرد حلم و دعوة و رسالة لغد أفضل ......
أحلم ..أوعى الحلم يموت
أحلم قبل ما قطر الحلم يفوت
أحلم عشان تعيش بلأمل
أحلم و كمل حلمك بالعمل
أحلم و أوعى الحلم يموت
بكرة بتاعك و بتاع أبنك
بلاش تحلم بكرة بشوك
ليه البسمة ما تفضل بسمة
ليه يضيع الحب و الذوق
ليه لما بتيجى السيرة
دمعة بتنزل بجرحة و حيرة
بكرة! يا رب ما يجى بكرة!!!!!
مستنينا ايه غير أيام شريرة
بكرة دا ثمرة زرعناها بذرة
ممكن بدل الشوك نزرع وردة
اللى حنزرعه بادينا حيكون
واللى حنحلم بيه اليوم
بكرة راح نسكن فيه
سواء فرح ولا هموم
ليه نستنى بكرة جايب ايه
و مركب عمرنا حيكون فين
ما فى مركب تمشى حسب التيار
و متعرفش حتروح فين
ولا بيت تبنيه ظروف
ولا بالصدفة و الحظ راح تسكن فيه
اللى تزرعة اليوم بايديك
بكرة راح تحصدة ايديك
تبنى حب حتلاقى حب
لكن الكره حيجى منين
غيرنا حلموا و الحلم أتحقق
و احنا سيبنا الظروف تحركنا
غيرنا غيروا العالم بفكرة
و احنا على كراسينا ما أتحركنا
ترجع تبكى الظروف و بكرة
و تقول نفسى أهاجر برة
تعرف وطن شرف ناسه
ولا الناس رفعوا وطنهم
هو ايه كان الأول
الناس ولا دولهم
عايز تهرب .....يلا أتحرك
الجبان مش حيعيش بكرة
لكن لو نويت تبنى
بص لقدام و انسى الدمعة
أحلم ..أوعى الحلم يموت
أحلم قبل ما قطر الحلم يفوت
أحلم قبل ما تبكى و تندم
وساعتها الحلم يصبح عدم
غاندى قاوم الاحتلال ف سلام
ولا نقطة دم سالت ولا عرف استسلام
و جيتس نجاحة بدايته أحلام
و كنج قاوم العنصرية باصرار
و مانديلا كمان عاش جبار
و هيلين كيلر حطمت للعجز جدار
و غيرهم كتير سجلهم التاريخ بفخار
أحلم عشان بالحلم تعيش
مش عشان ف الحلم تعيش
الحلم طفل خليه يعيش
بطل تحلم بلقمة العيش
أحلم بوطن فيه تعيش
قول غير حلمى ماليش
عيش أمين... بكرة الأمانة تسود
أحلم بعالم من غير رشوة
مفهوش محسوبية و سرقة
أحلم بديموقراطية و حرية
كفاية بقى تكسير أقلام
كفاية بقى تكميم أفمام
أحلم بحرية العقيدة
يكون مايكل زى عبد الرحمن
قدام الدستور الكل أنسان
يعيش ف الوطن من غير ما يتهان
أرشم صليب
أرفع أذان
أعيش و علمى يصير هلال حاضن صلبان
لسانى و تعليمى و قلمى بيشهدوا
مش بس باللسان
أحلم ببطاقة من غير خانة الديانة
و ف أمتحان أخد تقديرى بأمانة
لو أستحق أكون أستاذ أو وزير أو فنان
يكون لى مكان
أو نايب ف البرلمان
بأصلى قداس أو أرفع أذان
حتفرق ف ايه الأديان
ما دمت ف الحق سيف
و خدمة الوطن هو الميدان
ما دام الدستور يدينى حقى
ليه يرفضنى انسان
و لو كنت حتى مجرم
أتحاسب بالقانون
كلنا قدام القانون سيان
من غير تحزب و لا اهانة
دا العدل يا أخواتى أمانة
أحلم بوطن فيه للست حق الراجل
الكل واحد و ف حب الوطن بيناضل
كلنا قدمنا أرواحنا و دمانا
و لو طلبنا الوطن لبينا بأمانة
دا كلنا مات عنا المسيح و فدانا
أحلم بصوتنا تسمعه كل الأوطان
وطن كان و حيفضل لآخر الزمان
يحترم المشاعر و يرفع الأنسان
أبنى كنيسة زى مسجد
حب الله و الوطن فى القلب و الوجدان
نموت بنحلم أحسن ما نعيش ف الموت
أنا انسان و حأفضل احلم لآخر الزمان
و أموت و الحلم ما بيموت و لا يلبس أكفان
يفضل يصرخ و ينادى
"هنا عاش انسان"