[emmmy]

و الاخت: emmmy
شكرا على كلامك و تشجيعك بس عايزة اسألك شوية . قلتى: "وانتى مش كئيبة بدليل انك بتقولى انا بكلم ناس وبقى دمى خفيف"
صدقينى مش متأكدة . ساعات بيكون دمى خفيف و ساعات ببقى جد و ساعات متدينة شوية او قريبة من ربنا . بيتهيألى حسب الانسان اللى بتعامل معاه . تفتكرى دى ازدواجية ؟؟؟

لا يا حبيبتى مش ازدواجية ولا حاجة الموضوع ابسط من كدة بكتير
بس هو بصراحة سن المراهقة دة بيبقى سن مزاجى جدا ومتقلب جدا فى احوالة المزاجية احيانا بيكون فرحان ومبسوط وفجاءة وبدون سبب مقنع بيكون زعلان
اقل حاجة بتفرحة واقل وحاجة بردوا بتزعلة ودة امر طبيعى وعادى فى سنك الرقيق دة يا قمر
و: " ركزى فى حاجة حلوة واسعى لتحقيها ركزى فى هدف سامى وحاولى بكل جهدك تنفذية"
مفيش . حاولت كتير ادور على الهدف ده بس مش لاقية . كل اللى قالوا كلمتك دى و سمعوا ردى قالولى عيشى عشان الهدف اللى ربنا خلقك ليه .. بس انا اساسا مش عارفاه . فى حد بيعيش عشان هدف هو مش عارفه ؟
لا طبعا محدش يعيش علشان هدف مش عارفة
لكن مفيش مشكلة انك متعرفيش هدفك دلوقتى لكن دورى علية جواكى دورى علية فى احلامك وطموحاتك دورى علية فى لحظات الهدوء والصفاء دورى علية فى ارشادات الاكبر منك واكيد هتلاقية انت اكثر واحد تعرفى انتى عاوزة اية بالظبط
و: " انتى ركزى فى هدف حلو بستحق انتباهك واهتمامك هتلاقى نفسك مش حاسة بالظروف الصعبة اللى بتتكلمى عنها ومش هتاثر فيكى كتير"
صدقينى مفيش . حاولت اخلى الهدف ده فى الدراسة بس اكتشفت ان الانشغال بيها فعلا حاجة تافهة جدا لانها اساسا ملهاش اى مستقبل . حتى لو ليها انا مش مهتمة بالمستقبل مهما كان شكله
اد اية انتى مسكينة واد اية انا زعلت علشانك حقيقى بامانة
الدراسة اللى انتى شايفاها ملهاش اى مستقبل دى هى اللى هتعمل منك انسانة ناجحة فى حياتك العملية واللى انتى شايفاها فعلا حاجة تافهة دى غيرك بيتمناها ومش طايلها وغيرك كان نفسة فى الدراسة اللى انتى مش حاسة بقيمتها دى ومش طالها
من فضلك عزتى تصدقينى انتى ربنا مديكى نعمة حلوة متضيعهاش من ايدك الدراسة هتنفعك فى حياتك حلها وفى خبرات تاخديها وفى اختيار شريك حياتك وفى تربية اولادك صح بلاش تظلمى نفسك بنفسك ارجوكى
و : "واختلاف بابا وماما احنا كل اللى نقدر نعملة اننا نصلى فعلا علشان ربنا يتمجد ويحنن قلوبهم على بعض"
مستحيل . كفاية 17 سنة صلاة من غير حاجة . و سواء ربنا حنن قلوبهم او لأ دى حاجة ليهم مش ليا انا
اولا متياسيش من الصلاة ابدا وتاكدى ان ربنا سامع كل صلاتك والنتيجة هتشوفيها بس طولى بالك
ومتقوليش ان دى حاجة ترجعلهم هما لا وترجعلك انتى كمان انتى كل متاعبك بسبب خلافاتهم وعدم الاستقرار
و: "ومتقوليش ماما بتكرهنى دى خالص مفيش ام بتكرة بنتها ابدا والكلام بيتقال فى ساعة غضب معلش"
اسمحيلى . فى امهات كتار بجد بيكرهوا اولادهم .. مش هاقول زى فلانة و فلانة بس انا مجربة و عارفة .. مستحيل تكون بتحبنى بالشكل اللى انتى متخيلاه
ولو ان مش مقتنعة بان فى امهات تكرة اولادها بس حتى لو فرضنا على اسوا فرض ان دة صحيح انتى قدمى الحب وصدقينى هتحصدى بردوا الحب ولو منهم من غيرهم ربنا هيعوضك ويرجعلك ثمر عملك صدقينى حتى لو بعد سنين
و: "ربما تكون مضغوطة من الاختلافات مع بابا اعذريها جربى تقربى منها انتى وتكونى حنينة عليها وتعوضيها طبطبى عليها وعرفيها انك حاسة بيها"
تقريبا انا من اصحاب ماما بس هى مش صاحبتى . هى بتشكيلى عن همومها و مشاكلها فى الشغل و مصاريف البيت و كل الحاجات دى . و بجد بتحبنى جدا لما بتكون تعبانة و انا بكون قاعدة معاها . بس اول ما بتخف مش بشوف منها اى حاجة من حنية المرض
طيب يا قمر كويس خالص حلو اوى يعنى انتى مش ماشية فى طريق مسدود ولا حاجة ماما صحبتك وفى بينكم كلام وبتشتكليك وتحكى لك ودة فى حد ذاتة مكسب حلو وبداية حلوة نميها انتى بقى بشطارتك ومحبتك وحنانك ورقتك ونعمة ربنا اللى فيكى تاجرى فى القليل هتربحى منة كتير بس اتعبى شوية وتعالى على نفسك شوية
و: " وياريت ياااريت بلاش صداقات النت فى سنك دة ارجوكى متدخليش فى حوار مع حد اوى وتثقى الثقة العمياء وتحكى تفاصيل حياتك وتشكى لاى حد متاعبك انتى متعرفهوش"
محصلش اساسا انى وثقت فى اى حد . تقريبا ببقى خايفة من الاستغلال .. مع ان كل اللى حواليا بيستغلونى بس ببقى مش عايزة حد تانى يستغلنى
كويس اوى برافوا عليكى انا مبسوطة انى بسمع منك الكلام ددة حقيقى خليكى على مبداءك دة وفى مثل بيقول لو انتى مقدرتيش تشيلى سرك غيرك مش هيشهولك
و: "حاولى تقربى من ربنا بجدية وامانة وارتمى فى احضانة واتكلمى معاة علشان تلاقى فية الشبع والراحة"
صدقينى انا بعتبره بابايا و صاحبى بس لما بلاقى كل اللى حواليا بيلجأولى انا عشان اخفف عنهم و انا مش لاقية حد يخفف عنى ده بيتعبنى قوى
اعتقد انى دى مبالغة منك شوية ودة لانك رقيقة وحساسة زيادة شوية
عزيزتى اللى بيدى بياخد اللى بيزع بيحصد اكييييد بس انتى اللى من التعب والضباب مش شايفة كويس معلش دى فترة وتعدى
و: "و انتبهى لدراستك اوعى تضيعى مستقبلك تحت اى ظروف مش هتسامحى نفسك ابدا لما تكبرى شهادتك ودراستك وعلمك هيخففوا عنك كتير"
تفتكرى ؟ انا مش حاسة انه فى مستقبل اصلا عشان يضيع
انتى مش حاسة علشان مدية فرصة للزعل والمشاكل الاسرية تاخد اكثر من حقها فى حياتك حاولى تصفى وانتى هتشوفى الصورة صح وبصورة اوضح
و: "اسفة على التطويل"

يا حبيبتى و انا لاقية حد يكلمنى اساسا ؟

و شكرا ليكم كلكم تانى
ربنا يعوضكم[/QUOTE]

ربنا معاكى واحنا كلنا هنا اخواتك وبنحبك وتحت امرك فى اى وقت
ربنا يفرحك يا قمر يارب