مكانك ثابت ومكاني بيتغير
انت انت اليوم والامس وبكره
وانا اللي كل يوم بحال ومكان
مره اقرب ومره ابعد
وبرده انت لسه بترعاني وعينك عليا ماهو انت انت اليوم والامس وبكره
اقولك قرب وخدني اليك
وانا اللي ببعد عنك ومش بقرب ليك
مره اسمعك واصلي لك
ومره انفر منك وماتكلمش معاك
وبرده لسه صابر عليا ماهو انت انت اليوم والامس وبكره
مره ارجعلك واتوب اليك
ومره ابعد عنك واسيب ايديك
وبرده لسه خايف عليا وبتناديني ماهو انت انت اليوم وامس وبكره
مره افرح بيك وروحك تملاني
ومره احزنك واقول انك بتنساني
وبرده لسه بتقولي انا عايزك ماهو انت انت اليوم والامس وبكره
مره اقولك لتكن مشيئتك
ومره الومك لو وضحت لي ارادتك
وبرده لسه بتقولي كله خير لخلاصك ماهو انت انت اليوم والامس وبكره
ماهو انت ثابت وانا اللي ببعد وبتغير
ولكني بفتري عليك واقول انك بعيد عني وسايبني
رغم ان ايديك ماسكله ايديا وعنيك دايما عليا
وبرجع تاني وقولك بعيد
فسامحني وعلمني ارجع اليك
وعلمني دايما ايديا ابدا ماتسبش ايديك