ممكن يكون صح او غلط نشرناه للتحذير

on February 22 | in ArT-FaCe | by | with No Comments

‫ممكن يكون صح او غلط نشرناه للتحذير ‬


Timeline Photos
ممكن يكون صح او غلط نشرناه للتحذير

نصيحة! و كل واحد براحته بعدين ..
عشان بس نغلس شوية ;) على الناس اللى بتستهبل فى الحوارات دى كل يوم بشركة اسم مختلف و عاملينها تسول شبكي … ! و عشان حرام يضحك عليك، او حتى تورط غيرك فى نصبايه و تبقى بتهرب من الناس لما تشوفك بس اللى عملته ..

معظم حوارات الربح من على النت نصب، و خاصة بتاعة الاعلانات .. صحيح فى ناس بتكسب من شغل بتعمله على النت، بس هى بتقدم حاجة و شغل حقيقى، مش مناديب شركة "كراتين فاضية تربى فيها كتكوت" !

مفيش حاجة اسمها اكسب 50 دولار عشان تشوف اعلان .. لان مفيش اعلان على النت يوصل تمنه لـ 50 دولار عشان طالب مصري فى 3 اعدادى من طنطا يشوف اعلان عربية هوندا!
الملايين اللى بتتوزع دى و ملهاش صاحب "نصب" ..
و اقرى كلامى كويس و هتفهم انك اتنصب عليك ..

الايام دى شغالة اوى شركة GlobadAdMart و بتدفع فيها 500 دولار عشان تفتح حساب و بتكسب شهريا 200 دولار على الاقل و ما فوق..

كذا واحد قالى عليها و واضح مصر كلها شغال فى النصباية دى، و واضح ان فى ناس كتير اضحك عليها و للاسف بعد ما بيتورط و يشترك بيحاول يقنعك، عشان تشترك و يعوض خسارته و فى الغالب هيعرض عليك هات الفلوس و انا افتحلك الحساب برصيد النقط اللى عندى ..
و الناس تقولك "انا قبضت" ، "انا شوفت واحد قبض" ، و غيرها من القصص و هو قبضش حاجة من الشركة و لا يعرف حد قبض " وكلها قصص بيسمعها من غير دليل" و لازم يتكلم بثقة عشان انت تتشجع و تشترك، و الفلوس اللى بتشوفها، بياخدها منك و يقولك انا بكسب اهو … دى فلوسك و فلوس الناس اللى بيتنصب عليها .. لكن الشركة مش بتدفعله .. بالعكس هو بيبتعلها ناس جديدة كل شوية ..

**********************************
طيب و ايه الدليل على الكلام ده انها نصب !!؟
**********************************

اقري كلامى ده كويس، كذا مرة و اديله درجة مصداقية 0% و ارجع دور فى النت و اتاكد منه ..

شوية ملاحظات سريعة:-
1- مفيش شركة بأى حال ممكن تدفع لحضرتك 10 و 15 دولار عشان تشوف اعلانها !

2- الشركة محدش يعرف عنها حاجة اصلا عشان محدش يكلمك بثقة عنها و من الاخر الدومين بتاعها اتسجل يوم 17 ديسمبر 2012، يعنى من اقل من شهرين
المعلومة دى تقدر تتاكد منها من هنا – البيانات دى محدش يقدر يلعب فيها اصلا و مصدرها ICANN اللى بيتسجل الدومينات
http://whois.domaintools.com/globaladmart.com

3- مفيش حد استلم جنيه من الشركة لحد انهاردة، لان حسب شروطهم اول 4 اسابيع مش ينفع تسحب فلوسك و لازم رصيدك يوصل لـ 500 دولار عشان تطلب تحويل المبلغ .. يعنى لازم يمر 4 شهور على الاقل عشان اى حد يقولك "انا استلمت" !!
و بناءا على ان الدومين اتسجل يوم 17/12/2012 و بفرض ان الموقع انطلق بعدها بـ 5 دقايق !! يبقى لازم اول واحد يستلم يكون فى شهر مايو ..

فى ناس هتقولك : طيب ايه رأيك انا مشترك فى شهر 11
الناس دى كانت على موقع اسمه LocalAdClick .. نصب على الناس و اخر مجموعة اشتركت حولها على GlobalAdMart و ظهر بالاسم الجديد ..

اى حد يقولك اصل الشركة كانت فى الاول Local و دلوقت Global … قوله "حمرا" .. سوري يعنى .. قوله و انت كنت مشترك فيها ازاى لما كانت "لوكال" … ؟؟ و عموما لا حد قبض من لوكال و لا جلوبال و لا حد هيقبض

4- الناس بيكون عندها فى رصيدها ارباح وهمية و مش حقيقية و مفيش حد استلم "ربع جنيه" من الشركة ..
و اتحدى اى حد يقول "ده تحويل بنكي" او حتى تحويل بالبريد !

5- اهم نقطة .. ******
الناس اللى بتقول انا قبضت، ازااااااااااى !؟
هو بيكون معاه نقط على الاكاونت و معاه 10 "زباين" جايبهم تحته ، الشركة بتقوله لو عندك 1000 دولار مثلا فى رصيدك انت ممكن تطلع اكاونتات من عندك و تاخد فلوسها كاش لـشخصين × 500 = 1000 دولار
و يستلمها كاش ..
و يفتح بيها اكاونت ليهم و ياخد الفلوس كاش و باقى الـ 8 اشخاص يحول فلوسها للشركة 500×8 = 4000 دولار كسبتها الشركة …

يعنى هو كسب من فلووووسك انت .. و فلوس غيرك
و باقى الناس دفعت للشركة ..
الفلوس اللى قبضها منك و حطها فى جيبه .. يطلعها و يقولك "انا بكسب" …
ايوة بيكسب من النصب عليك .. هو بيعتبر الفلوس دى كسبها من الشركة .. لكن فى الاصل هو شغال "مندوب نصب" بياخد مبلغ فى جيبه و الباقى للشركة و يقولك انا بكسب ..

هو كسب … ايوة،، ملاليم
الشركة كسبت … ايوة،، ملايين
انت … اتنصب عليك لان مفيش اصلا اعلانات بالارقام دى

ايه الحل !؟
اشتغل انا كمان نصاب و اجيب فلوسي عن طريق اجيب ناس تحتى عشان اخد عمولات و برصيد النقط اللى عندى اطلع اكاونتات و تعمل زى اللى قبلك ..

انت كسبت … ايوة،، ملاليم
الشركة كسبت .. ايوة،، ملايين
الناس اللى بعدك … ضحايا جداد ، مطلوب منهم يعملوا زيكم
لكن فجاة …. هتلاقى الشركة قفلت و فكت بالفلوس كلها ..

مين اللى اتنصب عليه … كلكم !!
بس منكم اللى قرر يشتغل لحساب الشركة عشان يعوض خسارته و منكم اللى الشركة قفلت و فلوسه راحت و ما اخدتش حاجة …

5- الشركة نفسها ظهرت من سنة باسم مختلف، و نصبت على الناس باسم LocalAdClick و ناس كتير اتنصب عليها و محدش قبض حاجة

6- المفاجأة بقى اللى اكتشفتها، ان الساذج صاحب الشركة لسه محتفظ بالموقع القديم على الموقع الجديد، شوف من هنا http://www.globaladmart.com/new/

7- موقع الشركة مفيهوش اى معلومات حقيقية عن الشركة، مثلا لو دخلت هنا http://www.globaladmart.com/contactus.html
هتلاقى ان التصميم ركيك جدااا، مفيش تليفون او فاكس .. فى عنوان و الشاطر يسافر و يتأكد بقى !!
واضح اللى صمم الموقع واحد فى 3 اعدادى! و اسال فى النقطة دى اى واحد خبير لان سهل يلاحظها من حاجات كتير ..

8- هتلاقى ناس بتقولك الشركة مسجلة فى الهند .. و رقم التسجيل U74999KA2011PTC060116 و الموقع اهو و اتاأكد !!

انا قررت اتأكد فعلا .. و مفيش شركة بقى بالاسم ده و لا برقم التسجيل ده … لكن بيعتد على انك مش هتدور .. طمعك فى الفلوس و عماك و مش مخليك عايز تفكر كتييير فى التفاصيل ..

9- عنوان الشركة على الموقع اكيد طبعا وهمى (بس مفيش دليل)، و هما عاملين نفسهم جزء من شركة ViSim Advertising Limited اللى هى اصلا متسجل الدومين بتاعها يوم 26 يناير 2013 .. يعنى من 3 اسابيع !
و اتاكد بنفسك من هنا
http://whois.domaintools.com/thevisimgroup.com

10- الاعلانات اللى عندهم و يقولك براندات .. اعلانات وهمية .. الشركات دى مش بتعلن عندهم و لا حاجة ..
لكن النصاب لازم يقنعك ان اكبر الشركات عنده !!
النقطة دى صعب تفهما اوى لو مش ليك فى الويب ماركتنج .. بس الشركات دى اسلوب فى الاعلان و سعر الاعلان بيختلف من دولة لدولة المفروض .. و غالبا بيكون 10 سنت و المصري ممكن يوصل لـ 1 سنت عشان يشوف اعلان !!

اخر دليل فى كلمتين …
****************
اللى يقولك "انا قبضت"
– قوله ورينى صورة التحويل ..انا عايز صورة تحويل بنكى من الشركة ..
* يقولك اصلهم بيخصموا 30% عمولة تحويل و 50% ضرايب .. فانا باخد فلوسي كاش
– لو فهمت كلامى هتتأكد ان فلوسه اللى بيكسبها واخدها من ناس اضحك عليها .. و الشركة ما دفعتش حاجة ..

لو انت من بتوع "التجارة مخاطرة" .. مفيش بيزنس زيرو ريسك ..
فاقولك مبروك ..انت مصري صميم، انت الشخص اللى بيدوروا عليه و 3500 جنيه بتوعك حلال على الشركة طالما انت فكرت كده ..

الخلاصة:-
الخلاصة ان ده تسول شبكي، مش تسويق شبكى ..
و انا مش شغال فى كيو نت و لا اى شركة عشان ما تتعبش نفسك و تحاول تحلل ايه اللى مضايقنى ..
ده نصب و انا عارف بناءا على نقط كتير و بحاول على اد ما اقدر اقولك اللى يقنعك انت .. مش منظم اوى فى كلامى و مش واد اشتغل مندوب اصلا قبل كده عشان اتعلم ازاى اقنع حد بحاجة اى كلام ..
و لما تحب شركة تعمل اعلان هتدفع 10 او 20 سنت بالكتير لكل ضغطة على الفيس بوك مثلا، يعنى الـ 15 دولار اللى هتدفعها الشركة تجيب بيهم 150 واحد افضل من اللى قاعد بياخد فلوس عشان يتفرج على اعلان .. لان اللي بيضغط على الاعلان اللى بيعجبه ممكن يقرر انه يشترى المنتج ..
ده الويب ماركتنج اللى فى العالم كله .. بس فى مصر الناس متخيلة ان فى ملايين تايهة مع الشركات و عايزة توزعها على الناس !!
و فى مبرر سااااذج شغالين عليه و يقولك ده افضل من اعلانات الفضائيات .. اقولك للاسف هو بيستغل انك مش عارف ويب ماركتنج نهائى .. و الى ما تعرفوش بالـ 10 دولار دى انا اعمل حملة اعلانات ناجحة جدا على الفيس بوك .. افضل من العيل بتاع طنطا اللى عايز دخل شهرى ثابت و بيتفرج على اعلانى بالاكراه !!

لو انت مشترك معاهم او مع غيرهم .. فبما انك ما قبضتش حاجة من الشركة (تحويل مباشر – تحويل بنكى يعنى مش فلوس كاش خدتها من الناس و ورطتهم و اعتبرت ان الشركة حولتلك .. كلامى واضح عشان اللى صدعونى و يقولى انا قبضت) اسكت شوية و انتظر لحد ما تتاكد انهم نصابين بنفسك او تقبض منهم (ابقى قابلنى!) … لان بكلامك عن الشركة انت كده شغال مندب لشركة نصب للشركة ببلاش و بتستغل اسم الشركة عشان تلم فلوسك من الناس من النقط اللى عندك و تطلع اكاونتات لانك مش عارف تاخد فلوسك ..

لو انت لسه مش مشترك، اعتقد الكلام اللى فوق يفيدك، و لو انت حابب تجرب و من بتوع "التجارة مخاطرة" فانت حر .. بس المشكلة انك هتحاول تورط اللى حواليك معاك !

الكلام ده على الشركة دى و غيرها
goldline.pro
globaladmart.com
myrightad.com
و غيرها ..
و انت حرررررررررررر و اشرب يا مصري
.
.

†♡† MelodY †♡†

Fans of "The Cross"

Pin It

Leave a Reply

« »

Scroll to top