[ماريان]

أيام زمان
كانت ملامحى مسمسمة..كانت عينيا ولا السما..
كانت شفايفى منمنمة..وكنت جنان..
وكل دة كان..ايام زمان..
أيام زمان..
كنت حاسس بالدفء..فى حضن ام..بشوق يضم..
أشوفها اضحك..تشوفني تضحك..
وكنت مليان بالأمان..
وكل دة كان..ايام زمان..
أيام زمان..
كنت أترمى فى الحضن وا بكى..من غير ما اكون حقيقي بابكى..
كل اللى عايزة تضمنى..كل اللى عايزة ابتسام..
كنت اترمى وفجأة..انام
تروح تغطينى بحنان..
وكل دة كان..ايام زمان...
ايام زمان..
كنت بالعب مع ملاك..
قاللى ربى اللى حماك..بعتنى ليك..أأكلك..وأشربك..والعب معاك..
قوللى نفسك فى اية كمان..
كنت بافرح..واقوللة كفاية..انك معاية..
وفى وقت نومى..كانوا يقولوا انى باحلم..
مايعرفوش انى بالعب..مع ملاك..
وانا سعيد..دا لسة بيقوللى..نفسك فى اية كمان..
وكل دة كان..ايام زمان..
ايام زمان..
كانت براءة..كانت صفا..
كانت اقصى شرورى انى ابتسم..
ولما يشيلونى..كنت اتدلل واترسم..
كانوا يقولوا انى ابن لربنا..
و يا رب يكون احسن منا كلنا..
ويكون صورة حلوة..لصاحب الحنان..
وكل دة كان ..ايام زمان
ايام زمان..
عرفت ازحف..تاتا تاتا..
بقيت أصلى جنب امى..
وأقول يا رب يخلى اهلى..
ويسعد الأنسان..
وبقيت ارسم صور جميلة..
لبابا .... يسوع
وألون بالألوان..
عرفت ياما حاجات جميلة..
ها تفضل طول الزمان..
وكل دة كان..ايام زمان..
ولما كبرت..
عرفت البكى..ولما القلب يبكى..
عرفت الغيرة..عرفت السلب..
عرفت الكرة..عرفت الذنب..
عرفت القسوة من الحنان..
وعرفت مشاعر من الشيطان..
ولربى هجرت..
لما كبرت..
راح الحضن والدفا..
راح الامن والوفا..
راحت منى البراءة..وتاهت وسط الزحام..
غشيت الكلام..
نسيت حتى معنى السلام..
وأد اية قلوب ياما جرحت..
لما كبرت..
بصيت فى المراية..
فية عين بقسوة تبصلى..وعين بغدر تبصلى..
عيون مين فى المرايا..
التفت..بصيت ورايا..
انا هو انا..لكن ..مش انا..
عيون مين فى المرايا..
صرخت..صرخت..

لما كبرت..
كبر الشيطان جوايا..والخير انهزم..
لقيت ملايكة من قلبى بتنسحب..
مكسورة القلب..
بتقوللى لية هزمتنا..بتقوللى لية بعتنا..
و ربك خنت..
لما كبرت..
بصيت فى قلبى..
لاقيت صحارى..وذئاب بتعوى..
بعد ما شفت بعينى ملايكة بجنحات..كانوا يأكلونى..لو معاد
الأكل فات..
جريت..وخفت..
لما كبرت..
ما عدت اشوف نفس الملايكة..بقيت اخطى فى ارض شايكة..
تجرح فى نفسى..تجرح فى قلبى..
واصرخ الم..وابكى ندم..
وشيطانى يقوللى خلاص..مافيش خلاص..
كلة مكتوب..و انحسم..
الخير جواك..انقسم..
كتير تعبت

لما كبرت..
خدت قرار..ولو فى نار..هانفذة..
رغم الأنين..وتعب السنين..
رغم شيطان اليأس..والقلب الحزين..
سنين غربة..شموس غاربة..
لكن بييجى اكيد..صباح جميل جديد..
زى الطفل الوليد..مليان بالصفا..
ولو الشباب مات..ولو العمر فات..
معاة هايحلى الرجوع..
من وادى الدموع..
راح ارجع من تانى ابتسم..
الحضن قدامى..
والحب قدامى..
فى قلب يسوع..
مع انة من الاول فى قلبى..
لكن بعدت..
ومن ايدية بعيد هربت..
لكنى هامسك فى ايدية..
واسلم قلبى تانى لية..
هو الأحن من الف ام..
هو اللى يقدر بشوق يضم..
سامعة لما قال..
مش ممكن انساك..
وفى الدروب..انا معاك..
فى اى ضيق هو الصديق..
سامحنى ربى..لما فى يوم..
انا بيك غدرت..
لما كبرت..
كنت ها ضيع..لكنى قلت اكتبلكم..قصة رضيع..
شاف الملايكة من تانى..
ولما كبر..
رجع رضيع..

منقول

المصدر: †† ارثوذكس †† - من قسم: القسم الادبي