رد: تعبت
كُتب : [ 01-15-2011
- 08:21 PM
]
حبيبة قلب ربي يسوع وبنته المحبوبه جدا ليه واللي بيحبها مخصوص سلامه ليكي ومعاكي اقبلي مني اشاركك في تعبك بأبسط حاجه اقدر اقدمها وهي احد تأملاتي كتبته وانا في حاله زي حالتك كدا بالظبط انا عاوزك تفهمي ان مش شرط يبعتلك الرد زي مابعته ليا لأن طرقه كتيره محدش يحصيها بس دوري على الرسالة دي وصلتلك ازاي واسف جدا على تأخير الرد
وده التأمل
₪ωφتـأمـلاتφω₪ للأبصالتس: مينا فـرج التأمل الحادي عشر بعنوان ₪ فاكر ومش ناسي ₪
كتبته بتاريخ ١٦/٥/٢٠١٠
بدأته الساعة التاسعة صباحا واكملته الخامسة مساء
رغم اتهامي ليك بالقسوة وانك ناسيني ورغم شدة معاناتي ومكانش الشيطان راحمني كان بيعذبني حتى في نومي. ورغم شدة يأسي اللي خلاني سميت نفسي ابن الحزن واقول على نفسي اتكتب على حياتي الحزن طول عمري. رغم العذاب النفسي الرهيب لدرجة سميت نفسي ابن الهلاك كمان. ونسيت اني ابنك لأني نسيت تدبيرك والتسليم الكامل لإرادتك... رغم دا كله بس يارب انت منستنيش بعتلي اصحابي رغم غيابهم كتير وحكولي. في ودني وفكروني. بأنك ابويا مش سجاني. فكروني بنزولك تتألم عشاني. فكروني بصلبك وجروحك ودمك الحاني. فكروني بصعوبات اكتر واجهوها اصعب من صعوبات حياتي .... فكروني اشكرك ... فكروني بحنانك. وانك عمرك ما اتخليت عني. وكانت البداية ...
فكروني بهروبي منك. فكروني بالصلاة والتضرع. فكروني التجأ ليك. فكروني بكتابك وكلامك وتعزياتك. نسوني نفسي وجريي ورا اشباعها. وجريي ورا الحنان والحب مع ان انت منبعها. دورت ع الشبع وانت اللي بتقوت الخليقة كلها من فضلك ونعمتك تشبعها.
ياه قسيت عليك وظلمتك اوي يارب. وانت دايما عطوف ورحيم عليا. حتى التجارب بتبعتها لأنك رحوم وعارف بضعفي. عارف بكبريائي وغطرستي. فتكسره كل فترة علشان ما اقعش واتحرم منك. زي ماكسرت بولس بشوكة في جسده. علشان يحس بقوتك تكمل وتظهر في ضعفه. ولا يغر من كثرة الأعلانات والمعجزات والفلسفة والعلم التي اعطيته اياهم.
ليتك تكسر فيا اكثر لأمتلأ بقوتك في ضعفي.
ايوا يارب دلوقتي بطلب الأنكسار والذل والتعب والشقاء. بجد بطلبهم بكل اشتياق. علشان عرفت قيمتهم اما قوتك اتمجدت وظهرت في ضعفي وانقذتني من خطايا كتير عايش فيها برياء. اولها الأنا والأحساس بالنفس وانا اصلا تراب اخره فناء.
بس تيجي في ضعفي تقولي: "انا ساكن جواك. ايوا انت مجهزتليش مكان اسند رأسي فيه واستريح؛ لأ وطاردتني وطردتني. بس انا قاعد على قلبك ياواد. دا انا بحبك. دا انت ابني اللي مخلفتوش. دا انت حبيبي اللي خصصتلك نفسي وبقيت الأب المخصوص. اللي تقوله ابويا في اي وقت ميكسفكش ولا يردك ابدا فارغ.
اما طلبتك لقيت تعزيتك وصلتني بعد دقائق وانا بمسح دمعتي اللي نزلت على خدي وانا قاعد وسط الناس في العربية. رسالتك وصلت بسرعة وكانت الرسالة عبارة عن عربية نقل ومكتوب عليها رسالتك. بتطمني وتقولي انت مش لوحدك. وكانت الرسالة بتقول: " طريق السلامة ربنا موجود يامينا ". بنفس الحرف وبتناديني بأسمي. اتعزيت واستريحت. بس الألم لسه بيطاردني. ومشاعري مابردتش. تبرد ازاي وانا بشري لسه في الجسد. اطلقني وحررني من الجسد. لأرى جمال مجدك. اكشف عن اعين الغلام ليرى عجائبك. لينسى الامه ويرتفع فوق ضعف الجسد. ليشعر بقوة وجمال الروح وياك. اهلني لأكون هيكلك. راحتك ومسكنك. يكونوا هناك. جوا في قلبي جوا في عقلي جوا في كياني استرشد بنور مجد بهائك.
|