[رويس]

كام حاجة علي السريع كده قبل ما اكتب ردي

المشاركة الأصلية كتبت بواسطة zaza2006 باب الهيكل مكتوب لوحة مكتوب عليها ممنوع دخول الهيكل بالميكب والنص كوم واللبس الضيق

لبس ضيق انا معاكي فيه انه مينفعش وكمان مكياج لما يكون تبرج
ولكن معلش ايه المشكلة في النص كوم ؟ هما مثلاً بيكونوا راسمين علي دراعاتهم حاجات مش كويسة علشان كده لازم يلبسوا بكوم ؟

المشاركة الأصلية كتبت بواسطة emmmy بس مع احترامى الشديد لكل الاباء لازم يتعاملوا مع الموضوع بجدية شوية وحزم شوية ويكون معاهم الحب والحنان والابوة يعنى مش شدة وبس لكن لو البنت بتحب ابونا وبتعتبرة اب ليها فعلا وبتحترم كلامة وروحياتة وهو مديها القدوة من بيتة وزوجتة وبناتة واقربائة هتسمع كلامة بسهولة لانة بينفذ الكلام دة على نفسة اولا وبيتة بصفة عامة

وانا ليه قدوتي تبقي أبونا ومتبقاش أمي وابويا ؟ الوكسة الكبيرة يا ايمي مش في ابونا ولكن الوكسة الكبيرة في البية الصعيدي ابو دم حامي واللي شنبه واخد نص وشة وينزل بنته باللبس الفلاني !!! الراجل ده نسمية ايه ؟؟؟ والام اللي فاكرة ان البنت بكده تتجوز بسرعة وتخلف في عيال واصرف يا حكومة هههه
الاب والام لو بيعرفوا يربوا صح ومش الاب طول اليوم في الشغل وبعدين يرجع ينام والام قدام المسلسلات هتلاقي البنت والولد طلعوا تمام التمام.

المشاركة الأصلية كتبت بواسطة emmmy بس الاول يبدوا من بيوتهم علشان منلقيش رد سريع

زى ما قلتى ويردوا علينا بنت ابونا بتلبس ومرات ابنة وبنت اخوة والخ
صح كده ودور البيت يمثل 95%.

ورد الاخت ريم الخوري رقم 28 تقريباً بيلم كل الكلام اللي المفروض يتعلم وهو ده فعلاً الكلام الأصح

المشاركة الأصلية كتبت بواسطة ريم الخوري وهو بالسوق لقي وحدة من ايهاهم متعرية يعين عارفهام ...المهم بصالها وميش شايفة اني راهب قدامك تسببيلى عثرة قالته انا ببص ليك لاني من ضلعك اخذت بس انت حقك تبص على التراب لان من التراب والى الترب تعود

ده كان الانبا مقاريوس الكبير وهو بيلقي عظة وكانت في الصف الاول واحده ست وكانت عينها في عينه طول ما هو بيتكلم ولما قالها الا تستحي مني قالت له انا من ضلعك خلقت علشان كده ببصلك وانت من التراب يبقي تبص له، ولما سمع كده ساب المكان وهرب.


________________________________
ياتري وأخبار الشاب الخادم اللي بيدخل الكنيسه وهو شعرة واقف من الجيل ورافع التي شيرت لفوق ومسقط البنطلون لتحت ولابس صندل وفوقية شراب صوابع ... دا انا اعمل فيه ايه ؟
لو أحنا يا مجدي خدنا الموضوع بالطريقة العربية او الشرقية (الاسلامية) اي بعني أوضح من النظرة الذكورية يبقي مش هانوصل لحل وحتي لو لبست البنات خيمة برضوا هانرجع ونقول بتثبب عثرة.
بداية عاوز أقول حاجة وهي أن البنت الحلوة سواء في مصر او امريكا او روسيا او حتي جنوب افريقا والهند ... بتتعاكس، بالنت الحلوة بتتعاكس في اي مكان.
- نيجي بقي للمهم علشان الموضوع اللي أحنا بنتكلم فيه من ناحية العثرة فهو بنسبه 80% ملهوش علاقة تماماً باللبس والدليل هو ان أكبر نسبة تحرش جنسي هي من بنات المدارس، اللي هي البنت بتبقي لابسه حاجات بكم ومريله طويلة جداً وجزمة عادية وبتبقي ململه شعرها ومن غير مكياج !! ياتري دي بيتم التحرش بيها ليه ؟
- انا لازم أحرر تفكيري شوية ومش كل ما اشوف واحده معرية حته من دراعها اقول ان لبسها وحش، مهو مجتبش واحد في عز الحر والكنيسة بتبقي أمم والنفس بيبقي بصعوبة وتطلب منها تلبس بلوفر والحاجات دي !، كمان انا ليه نظرتي للجنس الاخر نظرة جنيسة بحتة ؟ ، ولو قولتلي نظرتي مش جنيسة هارد عليك بكل بساطة أذن فين العثرة بقي ؟ اذا كانت نظرتك ليها عادية سواء لبست كده او كده يبقي انت مش هاتفرق معاك ولكن علشان احنا شغالين نبحلق في البنات وعنينا علي باب الكنيسة بنرصد بيها كل بنت داخلة من فوق لتحت فبيحصلنا الكلام ده.
كمان استاذي الغالي انا بشوف مناظر في الولاد تكسف، الاقي البيه اللي بيتكلم عن البنات ولبسها داخلي الكنيسة وتقريباً قبل ما ينزل من البيت حط صوباعة في كوبس الكهربة علشان شعر جسمه كله يقف وعلبة السجاير في جيبة ومسقط البنطلون والاقيه داخلي بصوته الشبه رجالي ويكلمني عن البنات ولبسهم .... هزلت !
- الكنيسة مكان صلاة وانا لما ادخل الكنيسة المفروض كل هدفي وعنيا هي ناحية الهيكل وتفكيري وعقلي ناحية الله، ولا ليا دعوة بنفلانه لابسه ايه ولا فلان عامل ايه ... وانا ايه دخلي اساساً بيهم ؟ انا داخل احضر القداس واتقابل مع ربنا ويحصل بيني وبينه شركة حقيقية ومليش دخل باي جنس مخلوق تاني حتي لو كان ابونا نفسه.
- نقول بقي كام ملحوظة من رائي الشخصي علشان ميبقاش احنا ملناش دور ولكن فقط لازم نحدد الادوار ونحط كل واحد في مكانه الصحيح بصلاحياتة الصحيحة، اذا كنت حضرتك من الفئة اللي هي مش مسؤله في الكنيسه عن خدمه تخص الكلام اللي احنا بنناقشه يبقي مليش الحق اني اقول كذا او كذا لان المفترض ان كل علاقتي هاتبقي بربنا ومليش دخل باللي حوليا.
لو انا خادم واسرتي فيها بنت او ولد لابس لبس بطريقة غريبة عن الحدود العامة المتعارف عليها تحت كلمة الحشمة، يبقي اخده علي جنب (أكرر علي جنب وبدون ما يشوفنا حد او يسمعنا حد) وهايكون كلامي ليه او ليها في أطار النصيحة فقط لا غير ولا يمكن ان يكون في أطار الامر، بل واول كلامي ليه يكون بمدحة وبعد كده اقولة علي النصيحة علشان يتقبلها مني ولا يتحول الموضوع لشئ من الشخصنه.
لو انا بقي الكاهن المسؤل عن هذا الشعب بصفة أعم من الخادم يبقي علي ما أظن وده انا شوفته في بعض الكنهة انه بيعمل علي سبيل المثال ان لما واحدة تيجي تتقدم للتناول ومش حاطة حاجة علي شعرها يروح ينادي علي تاسوني ويقولها اديها ايشارب لو سمحتي، ولو شاب داخل يتناول وهو بيوطي ياخد الجسد او الدم ولمح في جيب قميصة علبة السجاير يقوله هات علبه السجاير دي واديها للسماش الفلاني (ده كان مثال مسبط علي ايشارب وعلبة سجاير) ، وطبعاً كلنا عارفين بالبابا كيرلس انه مكنش يحب يشوف واحده بتتناول او في الكنيسة غير محتشمه (لابسه قصير) او متبرجة ، وفي بعض الكهنة لما بيشوف واحده زي كده بيقولها ياريت المرة اللي جاية تعملي كذا او كذا ... اياً كان ما سيفعلة الاب الكاهن فأنا برضوا كخادم او غير خادم مليش دخل باللي هايقولة.
- مسؤلية البيت بقي ودي أهم حاجة، دي بصراحة بيدخل فيها حاجات كتير هاقول منهم أتنين وهما الاول التربية ومدي قدرة الاباء علي أقناع اولادهم من صغرهم ان اللبس الفلاني يليق بينا او لا يليق بينا، الحاجة الثانية وهي رقابة البيت علي التيليفزيون او الكمبيوتر او الاصحاب ... مهو مقعدش انا اقول لبنتي اللبس ده قصير وان اللي بيبلس كده يبقي مش كويس ووو، وافتح التيليفزيون الاقي الممثل الفلانية او المذيعة الفلانية اللي هو بنتي بتحبة وشايفاها مثلها الاعلي تكون لابسة الحاجات اللي انت بتقول عليها ان اللي بيبقي لابسها ده مش كويس ! يبقي انا عملت ايه بقي ؟
هايبقي قدامي النموذج اللي هو ناجع في شغله وشيك في لبسه ولبق في كلامه ومتفوق في مجاله ... اللي هو انت بكل بساطة بتقولي انه مش كويس، طبعاً مش هاصدقك .. وقيس المبدأ علي الباقي سواء اصدقائي او غيرهم.

الخلاصة :
انا مليش دخل باللي لابس او قالع
لازم ابص للولاد برضوا ومينفعش اعمل تأنيث للموضوع
دوري انا ومدي صلاحياتي
دور البيت

طبعاً في كلام كتير اوي اوي ممكن اثبته لان انا واجهت المشكلة دي في بدايات خدمتي ولكن كنت وقتها بصيت علي الجانبين، وساعتها روحت عملت دراسة عن التحرش الجنسي وصعقت ان الموضوع ملهوش علاقة ابداً ابداً باللبس ولكن ليه علاقة بمدي الحرومات الدينية وليس الحرومات الجنيسة او البطالة ( طبعاً الموضوع طووويل) وعرفت فعلاً ان البنات ملهاش دخل ومن حق البنت تبقي شيك ولابسه أنيق وانها تبقي فعلاً مثال للجمال وليس مثل آخرين البسها جلابية واغطي وشها وألبسها اسود واخليهم ماشيين زي خيال المآته في الشارع.

المشكلة مش ان الموضوع جرئ او الكلام ده لان الموضوع اتقال في كل مكان وبأكتر من طريقة حتي جوا الكنايس ولكن الفكرة ان الموضوعات اللي زي دي بتبقي طرح مشكلة من جانب واحد وبنظرة واحادية وبالتالي الردود بتبقي من نفس النوع، علشان كده هتلاقي غالبية الردود علي سبيل المثال في الموضوع هنا بتناقش المووضع من جهة البنات ولبسهم وكل تفكيرنا ان اللي بتعمل كده دي مش محترمة او متنفعش تبقي خادمة والحاجات دي ... طلب ليه نحصر الموضوع في حاجة واحدة فقط من غير ما ناخدة من كل جوانبة ؟!!