انا اتعرفت على واحد قريبى على النت بس ماكنتش اعرفه خالص قبل كده,وبعدها اتعرفنا واحدة واحدة وكان اول واحد اكلمه فى حياتى سواء فى الحقيقة او على النت وكنا بنتكلم عن ربنا وعن مواضيع روحية كتيرة وعجبنى كلامه عن ربنا وانه بيروح الكنيسة وكنا متفقين اننا اخوات وبسسس,لكن واحدة واحدة اعجبت بشخصيته اللى على النت وجه طلب ايدى بعد كده ووافقت مع العلم هو اقل منى فى الشهادة وفى المستوى المادى بس قلت المهم انه بتاع ربنا وكان والدى معترض لكنى اتحايلت عليه لحد اما وافق بالخطوبة,بعد كده بدأ يقوللى ابعد عن كل الناس وما اتكلمش مع اى حد خالص سواء قريب او غريب وكل ده بحجة انه بيغير عليا لحد اما شخصيتى اتعدمت وبقيت بقول حاضر وبس وكانت نفسيتى تحت الصفر لانى انعزلت عن المجتمع كله بعد كده بدأ يحكيلى عن حاجات فى الجواز ماكنتش اعرفها والكلام اللى قالهولى واللى ارغمنى للاسف انه سورى يشرحلى بالتفصيل حصلت لى حالة نفسية سيئة جدااااااا وكنت بأبكى باستمرار لمدة شهر ,وكمان هرموناتى كلها اتلخبطت كل ده كان بسبب الكلام والافعال اللى هوة عرفهانى بعدها طلبت منه اننا نتوب لكن كان يبكى لى بدموع وجسمه كله يرتعش قدامى ويقوللى محتاج لك ومش قادر ابعد عنك,كان يصعب عليا واوافق علشان بحبه وخايفة عليه لكن عمرى ما كنت عايزة اعمل حاجة زى دى وكنت بعدها اقعد اعيط واجى على نفسى علشان ارضيه مع انى كنت باتعب انا بعدها,بعد كده كان بدا انه يهينى وقررت افك خطوبتى لكنه كان يرجع ويتاسف ويبكى لى ويوعدنى انه معدش يعمل كده تانى,بعد كده اسلوبه معايا اتغير ولاقيته اكتر من مرة بيكدب واعرف كده واواجهه وكان يتحجج باى حاجة او بانه نسى انه يقوللى,المهم انه بدأ ألفاظه كلها بقت صعبة جدااا وعرفت انه يعرف عليا بنات كتيير وانه كداب وانه ماكنش بيحبنى,وزاد فى اهانته ليا وعصبيته عليا لما منعت نفسى عنه ومعدتش باسمع كلامه فى الشر اللى كان عايزنى اعمله,قام بعدت عنى خالص علشان ما باوافقهوش على هوة عايزه وروحت لاب اعترافى وحكيت له وقاللى تفكى خطوبتك حالا وصلى لماما العدرا وصليت لها فعلا واشكرها جدااااا وحسيت براحة بعد اما قلعت دبلته زى ما تكون كانت طوق وملفوف حوالين راقبتى وربنا كسرهولى,علشان كده عرفت اد يه ربنا بيحبنى وانه ماسبنيش ووقف جنبى ونجانى من ايد شخص زى ده,وبعدها اعترفت لماما بكل حاجة مرة فى مرة وفى اللى ارغمنى انى اعمله,عارفة انه صعب عليها بس هى فى الحقيقة حبها كان اقوى وقالت لى خلاص صفحة وانسيها وارمى كل ده وراكى والمهم انك تبقى صديقتى وتتعلمى من اللى فات,فى الحقيقة انا حبيته واخلصت له وهو ضحى بيا وخانى وضحك عليا لانه لو كان بيحبنى كان هايخاف عليا من التعذيب اللى كان بيعذبهولى ده لكن الحمد لله انا باشكر ربنا انه واقف جنبى وحاسة بايديه وهى بتحضنى ونفسى ما سيبشى ايديه تانى ابداااااا,انا كنت ميته بجد وربنا احيانى اشكرك يابابا يسوع واشكرك ياماما العدرا,انا اسفة انى طولت عليكم بس حبيت اخرج اللى جوايا علشان اقدر ارميه,ساعدونى بارائكم وقلولى رايكم وهل انا كده مصيرى ايه؟؟؟
وكمان اعمل ايه لو الشيطان حاربنى بافكار وحشة ويخلينى افكر في خطيبى من تانى؟؟؟؟؟ولو شوفته بالصدفة اعمل ايه؟,اشكركم بس بجد محتاجة لاجابة لاسئلة كتيرة جوايا,من فضلكم تردوا عليا وتساعدونى