دعوة للفرح
مرة اثنين متزوجين ذهبا لأب كاهن وهما ناويين على الطلاق ... ومعندهمش استعداد يتصالحوا...
فكر الأب الكاهن في فكرة حلوة خالص... قالهم كل واحد فيكم يحاول يجيب أكبر عدد من الصفات الحلوة في شريكه... واللي هايقدر يجيب عدد أكبر هو اللي هياخد القرار بخصوص موضوع الطلاق ده... 
طبعاً كل منهم حاول يطلع أكبر عدد... وفعلاً شافوا الإثنين في بعض صفات حلوة كتير قوي خلتهم يرجعوا يحبوا بعض تاني ويمكن أكتر من الأول...
لازم نصدق ان مافيش حد ربنا خلقة كامل الجمال او كامل الشر ... الموضوع محتاج تدريبنا احنا على اننا نحاول نركز على الحاجات الحلوة... الصفات الحلوة ... مش بس في الناس، كمان في الأحداث اليومية العادية... كتير مننا بيفضل الشكوى والنقد السلبي والتذمر على العيشة واللي عايشينها.... وغالباً ما يلقى التأييد من قبل اللي بيسمع... ليه منحاولش ندور على الحلو ونفرح بالحياة والحاجات الجميلة اللي فيها؟؟؟
ربنا خلق الدنيا جميلة... ووهبنا كل شيء بغنى للتمتع... عايزنا نتمتع ونفرح
لو مصمم تفضل حزين وشايل الهم فأنت كاسر وصية.... ربنا وصانا نفرح وعمل كل حاجة تفرحك
خسارة تعيش حزين وكاره اخواتك وزمايلك وتركز على الوحش اللي فيهم وتصدق ان الدنيا مافيهاش حاجة تفرح... بجد ربنا حلو وخلق حاجات كتيرة حلوة
ربنا يفرح قلوبكم جميعاً