كُتب : [ 05-10-2009 - 10:20 PM ]
الجزء الخامس و يرن الكلام تاني في ودان زكي "ياويلك يا ست نعمه من زكى لما يترسم شماس" لكن المره دي اللي كان بيتكلم موش زكي .... لكن شيطان اسمه "المخادع"... اشر من كل الشياطين اللي سكنت في قلب المسكين زكى ده كان "المخادع"...صاحب "رياء" اللي عرف عنوان قلب زكى لما صاحبه "الغرور" صرخ و قال ل "رياء": "...الحقني..عاوزين يموتوني ..لو زكى راح الكنيسه و سمع له كلمه كده و اللا كده من الانجيل حاتبقي مصيبه ..كلام الانجيل لو دخل البيت .. حايملاه "تواضع " و يمكن "محبه" كمان ... و تبقي مصيبه صحيح لو دخل "الندم" .. و معاه الست هانم الحلوه اللي اسمها "التوبه"... النور حاينور.. و انا الدكتور مانع عليه النور.. و ريحة التواضع موش باطيقها .. ضرورى حاتخنق و افطس و اموت ... يرضيك اخوك يفطس و يموت... و يهدئ "رياء" "الغرور" و يقوله: "ما تخافش..انا عندى واحد صاحبي شاطر قوى في المواقف الخطيره اللي زي دي ..و هو اللي حايحل لنا المشكله دى .. و بعد اول مكالمه من "رياء" ..يدق جرس الباب.. و يدخل "المخادع" و سط ترحيب "الغرور" الحار بيه .. و التصفيق الحاد و التهليل من جميع الشياطين الحاضره .. فقد جاء البطل المنقذ ========= توقظ الام نعمه من النوم عشان تفطر و تلحق تراجع مادة العلوم لان عندها بكره امتحان اخر العام نعمه كانت شاطره جدا و هاديه و محبوبه من كل الاساتذه في المدرسه و زملائها في الفصل بدرجه مش معقوله لدرجة انها يوم ما غابت عن المدرسه لمدة يومين متتاليين عشان كان عندها انفلونزا جرس الباب و جرس التليفون مابطلوش رن و 4 من الاساتذه جم عشان يشوفوا نعمه الحبوبه و يطمنوا عليها و تقريبا البيت يومها بقي عامل زي الفصل في المدرسه من كتر زملائها اللي جم مع اخواتهم الكبار او مع امهاتهم عشان يقولوا لنعمه الف لاباس و ربنا يقدم الشفا بسرعه ..و طبعا زكى في الوقت ده كان في قمة الانهيار و بينه و بين الانتحار شعره ..لكن من كتر ما كان "المخادع" اللي جواه ممثل بارع.. كل اللي شافوه يومها بقوا يقولو له و يقولوا للام: " ياسلام ..شوفي قد ايه بيحب اخته.. و خايف عليها و زعلان انها مريضه ... ربنا يخليهم لبعض و يخليهم لامهم" " وتسال نعمه الام "هي الساعه كام دلوقتي ياماما؟؟" ..."الساعه 9 يا نعمه".. "هو زكي لسه نايم ياماما ..؟؟ صحيه هو كمان يذاكر لاحسن عنده امتحان بعد بكره" ...و تجاوب الام: " زكي صحي من بدري و راح الكنيسه.. و حايقعد بعد الكنيسه يذاكر عند واحد صاحبه .. و مش حايرجع غير الساعه 9 بالليل.. ياللا بقي الحقي قومي افطرى و ذاكرى و الدنيا هاديه.. قبل ما يرجع زكى والبيت يبقي مولد" و بعد الفطار تدخل نعمه اوضتها عشان تلحق تراجع مادة العلوم و بعد دقائق... تصرخ نعمه و هي علي وشك البكاء: " ياماما ..مش لاقيه كتاب العلوم..هو راح فين "؟؟؟؟ ======== يدخل زكى من الباب و ابتسامه غريبه علي شفتيه.. لكنه فورا يغير وجهه ..الي وجه اخر غاضب و حانق و يصرخ في نعمه المنهاره واللي عينيها ورمت من كتر البكاء : " خدى يا ستي كتاب العلوم بتاعك.. ضيعتي علي اليوم من غير فايده.. انا مش قلتلك ماتحطيش كتبك علي المكتب بتاعي.. خلليتيني اتلخبطت و انا خارج اجرى الصبح عشان الحق القداس و من غير ما اخد بالي اخدت كتاب العلوم بتاعك في ايدى بدل كتابي ده لولا صاحبي عنده كتابين.. كان اليوم ضاع من غير مااذاكر و لا كلمه و السبب اهمالك و الفوضي اللي انتي عاملاها في البيت بكتبك" ..و تدق الساعه اللي علي الحيط..... العاشره... مساءا ========== يدخل الاب من الباب وهو شايل 3 علب ملفوفين في السيلوفان. .واحده منهم هديه لنعمه .. عشان نجحت و جابت 82%.. و لولا درجة مادة العلوم .. كانت جابت 95% علي الاقل و طلعت الاولي علي المدرسه.. لكن بابا دايما عند كلمته.. و لازم يجيبلها هديه عشان نجحت العلبه الثانيه علبه صغيره و مستطيله.. هدية زكي عشان نجح في الامتحان.. و فورا يخمن زكى محتوى العلبه.. ساعة يد العلبه التالته ضخمه شويه .. و برضه يخمن زكى محتوى العلبه صح... لبس شماس .. عشان زكي اترسم شماس اول امبارح و..."ياويلك يا نعمه من زكى.... لما يترسم شماس" و نكمل الحكايه ..بكره
رد: قصة مسلسة ( حكاية شيطان صغير عنيد )