مؤتَمَر الفِيران
فِـ مَرَه إجتَمَع الفِيران
عَلَشان يِشوفولهُم خِطَه
يِعيشوا بِيها فِـ إطمئنان
وَيَنجُوا مِنْ شَر القِطَه
إستَعِرَضوا كُل الأفكار
وَلا حِيلَه نِفِعِت بِالمَرَه
وِفِـ الخِتام قام أصغَر فار
وِقال خَلاص أنا جَتني الفِكرَه
هاتوا بِسُرعَه جَرَس رَنان
نِعَلَقُه فِـ رَقَبيتها
لَمَّا تيجيلِِنا الحِس يِبان
كُل الفِيران تِجرِي لِبيتها
الكُل سَقَفلُه بِالتَهليل
وِقالوا إنتَ مَفيش فار زَيَّك
آدِي جَرَس رَنان وِجَميل
يالا كِدَه نَفِذ رَأيَّك
سِكِت وِطال بِيه التَفكير
وِقال صَحيح مِين هَينَّفِذ
مَفيش لِزوم نِفَّكَر فِـ تَدبير
مَدام عَنْ التَنفيذ نِعِجَز
كَلِمات
ريمون سمير