مع السامريه
كُتب : [ 09-05-2011
- 08:22 PM
]
زى السامريه و لنفس البير
أصل الزمن ما بيفرقش كتير
نفس الجوع نفس العطش نفس المشوار
نفس الخيبه نفس الفراغ نفس المرار
مهما بشرب ما بيرويش
مهما أحاول ما يكفيش
طب ليه راضى فى سرابه أعيش؟!
أصل العالم زى البير راكد محدود
و صوتك جوايا بينادى لحياه و خلود
يبقى ليه برجع لنفس القيود؟!
كل ما بشرب من نفس البير
برجع أعطش و أكون له أسير
عارف ليه أنا واثق فى التغيير؟!
عشان بلاقى فى دم صليبك تبرير
وفى روحك قوة تقديس و تحرير
حبك ليا حب بجد
مش زى حب أى حد
مالوش شروط و لا لنهايته حد
دايما بلاقيك مستنى جنب البير
نفسك تروى و تشفى كل أسير
بتقولى أروينى و أنت الينبوع!
طب عطشان لأيه يا يسوع؟!
عطشان لخلاص و رجوع
و بأيدك تمسحلى كل دموع
حلمك تشفى قلبى الموجوع
حضنك يرفعنى من كل وقوع
حبك بيشبعنى فأبطل للعالم أجوع
دوبنى فى حضنك
خبينى فى قلبك
فأتنفس حبك
و أحس بقربك
نفسى تغرقنى بحبك جوه الينبوع
فأعيش ليك و تعيش فيا يا يسوع
التعديل الأخير تم بواسطة كيرو رافت ; 09-05-2011 الساعة 11:27 PM
|