المساعد الشخصي الرقمي

مشاهدة النسخة كاملة : تتجوزينى . شوفوا هى قالت له ايييه؟؟؟؟؟

keroo82
06-18-2008, 04:13 PM
حكايه كل شباب النهارده...حنشوفها في شخص(ميزو) الطالب الجامعي المتخرج من 4 سنين من صيدله السنبلاوين..و حبيبته (سمسمه), بكالوريوس هندسه قسم ( كهربه أفراح ) !



اول مره شافها فيها........
ميزو:تتجوزيني؟
سمسمه:أفندم؟
ميزو:بقولك تتجوزيني؟
سمسمه:لأ طبعا!
ميزو:ليه بقى؟
سمسمه:بصراحة كدة شكلك مش عاجبني..
ميزو:إزاي يعني؟
سمسمه:أصل أنا ليا مواصفات معينة لفارس أحلامي.
ميزو:مواصفات معينة؟..هو انتي هتتجوزي عربية؟
*****



و بعدها بسنه....
ميزو:تتجوزيني ؟
سمسمه:إيه ده؟ شكلك اتغير!
ميزو:إيه رأيك ؟
سمسمه:حلو النيو لوك ده..شعرك بقة ناعم!
ميزو:دي باروكه
سمسمه:ودي عدسات خضراء ؟
ميزو:أيوة
سمسمه:بس بجد .. بقيت وسيم .. بقيت شبه نيكولاس كيج !
ميزو:مين بنكرياس كيج ده ؟
سمسمه:بنكرياس ؟!! ياي ..ده انت مش ستايل خالص..
ميزو:ستايل دي تبقى شتيمه ؟
*****



و بعدها بسنه كمان....
ميزو:تتجوزيني ؟
سمسمه:عندك عربية موديل كام ؟
ميزو:موديل دي تبقى شتيمة ؟
*****



كمان سنه....
ميزو:تتجوزيني ؟
سمسمه:قوللي الأول .. حاطط أنهي نغمة عالموبايل ؟
ميزو:موبايل دي تبقى شتيمة ؟
*****



.....سنه.....
ميزو:تتجوزيني ؟
سمسمه:ما قلتليش .. إنت بتشتغل إيه ؟
ميزو:أنا -بلا فخر- عاطل
سمسمه:عاطل ؟
ميزو:مش أحسن من اللي ما بيشتغلش ؟
*****



............ ........
ميزو:تتجوزيني ؟
سمسمه:لقيت شغل ؟
ميزو:أيوة طبعًا .. سنتين وأنا بادور .. أخيرًا لقيت
سمسمه:وإيه هو ؟
ميزو:سواق تاكسي
سمسمه:ياي !
ميزو:ياي دي تبقى شتيمه ؟
*****



مش فاكر بعدها بأد ايه....
ميزو:تتجوزيني ؟
سمسمه:جمعت مبلغ كويس ؟
ميزو:طبعًا .. مبلغ كبير جدًا
سمسمه:قد إيه يعني ؟
ميزو:ألف جنيه
سمسمه:نعم ؟!!!
ميزو:يعني موافقة ؟
سمسمه:بقولك ايه..شيل الموضوع ده من دماغك و خليك فريش
ميزو:فريش دي تبقى شتيمه ؟
*****



انتو معايه ولا نمتو ؟؟؟؟؟
ميزو:تتجوزيني ؟
سمسمه:عندك شقة ؟
ميزو:طبعًا .. أودة على السطوح
سمسمه:نعم ؟!!
ميزو:إيه المشكلة ؟! .. أحسن ما ننام في الشارع !
سمسمه:في الشارع ؟!
ميزو:وكلها كام سنة وأجيبلك أحسن شقة في الدنيا
سمسمه:بس اعمل حسابك...انا عايزه شقه تكون فانتاستيك
ميزو:فانتاستيك دي تبقى شتيمه ؟
*****



والله ما فاكر بعدها بكام سنه....
ميزو:تتجوزيني ؟
سمسمه:جبت الشقة ؟
ميزو:أيوة...خدت شقه في مساكن الزلزال
سمسمه:نعم ؟!!
ميزو:بس ما فيهاش حمام
*****



ميزو:تتجوزيني ؟
سمسمه:إنت تاني ؟
ميزو:جبتلك حمّام إنما إيه
سمسمه:خليه ينفعك
ميزو:خلاص...هاكتبه باسمك!!!
*****



بعد سنين....
ميزو:هتتجوزيني ولا أولع فيكي ؟
سمسمه:ومالك محروق كدة ؟
ميزو:ماهو حكايتنا طولت قوي .. طولت أكتر من اللازم
سمسمه:إنت ليه متمسك بيا أوي كدة يا ميزو؟
ميزو:أصل .. أصل ..
سمسمه:أصل إيه ؟
ميزو:أصل أنا بحبك
سمسمه:بحبك ؟!! اسمها i love u يا جاهل
ميزو: i love u دي تبقى شتيمة ؟
*****



بعدها بسنين تانيه......
ميزو:تتجوزيني ؟
سمسمه:أنا بصراحة .. مش شايفة إن في حد في العالم يستاهلني
ميزو:يا سلام ! .. ليه ؟
سمسمه:عشان أنا جميلة .. دمي خفيف .. رشيقة .. رقيقة
ميزو:رقيقة ؟! .. ده انت بدأتي تقشفي
سمسمه:فشر !
ميزو:فوقي لنفسك .. العمر بيجري
سمسمه:أنا مصرة على رأيي
ميزو:يعني إيه ؟
سمسمه:يعني اقطع معايا
ميزو:بعد كل السنين دي ؟! .. بعد كل الحب ده ؟!!
سمسمه:بقولك ايه..بلاش تراجيديا
ميزو:تراجيديا دي تبقى شتيمة ؟
*****



بعد سنين أكتر من اللي فاتو ....
ميزو:تتجوشيني ؟
سمسمه:إيه ؟
ميزو:تتجوشييينييييييي ؟
سمسمه:إنت مين ؟
ميزو:أنا حبيبك يا هبلة .. البشي النضارة عشان تشوفيني
سمسمه:أشلي مش شايفاها
ميزو:ماهي قدامك على الترابيزة
سمسمه:أنا لزيزه ؟!!
ميزو:على الترابيييييييييزه
سمسمه:أيوة لقيتها
ميزو:البشيها بقة
سمسمه:ططييبب
ميزو:عينيكي فوق شوية يا سماسم .. ده بقك ..
سمسمه:طيب لبشهالي إنت
ميزو:عقبال ما البشك الدبلة
سمسمه:ما تكشفنيش يا ميشو بقي .. كنت بتقول إيه بقى ؟
ميزو:كنت بقول تتجوشينيي ؟
سمسمه:أكوشك ؟ .. إزاي ؟
ميزو:يا ولية مش تكوشيني .. تـ .. تـ .. جـ .. و.. شـ .. يـ .. نـ .. ي ؟
سمسمه:شيبني أفكر
ميزو:أفكر دي تبقى شتيمه ؟!!
*****



على فراش الموت......
ميزو:تـ…كوح..تتـ..كوح كاح..تتكو..كوح..تتكوشـ..كوح كوح..يني ؟
سمسمه:مش شامعة
ميزو:هـ..و..ه..كوح كاح ..هوه إنتي..كوح..معرفتيـ..ش..كوح
سمسمه:إيه ؟
ميزو:لا.. كوح..أبدًا .. كوح .. كنت … كح كح .. بأكح
سمسمه:بتكح ؟!!!! .. شلامتك .. ما قلتليش ليه ؟
ميزو:هو .. كوح .. إنتي .. لشة .. عارفـ .. ـة .. كوح كوح
سمسمه:بتقول إيه ؟
ميزو:قو..كوح..لتي..كيح..ايه..ي ..كوح..ولية..تتـ..ج و..شيـ..نـي ؟
سمسمه:أجوشك ؟!! .. طب بش خد الدوا الأول
ميزو:يا وليـ .. ـة..كوح..مش..كوح..وقته..كوح
سمسمه:موافقة .. موافقة يا حاج..
ميزو:أخيـ..راااااً..كوح..كدة. ..أموت..كوح..وأنا..كو ح...مرتاااااااح
سمسمه:مرتاح دي تبقى شتيمه ؟؟؟؟؟؟؟؟؟!!!!!!!!!!!! !
بنت الراعي
06-18-2008, 05:22 PM
ههههههههههههههه
تحفه اوي يا كيرو حقيقي جميله اوي
ربنا يعوضك ويباركك ويفرح قلبك
keroo82
06-18-2008, 05:24 PM
ميرسى يا بنت الراعى على مرورك وردك الجميل

ربنا يبارك حياتك
العضو المجهول
06-18-2008, 05:26 PM
ههههههههههههههههه
جامده جداا بس الحقيقه مش قادر اطلع واسجل خروج
وادخل تانى بالعضويه بتاعتى
ههههههههه
Narmar
06-18-2008, 05:31 PM
هههههههههههههههههه
جامدة يا كيرو :)
جوسى
06-18-2008, 08:54 PM
ههههههههههههههههههههههههه ههههههه

ميرسى كيرو
nemo_jesus
06-19-2008, 09:03 PM
ههههههههههههههههههههههههه ههههههههه
دا انا اللى موت عقبال ماخلصت قرايه
بس جميله ياكيرو تسلم ايديك ربنا يبارك حياتك
روفــــا
06-19-2008, 10:53 PM
ههههههههههههههههههههههههه ههههههه
جميلة اوى يا كيرو ميرسى
keroo82
06-20-2008, 11:02 AM
ميرسى ليكم يا حبايبى معلش انا زهقتكم شوية
سامحونى
ربنا يباركم
imported_نيرو
06-20-2008, 11:58 AM
دول كده هيموتوا قبل مايتجوزوا بس بجد جميله تسلم ايديك
دموع الورد
06-20-2008, 12:15 PM
مرسى يا كيرو حلوه قوى لذيذه
بس مرسى دى متبقاش شتيمه
ههههههههههههه
melanora
06-21-2008, 02:56 AM
هههههههههههههههههههه
حلو اوي
كرونا البير
06-21-2008, 11:30 PM
مش تزعل انت حقيقى رخم
القمر الحزين
08-11-2009, 10:51 AM
ههههههههههههههههههه
جمييييييييييييييييييييلة قوووووووووووى ياكيرو
بس دانا اللى طلعت روحى لغاية ماخلصت قرايه
بس تصدق مالهاش حل
ههههههههههههههههههه
ربنا يفرح قلبك يارب
ومنتظرين الجديد والاجدد منك
lolaemo
08-11-2009, 01:24 PM
ههههههههههههههههههههههههه ههههههههههههههههههههههه
ههههههههههههههههههههههههه هههههههههههه
هههههههههههههههههههههههه
هههههههههههههههههه
ههههههههههه
هههههههه
ههههه
هه
ه
ماهى غلاسة بغلاسة
اخرة تنطيطها على الراجل اهى هتموت من غير جواز
لينا ميخا
08-11-2009, 10:20 PM
هههههه
حلوة بس طويلة اوي
ربنا معاك
nemnema2010
08-11-2009, 11:28 PM
ههههههههههههههه ميرسى ليكى كيرو حلوة اوى
IO-Mena
08-11-2009, 11:37 PM
ههههه
لذيذه
tito_ramy
08-12-2009, 05:43 AM
very nice god with u
koko_4m
08-12-2009, 09:10 AM
هههههههههههههه
بجد الموضوع تحفه
ربنا يعوض تعب محبتك
amgad nagy
08-12-2009, 09:56 AM
موضوع جميل ونقول الحمد لله أنها وافقت مكان من الأول لازم يعنى تعزب الراجل كدة هههههه.
الجوهرة الثمينة
08-14-2009, 03:53 AM
حلوة اوي
بس انا عقبال ما قريتها كنت في غيبوبة
امال انت يا عيني كتبتها ازاي
ربنا يعوضك
bebo_coach
08-14-2009, 08:10 PM
بجد الموضوع تحفة ربنا معااااااااك