خليك فى نفسك
ميهمكش راى الناس فيك
ركز فى نفسك فى حياتك
خليك مع يسوع
قيمتك ماتاخدهاش من الناس ولا تستناها
خليك دايما عارف انك مش الافضل بين الناس ولا الوحش وسطيهم
ارجوك ارجوكى ركزوا فى حياتكوا بلاش ندخل فى حياه حد
بلاش ندخل فى شئون متهمناش
خلينا فى اللى يهم حياه كل واحد فينا حياته مع ربنا وحياته الخاصه
مش هانستفيد اى حاجه لما ندين حد مش هانستفيد اى حاجه لما نبين غلطات حد
برده مش هانستفيد اى حاجه لما نبقى احنا وبس
يسوع ملقناش كده
كلنا ولاد ربنا وكلنا بنحبه اوى
وكلنا نفسنا نرضيه بأى طريقه
يبقى نرضيه بقلوبنا
نسامح من اعماقنا نغفر نعفى
نتسابق فى محبه بعضنا بجد ومن قلبنا
كل واحد عاجبه اوى عقله وشايف ان هو بس اللى بيعرف يفكر
وهو بس اللى صح
وعلى الاساس ده بيدوس بيجرح بيتعب
مع اننا لو دورنا كويس بينا وبين بعض
هنلاقى اننا كلنا بنقول كل ليله وكل يوم اغفر لنا خطايانا كما نغفر نحن ايضا
محدش جوه شر محدش جوه ظلم
احنا ولاد ربنا وجوانا خير
بس بنبعد عنه وبنيجى على بعض
مش مكفينا العالم بره علينا احنا كمان بنزودها على نفسنا
بدل ما كل واحد يشيل عن التانى بدل ما كل واحد يحس بأخوه
لاه كل واحد بيبص لنفسه كل واحد عايز يكون فى الاول مش مهم يعدى على مين
ولا يدوس على مين حتى لو على اعز اخوات له
وناسين ناسين
ان الاولون اخرون والاخرون اولون
المحبه تتانى وترفق واحنا بنجرى على الجرح والتعب
ناسين ان السما بتفرح بخاطى واحد يتوب
واحنا بندوس على كل واحد محتاج مساعده للتوبه
مين انا ومين انت
فلتسقط الماديات
فلتسقط الحروب
فلتسقط الاغرات
يسقط الغرور
يسقط الكره
يسقط حب الذات
يسقط عدم الاحساس بالغير
اما المحبه فلاتسقط ابداً
.....
اعطنى قلبك .. تعلموا منى لانى وديع
انتم ملح الارض .. انتم نور العالم
نفكر بس فى الايات دى
نحسها نعيشها نقرب منها ونشوف هاتفرق اد ايه
...تعالى يا من احببتنى يا من ابكيتنى يا من ابغضتنى يا من كسرتنى يا من فرحتنى
فنحن فى يسوع واحد
فى قلبى محبه كبيره اوى وفى قلب كل واحد مننا ويمكن اكتر
بلاش نمنعها بلاش نقفل عليها بلاش نسجنها
مش هانستفاد اى حاجه بالعكس هانتعب اكتر هاننجى اللى بنزرعه
واحنا غير كده احنا مش كده
احنا اللى يسوع اختارنا نكون ولاده
بيسامحنا مهما غلطنا فى حقه وبيغفر مهما قاسينا عليه
يبقى احنا جبنا القساوه دى منين
جبنا عدم المحبه دى منين
دى غريبه علينا مش بتاعتنا
احنا محتاجين نطيب خاطر بعض نقف جمب بعض نشيل عن بعض
نتعلم من بعض نساعد بعض
كفايه العالم بره يبقى كمان بينا وبين بعض تعب كده
لمصلحه مين
ومين بيحب كده او عايز كده
كلنا محتاجين نصلى لبعض اوى
نقوى بعض
ربنا يدخل فى حياه كل واحد فينا
الحزين المجروح المكسور
الفرحان المبسوط الكويس
ربنا يملا حياه كل واحد فينا بسلامه الحقيقى
ويملا قلوبنا كلها بالمحبه
............
انا مش قاصد صدقونى اتكلم كده بس فى الاول والاخر انا متاكد ان كل اللى هايشوف الموضوع هايفهم قصدى ونيتى كويس
وهايعرف اد ايه محتاجين نكون ولاد ربنا او على الاقل نستحق اسمه
وسمحونى لو كلامى ضايق اى حد بس انا بكتب من غير تنسيق ولا تعديل انا بكتبه وانا فى المنتدى بكتب اللى بيجى على بالى فى وقتها مش مرتب لاى حاجه