طبعا انا متشكرة ليكم كلكم على اهتمامكم بس فى حاجات حبيت انكم تعرفوها او انكم تجاوبونى عليها

الاخت: ريم الخورى
شكرا على كل كلامك . قلتى: "حاولي تلقي اب اعتراف لو ملكيش يعني اطلبي ربنا يساعدك باختيارة ولو ليك حولي تقوليلة كل اللي بقلبك وهوا اكيد رح يرشدك لصالح نفسك"
ليا اب اعتراف بس هو مبيقولش اى حاجة غير "صلى يا بنتى" فقررت انى اريحه منها . و بقيت عارفة خلاص .. رد اى مشكلة : صلى يا بنتى
و: "اما الاصدقاء بجد لو مكنوش يقبلوكي زي ما انت بلا منهم لانهم ميش اصدقاء دول متحوليش تكون غير ما انت علية خاصة لو التغير كان سلبي على شان تقربي من حد بس كرمال يقبلك وتكوني صديقة"
هما مكانوش عايزينى ابقى فريش دايما او يمكن حتى مكانوش رافضينى بس دايما كانوا عايزين يعرفوا ليه انا زعلانة و انا طبعا مش بكلم حد عشان كده كنت بحاول ابقى .. مضحكة شوية او حتى مش ببين انى زعلانة عشان محدش يسأل
و: "الصديق الحلو هو اللى يقربني من ربنا ويعرفني طريقة ويحببني فية ميش يحببني بالى هو يريحية مني فرفوشة وهيصة والكلام دا"
صدقينى بسببهم اتعرفت اكتر على ربنا و قربت منه بس كانت كل المشكلة بالنسبالى انهم عايزين يعرفونى اكتر بالذات لما كانوا بيحسوا انى متضايقة
و: "القديسين بيقبلوكي صديقة زي ما انتي"
بشكرك جدا على النصيحة دى و فعلا انا ليا اصحاب من القديسين و دايما بحس انهم قريبين منى
و: "الاصدقاء ميش يحسسوكي بس انهم بيحبوكي لا يعيشوا معك حياة محبه بكل معانيها ميش بس كلام"
و لو لقيت اصحاب بالشكل ده فعلا .. هايبقى عادى انى اتعرف عليهم و اعتبرهم اخواتى بجد ولا بلاش تكون عندى ثقة خالص ؟

و الاخت: sawsaw
شكرا ليكى بجد . قلتى: "امشى معاه ( ربنا ) خطوه بخطوه وصلى لرب المجد قولى محتجالك تشفى جروحى"
حاضر و متشكرة جدا . و شكرا على اللينك

و الاخت: emmmy
شكرا على كلامك و تشجيعك بس عايزة اسألك شوية . قلتى: "وانتى مش كئيبة بدليل انك بتقولى انا بكلم ناس وبقى دمى خفيف"
صدقينى مش متأكدة . ساعات بيكون دمى خفيف و ساعات ببقى جد و ساعات متدينة شوية او قريبة من ربنا . بيتهيألى حسب الانسان اللى بتعامل معاه . تفتكرى دى ازدواجية ؟؟؟
و: " ركزى فى حاجة حلوة واسعى لتحقيها ركزى فى هدف سامى وحاولى بكل جهدك تنفذية"
مفيش . حاولت كتير ادور على الهدف ده بس مش لاقية . كل اللى قالوا كلمتك دى و سمعوا ردى قالولى عيشى عشان الهدف اللى ربنا خلقك ليه .. بس انا اساسا مش عارفاه . فى حد بيعيش عشان هدف هو مش عارفه ؟
و: " انتى ركزى فى هدف حلو بستحق انتباهك واهتمامك هتلاقى نفسك مش حاسة بالظروف الصعبة اللى بتتكلمى عنها ومش هتاثر فيكى كتير"
صدقينى مفيش . حاولت اخلى الهدف ده فى الدراسة بس اكتشفت ان الانشغال بيها فعلا حاجة تافهة جدا لانها اساسا ملهاش اى مستقبل . حتى لو ليها انا مش مهتمة بالمستقبل مهما كان شكله
و : "واختلاف بابا وماما احنا كل اللى نقدر نعملة اننا نصلى فعلا علشان ربنا يتمجد ويحنن قلوبهم على بعض"
مستحيل . كفاية 17 سنة صلاة من غير حاجة . و سواء ربنا حنن قلوبهم او لأ دى حاجة ليهم مش ليا انا
و: "ومتقوليش ماما بتكرهنى دى خالص مفيش ام بتكرة بنتها ابدا والكلام بيتقال فى ساعة غضب معلش"
اسمحيلى . فى امهات كتار بجد بيكرهوا اولادهم .. مش هاقول زى فلانة و فلانة بس انا مجربة و عارفة .. مستحيل تكون بتحبنى بالشكل اللى انتى متخيلاه
و: "ربما تكون مضغوطة من الاختلافات مع بابا اعذريها جربى تقربى منها انتى وتكونى حنينة عليها وتعوضيها طبطبى عليها وعرفيها انك حاسة بيها"
تقريبا انا من اصحاب ماما بس هى مش صاحبتى . هى بتشكيلى عن همومها و مشاكلها فى الشغل و مصاريف البيت و كل الحاجات دى . و بجد بتحبنى جدا لما بتكون تعبانة و انا بكون قاعدة معاها . بس اول ما بتخف مش بشوف منها اى حاجة من حنية المرض
و: " وياريت ياااريت بلاش صداقات النت فى سنك دة ارجوكى متدخليش فى حوار مع حد اوى وتثقى الثقة العمياء وتحكى تفاصيل حياتك وتشكى لاى حد متاعبك انتى متعرفهوش"
محصلش اساسا انى وثقت فى اى حد . تقريبا ببقى خايفة من الاستغلال .. مع ان كل اللى حواليا بيستغلونى بس ببقى مش عايزة حد تانى يستغلنى
و: "حاولى تقربى من ربنا بجدية وامانة وارتمى فى احضانة واتكلمى معاة علشان تلاقى فية الشبع والراحة"
صدقينى انا بعتبره بابايا و صاحبى بس لما بلاقى كل اللى حواليا بيلجأولى انا عشان اخفف عنهم و انا مش لاقية حد يخفف عنى ده بيتعبنى قوى
و: "و انتبهى لدراستك اوعى تضيعى مستقبلك تحت اى ظروف مش هتسامحى نفسك ابدا لما تكبرى شهادتك ودراستك وعلمك هيخففوا عنك كتير"
تفتكرى ؟ انا مش حاسة انه فى مستقبل اصلا عشان يضيع
و: "اسفة على التطويل"
يا حبيبتى و انا لاقية حد يكلمنى اساسا ؟

و شكرا ليكم كلكم تانى
ربنا يعوضكم