الصبح قريت مقولة بتقول : ” تعيس هو الانسان الذي يعلق سعادته علي وجود بشر لا ي…

on February 20 | in ArT-FaCe | by | with No Comments

‫الصبح قريت مقولة بتقول :

" تعيس هو الانسان الذي يعلق سعادته علي وجود بشر لا يهمهم وجوده من عدمه "

لأ هو مش تعيس … هو بس مش فاهم معناها و مصدرها الحقيقي .. فبيدور عن تفاحة في شجرة خوخ !!

و ديه حقيقة غايبة عن ناس كتير

لكن الحق بيقول ان الله نفسه هو المصدر الأكبرللسعادة .. لأنه الحب و مصدر الحب

الحب اللي يحسسك ان وجودك اهم من اي وجود

الحب اللي بيبعتلك كل يوم هدايا بيجهزلك فيها من قبل ما تتولد

الحب اللي يسامحك و ميرفضكش ابدا لما تغلط .. فتتغير علشان بتحبه مش علشان حاسس بالذنب زي ما الناس احيانا بيعملوا

الحب اللي يحترمك و يحترم قرارك في علاقتك بيه .. تكون معاه او تسيبه .. من غير ما يقول : يعني انا اعملله كل ده و في الاخر يطلع ندل و يسيبني ؟ … انما ينتظرك في حب و لهفة و اشتياق .. و يبعتلك صوته جواك يلين قلبك حتي لو كان حجر

الحب اللي مهما كنت بعيد عنه و مطنشه .. قلبه ميستحملش يلاقيك في تعب او حزن او مشكله .. و تلاقيه باعتلك كل الحلول .. و ياريتك بتقدرده !!

الحب اللي لما بتغلط بيسامحك قبل ما تروحله .. و مفيش غلطة بيفتكرهالك .. و كظانه بيقوللك : يا حبيبي انت عندي بالدنيا و مشاركتك حياتك ليه شئ مفيش اغلي منه

ممم …

لما بنت تبقي راجعة من خروجة مع حبيبها – في اغلب الافلام المصرية تقريبا زي فيلم سعاد حسني " صغير ع الحب " و اللي كانت بتعمله مع الدادة – و تقابل امها او واحدة صاحبتها .. تلاقيها مسكتها و حضنتها و باستها و قعدت تضحك معاها و تقوللها انا مبسوطة و فرحانة ..

و طبعا و هي داخلة بتجيب حاجات حلوة لو فيه اطفال .. و كتير من اعمال الحب بتقوم بيها

و تيجي تدور تلاقي سبب .. متلاقيش غير ان الانسان بيعرف يحب بأقصي طاقة ممكنة علي اد ما يتحب ..

و تيجي تدور تاني علي سبب للناس اللي عايشين في سعادة مع اللي حواليهم ..

تلاقي نوعين من الناس :
1- ناس عايشين في سعادة لأنهم لقوا في حياتهم ناس تحبهم
2- ناس عايشين في سعادة -في الأصل- لأنهم بيحبوا اللي حواليهم .. و بالتالي الحب بيرجعلهم

تلاحظ ان نمرة 2 مبادرين .. و ده شئ مش سهل … لكنه سهل لو انت شبعان بالحب و عندك طاقة تغرق بيها اللي حواليك :)

و لو عايز طاقة حب متنتهيش .. علشان تعيش مبسوط مع اللي حواليك .. ارجع للأصل … ارجع لـ الله و اشبع بعلاقة حية يومية معاه … شاركه احزانك و الامك و متنساهوش وقف افراحك

اطلب معونته و دوق معجزات عمله معاك … ثق فيه و ارمي عليه كل حمل تقيل و اقبل تعمل دور بسيط يكلفك بيه ..

و ساعتها ..

رحيل اي انسان عن حياتك مش هيوصلك للحالة اللي تقول فيها انك تعيس .. لأنك ساعتها مش هتعلق سعادتك في الحياة علي الناس !!!

و ساعتها – و فوق كل ده – لما تقرب من ربنا .. مش بس هيديلك حب و خلاص ..

الله كامل .. و اللي بيقرب منه استحالة ميتعلمش و ميتغيرش ..

فمنطقي انك تتعلم لما تحس ان فيه ناس بيحبوك سابوك .. مفروض تتصرف ازاي .. و تتعامل ازاي مع مشاعرك .. و معاهم !!

انت بس قرب .. و تأكد و ثق ان اللي هتقربله هو كل حاجة و كل حد انت محتاجه !!

هو الطريق .. و الحق .. و الحياة ( اللي انت بتتمني تعيشها )

و هو كل يوم .. كل لحظة .. بيقوللك : تعالي اشبع بيا و استمتع بالحياة .. و اتقوي علشان تواجه ظروفك .. و اتقدس علشان تكون شبهي .. و ارتمي في حضني و خد كـــــــــــــل الحب اللي انت عايزه !! بس انت قرب ♥‬

CH12 Magazine

Pin It

Leave a Reply

« »

Scroll to top