ثورة غضب
ثورة غضب فى كل واحد مننا
كفاية تعب هو أيه كان ذنبنا
مين السبب حد ينطق يقولنا
هو انكتب كل سنه حزننا ..
ثورة غضب فى كل واحد مننا
من غير كلام أنيننا يحكى عننا
أصلك جبان ياللى انت فاكر قاتلتنا
لو قوتك كانت سلاحك
احنا الموت مش بيهمنا ..
لو فاهم بموتنا أنك بتخدم ربنا
تبقى غلطان ده بغباءك بتوصلنا للسما
بص بعنيك أصغر طفلة متألمة
بتقولك كمان داحنا أبونا ربنا..
ثورة غضب فى كل واحد مننا
كفاية حرام مش عايزين غير حقنا
جوه الكنيسة يوم الميلاد يوم فرحنا
يبقى سواد تغرق كنيستنا من دمنا ..
ثورة غضب فى كل واحد مننا
الضربة جامدة كسرت فينا ضهرنا
الضربة صعبه مين يتحمل حزننا
الضربة صدمة غدرت بأغلى ماعندنا ..
يادموع كفايه فى رب يدافع عننا
يادموع كفايه فى رب شايف ظلمنا
يادموع كفايه يسوع بنفسهُ قالنا
فى العالم سيكون لكم ضيق لكن ثقوا انا قد غلبت العالم
.........................................
من النهاردة هاتكونى شاهده
من السنادى ولكل السنين
بقوا على أسمك زيك
يا كنيسة القديسين
كل اللى ماتوا عندك .. بالدم على حيطانك أساميهم
بقوا شهداء وفى مجدك .. يوماتى هانتشفع بيهم
ياكنيستى هاتكونى قويه .. وعزاءنا هايكون فى وجودك
فى الارض هاتتقطع اجسادنا .. وفى السما هايطيبها يسوعك
ولا اى كلام قادر يعبر عن الوجع والألم والحزن والغضب اللى جوانا
كل اعيننا وقلوبنا ودموعنا نحوك يا يسوع
عزى كل حزين
اشفى كل جريح
نيح كل منتقل
أحضر فاللى جاى واحفظ كنيستك وشعبك
ملناش غيرك يا يسوع
ملناش غيرك يا يسوع