انا مراهق ايوة مراهق لكن مين هو المراهق انا مين؟ انا شخص بيحلم.. بيحلم ببكرة.. بيحلم بالمستقبل.. بيحلم ومفيش لحلمه حدود.. بيحلم ببكرة المرتاح.. الحياة السهلة.. الحياة الحلوة.. الدنيا البسيطة.. ونزلت الشارع ويا ريتني ما نزلت الشارع لقيت في الشارع اللي مكنش نفسي اشوفه في أي يوم من الايام لقيت في الشارع الحاجة اللي مش ممكن تتغير ايوة لقيت في الشارع ما يسمى بارض الواقع الصدمة اللي بجد وحسيت بعد ما كنت طاير في فضاء الاحلام مرة واحدة خبطت في ارض الواقع دورت في الشارع لقيت بكرة ضلمة لقيت احلامي هي مجرد احلام فكرت اقرا الجرايد ويا ريتني ما فتحتها ولا فكرت فيها انا فتحتها علشان اشوف حظك اليوم قلت يمكن اقدر اكمل في الاحلام والاوهام بتاعتي لكن برضه لقيت واقع ارض الواقع بكرة الضلمة الاسعار اللي بتغلى.. الازمات في الاكل والشرب والبنزين قلت وانا مالي بده كله انا شاب عايز اعيش حياتي ايه اللي دخلني في الازمات والمشاكل والسياسة والحكومة فتحت التلفزيون قلت اتفرج على ممثل كوميدي يضحكني او اتفرج على شيء خيالي يخليني اكمل في عالم الخيال بتاع بكرة الجميل الرائع لقيت الحروب والمجاعات والازمات وغيره وغيره معرفتش اعمل ايه؟.. ايه؟ مفيش حل خلاص.. قفلت لو الوضع على كدة يبقى انا عايش النهاردة ليه مدام بكرة اسود وضلمة وكحل فكرت وافتكرت.. افتكرت الكنيسة وافتكرت اني دايما بالاقي الحل عند ربنا دخلت الكنيسة ويا ريتني ما دخلتها بصيت حوالي شفت المؤمنين لكن شفت المنافقين اكتر من المؤمنين شفت اللي بيحب فلوسه وشفت اللي واخد الايمان مركز في كنيسة لانه مش لاقي المركز في العالم شفت اللي عايز يرضي الناس وبيقول أي كلام علشان الناس تصقفله ويقولوله برافو قلت وماله سيبك يا شاب يا روش من الاخوة الكبار دول وخليك في المؤمنين الصغيرين وبصيت ولقيت.. لقيت المهتم بشعره ولبسه واخر موضة.. واللي مهتم بالكورة و الاهلي والزمالك وريال مدريد وبرشلونة.. معرفتش اعمل ايه؟ هي مجموعة المؤمنين اللي هلاقي الحل فيها.. رجعت البيت بصيت في البيت بابا وماما مش فاضيين واخواتي مش سالين معرفتش اعمل ايه للمرة للاخيرة وساعتها بس حسيت ان في دايرة مقفولة حسيت اني مش عايز اعيش لو هو ده بكرة وضاعت كل احلامي بالاصطدام بارض الواقع طب لو فعلا هو ده النهاردة وهو ده بكرة انا هاعيش لايه ولمين لو كل احلامي بتطصدم بالواقع وبتضيع يبقى احلم ليه ولو مفيش حلم يبقى مفيش امل ومفيش هدف ولو مفيبش هدف يبقى مفيش أي معنى لحياتي
م ن ق و ل