قلبي ذنبه إيه معاك ؟ كل ذنبه إنه حبك وبس
ولا الحب دلوقتي بقي ذنب والمفروض أتعاقب عليه ؟
قلبي أخدته مني وبقي معاك عملت فيه إيه ؟
أنا مش قادرة أتعرف عليه مش هو ده قلبي اللي كنت أعرفه
قلبي رجعلي وحيد ومكسور ومجروح . أنا شايفاه بينزف
وده شئ بيألمني نفسي أداوي جروحي الكتيرة اللي سببها إيديك
بس هعمل كده إزاي وإنت لسه قصاد عينيا
ومش قادرة أنساك
هنسي إزاي وأنا دموعي نازلة علي خدي بتكويني
بتلومني ليه عملت فيها كده بتقولي إني السبب
بتقولي ما إنتي كنتي مرتاحة من غير حب ليه حبيتي من تاني ؟
دلوقتي شبعتي جراح وآلام ولا هتفكري تحبي من تاني ؟
طب أنا كان ذنبي إيه ؟
إني حلمت أحب وأتحب ؟
إن كان جوايا مشاعر كتيرة وكان نفسها تطلع للنور ؟
هو أنا كده أجرمت ولا طلبت حاجة مش من حقي ؟
ولا كده بقيت طماعة وحلمي كان كتير عليا ؟
علشان كده زماني فوقني وقالي فوقي حلمك ده كتير عليكي بلاش خيالك يروح لبعيد
إحلمي علي قدك إنتي أخرك تحبي وتتجرحي وبس
لكن إنك تتحبي لا كده كتير عليكي
بلاش تبصي بعنيكي لقدام خلي نظرك تحت رجليكي
آه يا زمن غدار بقيت إنت اللي تتحكم فينا
عملتنا زي الشطرنج تحركنا مكان ما تحب
تموت اللي تختاره وتكسب اللي تختاره
وإحنا كل اللي في إيدينا نقول حاضر ونتحرك حسب أوامرك
مفيش أصعب من إنك تحس بالعجز وإنت في عز شبابك
كل الناس بتحقق أحلامها علي حسابك وإنت واقف محلك سر
وحتي مش من حقك تشتكي أو تتظلم
لإنك مش هتلاقي اللي يسمعك أو حتي اللي ينصفك .