مين يقدر على هذا الزمان !!! فارحمني يا رب القوات من نفسي لئلا أتغر بهذا الزمان

كان في زماني بسمة حلوة تشوفها في عيون أطفال تعكسها أشعة شمس دهبية تلمع على سنابل قمح في الوديان تظهر فرحة حلوة ندية على أغصان أغصان واقفة عليها طيور حلوة في كل مكان تغني وترقص مع الأوراق أوراق شجر وزهور كلها ألوان أحمر واخضر مع أزرق صافي يعلن الحب في أرض فيها سلام أصل الدنيا كانت حلوة والبسمة واضحة في عيون كل الناس ويا ترى الناس لسة فاكره الضحكة والا راحت مع الأيام دي الضحكة فعيون الناس بقت باهته، متلونة بلون التراب والدنيا بقت صحرا لا فيها طير ولا فرحة بقت في عيون أطفال اغتلها غول اسمه الطمع اللي بقى سيد كل الناس قتل الطير باد خير الأرض والوديان مرحمش ضعف طفل وأكل حق الغلبان أصل الإنسان مبقاش إنسان، نسي نفسه، ضاع مع الأيام بقى يبني ويزرع ويقلع لنفسه، يقتل طفل يموت إنسان، مش مهم اصل المهم يكون هو فـ أمان، يملك الدنيا ويكون له سلطان وبقى المال هو المعبود، اصبح وثن لوث الأرض استعبد الإنسان أجري واهرب، ارمي نفسي على خالق الكل مخلص كل فقير غلبان لحسن أتغر وامشي مع غول يحطم كل عملاق اصرخ لربي ارحمني أنا غلبان أعلن فقري وعوزي ليك يا رب الأكوان اصلي أنا إنسان ممكن اتغر وانسحق تحت طمع والا شهوة قلب اعبدها وانسى الإله فارحمني يا رب القوات من نفسي لئلا أتغر بهذا الزمان نقي قلبي من كل طمع أو شهوة تفسد قلبي وتجعلني تحت سلطان نجيني من الشرير واحفظ قلبي بالإيمان افتح عيني عليك، أشوف مجدك وافرح بحضورك أنت الإله قويني شددني أعني على هذا الزمان المجد لك يا من تصغي وتسمع لفقير زيي غلبان