عشقتك يا بلدي [الأرشيف] - †† منتدى ارثوذكس ††

مشاهدة النسخة كاملة : عشقتك يا بلدي

مينا القمص يونان

11-25-2008, 10:57 PM

عشقتك يا بلدي
* عشقتك يا بلدي
و لما عشقت فيكي فكرت
في حلوتك و مرارك
و علطول رحت قررت
ان اكتب فيكي احلى شعر
بأحلى خط
* باعشقك يا حلوة في جمالك
و في أرفك حبي ليكي مبيتغيرش
بحب نيلك
وهرمك
وبرجك
و اثارك
و تاريخك
و حضارتك
و حبي ليكي بيكبر مبيصغرش
* بحب العتبة و حارة اليهود و ميدان الأفضل
و بحب السيدة و الحسين و الأزهر
و بحب الطاحونة و السبع كنايس اكتر و اكتر
و حبي يا حليوة دايماً بيكبر
* بحب فيكي الفخامة
و بحب فيكي الرخامة
بحب قصورك
و فيلات بشواتك
و بهواتك
و رجال أعمالك
و الناس اللي كلهم أتامة
و بحبك بكل أمانة
* بحب عم أحمد بتاع الفول
و الست أصيلة بتاعة الخضار
و ام اشرف و عم حسن الجزار
بحب الحلاق و الفرارجي و المحامي
بحب المثقف و الجاهل و الحرامي
و حبك يابلدي دايماً قدامي
* بحب نكتة تتقال على قهوة بلدي
و دخان الشيشة كاتم في صدور الخلق
و طرقعة الدومنة و سلام عم فوزي
و خناقة بين حوكشة و الواد فهمي
و حبي ليكي هو همي
* و عم شفيق بيتخانق مع الوليه مراته
علشان رغاية مبتبطلش كلام
و أهل الحارة بيتفرجوا عليهم
و الأسطى بليه مش عارف ينام
وحبي ليكي كله تمام
* و الموظفين و الروتين
و الغلابة الشحاتين
و الزبالة في الشوارع و الميادين
و هالومة الوزرا و المحافظين
و زحمة شارع عماد الدين
و حبي ليكي شئ سليم
* و بتاع البطاطا ع الكورنيش
و الحبيبه على شط النيل
و لميع الجزم بيمسح بالورنيش
جذمة عادل ابن عم جميل
و حبي ليكي شئ نبيل
* بحبك يابلدي في كل أحوالك
بحبك في أرفك و بحب جمالك

مينا القمص يونان
الأربعاء 1|10 | 2008
الساعة 4:51 مساءً

وردة حزينة

11-25-2008, 11:57 PM

بجد يامينا اسلوبك فى الكتابه جميل اوى اوى
وواضح حبك لاام الدنيا
متستنين منك اجمل الاشعار ونورت المنتدى كله يامينا

ميلاد صدقى

11-26-2008, 01:36 AM

* بحبك يابلدي في كل أحوالك
بحبك في أرفك و بحب جمالك
اهلا يا مينا واهلا بموضوعك الجامد دى
احنا كمان بنحبك لانك فعلا بتعرف تحب
اللى يحب بالشكل دى يبقى قلبة ابيض
ومين مايحبش بلدة حقيقى برافو عليك
مشروع ابنودى قادم ربنا يباركك ميدو

نبيل نصيف جرجس

11-26-2008, 01:05 PM

بجد يا مينا كلاماتك حلوة اوى ربنا يخليك لينا يا حبيب ابوك ربنا يسوع ودايما يا رب تسعدنا بمواضيعك الحلوة اللى بتفرح قلوبنا

عماد حسنى

11-28-2008, 02:18 PM

الله يا مينا موضوعك روعه بجد بجد
ربنا يحافظ عليك ويكون معاك ومنتظرين منك اجمل موضوعاتك فى المنتدى
الف شكر يا مينا

مينا القمص يونان

11-28-2008, 11:16 PM

اشكرك يا أ عماد يا شاعرنا العبقري ربنا يبارك خدمتك و صلي ليا كتير

شمعة

11-29-2008, 07:54 PM

الموظفين و الروتين
و الغلابة الشحاتين

حلوووووووووووووووووو اوى اوى
يا مينا
ومنتظرين المزيد

الناقد

11-29-2008, 09:39 PM

بحب الحلاق و الفرارجي و المحامي
بحب المثقف و الجاهل و الحرامي

اهي كلها وظايف
ههههههههههه

جميل جدا بجد
هل انت اللي مع سيدنا في الصورة
وهل انت مزيع ؟؟

M@@@NOOOO

11-29-2008, 10:13 PM

ههههههههههههههههههههه
بجد ياميناااا كلامك تحفه
وواضح اوى حبك العمييييييييييييييييق للبلد الجميله دى
ربنا يزيد حبك كمااان وتمتعناااااااااااااا بكلامك الجميل ده دايما

مينا القمص يونان

12-01-2008, 05:59 PM

أولا : أحب أشكركم يا أخوتي ( شمعة , الناقد , مانو ) على تشريفكم ليا بالرد و تعب محبتكم في قرأة الموضوع ربنا يبارككم و يبارك خدمتكم
ثانيا : أشكرك يا اخويا (ناقد) انك مانقدتنيش
ثالثاً : أيوه انا اللي مع سيدنا في الصورة و دي كانت من برنامج أسمه نقول ايه و أنا يا أستاذي لسه طالب في كلية اعلام و يعني مذيع على قدي
ربنا يبارككم
وصلوا لأجل ضعفي

مينا القمص يونان

12-01-2008, 06:02 PM

اشكركم يا اخوتي الأعزاء ( نبيل , ميلاد , ورده ) على تعبكم و تحملكم في قراءة موضوعي ربنا يبارككم ويبارك خدمتكم
صلوا لأجل ضعفي

مينا القمص يونان

12-01-2008, 10:33 PM

ممكن يا اخوتي نثبت الموضوع ده علشان لازم الناس كلها تحب البلد دي

مينا القمص يونان

12-03-2008, 09:23 PM

أنتظروا المفاجاة
بعد القصيده دي اللي عشقتك فيها البلد دي
هقولها كفاية بقى
في قصيده تانية
قريبا