أَتَحدَّاكْ
********
أتحداك لو تقدر تفهم .. سر ديانتي وعُمق إيماني
أتحداك لو تقدر تعرف .. سر ساماحتي مع اللي أذاني
أقتل .. إذبح .. إحرق وإهدم .. مش هاتهز سلام جواني
ضرب رصاص وسياف ماأخافشي .. ربنا حصني وهو أماني
+++++++
أتحداك وأنا كلي محبة ب إسم يسوعي مهما أعاني
ربي عاطيني نصرة تِغلب .. أي كيان أو فكر شيطاني
أنا عايش ع الارض ولكن .. بالفردوس أهلي وأوطاني
إقرا تاريخنا .. كنيسة قوية .. صامدة وما أتهزت لثواني
+++++++
أرض أجدادي ف مصر ها تفضل .. أرض أقباطنا وهنا عنواني
جِدَّك كان ف الأصل أخو جِدِّي .. واحد أَسلَمْ وعاش التاني
أنا في كتابي يسوع وصَّاني .. أحب عَدُوي وإبن جيراني
واللي بيشتم أسامحه وأباركه وأدوَّر له الخد التاني
+++++++
ها أتحداك وأنا برضه ب أحبك .. لأن يسوعي بدمه رواني
قلبي شوقه لمجد سماوي .. وظُلمٓك بيزود ف تيجاني
توب ياحبيبي عن أفعالك .. توبة قوية .. مش بتواني
يسوعنا في الملكوت مستني .. وإن ما قبلته .... إنت الجاني
==========
الفونس جريس
٢٨ مايو ٢٠١٧