†† منتدى ارثوذكس ††

†† منتدى ارثوذكس †† (https://orsozox.com/forums/index.php)

- القسم الادبي (https://orsozox.com/forums/forumdisplay.php?f=34)

- - هيجي يوم (https://orsozox.com/forums/showthread.php?t=60207)

وهيجي يوم
ننسى الخوف
ونستهجى من جديد الحروف..
نمسك قلم ..
نشطب كلمة الم ..
ونرسم حنطة على مرمى الشوف ..
هيجي يوم ..

وهيجي يوم ..
بريحة شهيد ..
مولود الفجر من صرخته ..
والحق العتيد ..
بلون الدم ..
وبياض جبهته ..
هيجي يوم ..

وهيجي يوم
يغسل المطر الوشوش..
ويمحى كل الرتوش ..
ويهب ريح
بقوة يزيح
عن القلوب
غبار البعد ..
هيجي يوم ..

وهيجي يوم
مزروع بالدموع ..
وجلدات يسوع ..
وصوت الحق
اللي اندلع بين الضلوع
وانفرد
جناحات وقلوع ..
وضوء شموع ..
وحضن كبير
يضم الجموع ..
هيجي يوم ..

وهيجي يوم
مولود من أحزاننا ..
وليل أيامنا ..
وألمنا ..
وإيماننا .. اللى صار
جذوة نار..
وياجليات يا جبار ..
داود مستني نهار
يهزمك بأيديه الصغار ..
هيجي يوم ..

و هيجي يوم
مسكون بالمحبة الأولى
واحساس الصدق ..
اللي كان في البدء
دفا وضل ..
واللي ضل
لابد يرجع يوم ..
هيجي يوم ..

و هيجي يوم ..
وليه ما يجيش؟؟
طول ما الحق في القلوب بيعيش
وهيعيش..
ويهزم لسان غاش ..
يهدم ولا يبنيش..
دا الحق زى البرق ..
ما ينحنيش ..
هيجي يوم

و هيجي يوم ..
يرتاح فيه الرب..
يكون يوبيل للشعب ..
و نصالح نفسنا
قبل ما نصالح بعض ..
ويحس البشر بنبض البشر ..
والحجارة اللي مكان القلب
تتبدل ثمر ..
هيجي يوم ..

ياسر يوسف

منقول

رد: هيجي يوم

شكرا لنقلك الموضوع
ربنا يباركك

رد: هيجي يوم

حقيقي وفقتِ في اختيار الموضوع
ونشكر كاتب الموضوع لأنه أجاد في التصوير والتعبير
النعمة تغمر قلبك فرح وسلام دائم لا يزول

رد: هيجي يوم

ميرسى بجد على الموضوع حلو اووى
تسلم ايدك وربنا يبارك حياتك

رد: هيجي يوم

ميرسى جدا ليكى ياميرولا
على اختيارك الرائع لموضوع رائع جدا
وكلمات فى منتهى الروعه والجمال
تسلم ايدك على زوقك الرائع فى انتقاء الموضوعات

رد: هيجي يوم

بشكركم لردكم الرائع

رد: هيجي يوم

مرسى على اختيارك الرائع بجد فى منتهى الروعة الرب يبارك حياتك

رد: هيجي يوم

انا اللى بشكرك على ردك الاكثر من رائع

رد: هيجي يوم

و هيجى يوم
يرتاح فيه الرب
يكون يوبيل للشعب
ونصالح نفسنا
قبل ما نصالح بعض
هو اليوم ده هيجى و هنعيشه هنا على الأرض و لا بس هناك فى السما؟! يا ريت حد يرد عليا