رد: مشكلتى مشكلة عاوزة الحل ارجوكم
كُتب : [ 02-20-2010
- 07:50 PM
]
أزيك الأول
أولا واضح أنك محملة نفسك أكتر من اللازم . على فكرة أغلب البيوت فيها مشاكل و زعيق بصوت عالى دلوقتى و الناس معذورة عشان ضيق الحال و ضيق الوقت .
هو الى انت بتقوليه ده مش أكتئاب هو بس ضيق و ملل و انت مش مستحملة اكتر من كدة
لو عاوزة تحلى مشكلتك و هى انك مش مستحملة يبقى لازم تحاولى تهدى باباكى و مامتك و ده ازاى:
1- صلى أوى عشان ربنا أكيد يقدر يحل المشاكل المتكررة بينهم
2- ممكن تتكلمى مع باباكى فى جلسة فردية كدة يعنى ممكن تعزميه مرة على شاى برة البيت أو حتى فى البلكونة و تشرحيله أد أيه انت متأذية من مشاكله مع مامتك و تطلبى منه انه يستحمل عشان خاطرك انت
3- لو كان ليك طريقة تطلبى من احد الكهنة انه يزوركم فى البيت كل شهر حتى مرة و كأنه افتقاد عادى يعنى مش جاى عشان المشاكل يكون هايل لأن زيارات الكهنة المتكررة بيكون معاها سلام عجيب فى البيوت ربنا بيديه للناس
4- حاولى تكررى قعدتك مع باباكى لوحدكم و تسمعيه كويس و اديله فرصة يحكى لك عن كل الحاجات اللى بتغيظه و حسسيه انك فاهماه أوى و أنك مقدرة كل اللى هو فيه و مش تنتقضيه كل شوية
و بالطبع ده مع مامتك برضوا
5- حاولى تخلى البيت مريح أوى لما يكون باباكى موجود يعنى نضيف و لما ياكل قدميله الأكل بطريقة فندقية كدة تفتح النفس و حضريله سرير مريح و نوم فى هدوء و حاولى تخلى الألوان الفرش و المفارش فاتحة و هادية
6- مفيش مانع انك تشجعى باباكى و مامتك بمكافئات كل ما كانو هادئين و مش بيتخانقو
يعنى بطريقة لطيفة كدة تديهم كل واحد وردة بسيطة فى يوم او شيكولاتة و تقوليلهم ده عشان انتو حلوين و مش بتتخانقو
بصراحة ربنا معاكى أنا شخصيا حاسس أوى بالخنقة اللى انت فيها بس انا واثق انك طالما كتبتى عن مشكلتك انك هاتعرفى تخطيها ان شاء الله
|