ما يهمش أكون نجم ومشهور أو حد ما بين الناس مغمور
لو طنشتني وللا عرفتني إللي يهمني ما ابقاش مغرور
1- ما يهمش تكتب عني جرايد ومجلات...
أو إسمي يكون معروف مكتوب في المانشيتات
يكفيني يكون منقوش فـ إيدين رب السموات
علي كف الرب يسوع محفور
2- يا ما فيه مشاهير في الدنيا كتير وزراء رؤوساء
والناس نسيوهم أول ما إنطفِت الأضواء
وإلهنا ما بيفرقشي بين قاضي وحلاق
ومعيِّش كل ولادُه ف نور
3- قالها سليمان وده واحِد كان مشهور بصحيح
قال كل ما حاصِل وهم وباطِل قبض الريح
ومفيش منفعه غيرك يا يسوع ولا حُضن مريح
ويا بخت إللي بدمَّك مستور
4- فيه شهره تجيب المجد وشهره تجيب العار
مين فينا ما يعرفشي الهانِم زوجِة فوطيفار؟
وسدوم وعموره . .؟ لأن الرب حرقها بنار
ويهوذا الخاين المأجور
5- ذكري الصِّديق بتعيش وتدوم... دي الشهره العال
زي العدرا بتطوِّبها كل الأجيال
ياإلهي ساعدني أمجِّد إسمك بالأعمال
وأرضيك بإيماني وأعيش منصور
كلمات: رمزي بشاره
الزجل ده فعلا أكتر من رائع وبجد بيعبر على شعور جميلة جدا يمكن كلنا بنتعرض ليها لحد ما...
يارب يعجبكم