بندق وبندقة في رحلة الخماسين حلقات مكتوبة لآحاد الخماسين “الأولي” تأليف : ميلاد…

on May 26 | in ArT-FaCe | by | with No Comments


بندق وبندقة في رحلة الخماسين
حلقات مكتوبة لآحاد الخماسين "الأولي"
تأليف : ميلاد نبيل



Timeline Photos
بندق وبندقة في رحلة الخماسين
حلقات مكتوبة لآحاد الخماسين "الأولي"
تأليف : ميلاد نبيل

الفكرة " بندق وبندقة شخصيتين يوجدا داخل الخدمة طوال فترة الخماسين المقدسة من الممكن أن يكونا علي هيئة "ماسكات" إن أمكن أو "مسرح عرائس" وهم يقدموا فقرة طوال الخماسين بإسم طبندق ويندقة في رحلة الخماسين" وأفكار الحلقات مأخوذة من قراءات القطمارس الخاصة بآحاد الخماسين وتكون تلك الفقرة مصاحب لها تلوين الصورة الخاصة بموضوع الدرس والتي ستجدونها مع سلم الخماسين الذي طرح للاطفال بجانب البانفليت من مركز the cross للحجز 01285514743

الخطوة الأولي
نتأكد إن ربنا معانا وهيحرسنا
"المنظر لبندق وبندقة وبندق يأكل شيئا ما وتقول له بندقة "
إرحم نفسك شوية بقي يابندق بقالك إسبوع كل ماشوفك ألاقيك بتاكل
ماهو أنا بعوض بقي يابندقة أيام الصيام
فاكر يابندق قطر الصوم
طبعا فاكره دي كانت رحلة جميلة خالص خالص
طيب ايه رأيك بقي تطلع معايا سلم الخماسين ده "تريه السلم"
الله إيه السلم الجميل ده .. طيب هخلص السندوتش ده وبعديها أتغدي وأنام شوية ولما أقوم أتعشي وبعدين أفكر إزاي هطلع السلم ده
يابندق يابندق إنت لازم تكون نشيط عشان تعرف تطلع السلم والأكل الكتير ده هيخليك متبقاش نشيط وممكن يخليك تبقي تخين ومتعرفش تمشي
يعني ماكلشي يعني مش كفاية طول رحلة الصوم مكنتش باكل خالص
لا تاكل يابندق بس بالراحة شوية ع الاكل
طيب ياستي وآدي السندوتش " يضعه جاننيا" هه فهميني بقي يعني ايه الخماسين دي
بص ياسيدي إنت عارف طبعا إن بابا يسوع بعد آخر محطة ف قطر الصوم اللي هي حد الشعانين اتصلب ومات وقام م الاموات
اه فاكر كويس
طيب حلو اوي هو بقي بعد ماقام يابندق قعد مع التلاميذ اربعين يوم
اه كان بيعمل ايه بقي
كان بيعلمهم حاجات كتيرة ومنها ازاي يطلعوا السما
ووراهم السلم ده
لا يابندق بس قالهم علي خطوات ف السلم ده يعملوها
طيب انتي قلتي اربعين يوم كدة في عشر ايام راحوا فين
ماهو يابندق بعد مابابا يسوع طلع السما بعديها بعشر ايام بعت للتلاميذ الروح القدس
الروح القدس اللي بنقوله في بسم الاب والابن ؟
ايوة هو ده وهو بعتهلهم عشان يقويهم ويعلمهم ويفهمهم كل حاجة
حلو اوي طب قوليلي بقي هنطلع السلم ده إزاي
بص يابندق إحنا هنروح السما
السما ؟ يعني إحنا خلاص هنموت
لا يابندق إستني بس أنا قصدي إحنا هنستعد إننا نطلع السما وعشان نطلع السما طبعا لازم يكون معانا سلم
اه فعلا بس ازاي يعني دي السما بعيدة خالص ومش ممكن اي سلم يوصلها
صح يابندق برافو عليك بس إحنا ممكن لو مشينا علي درجات السلم دي نوصل
درجات السلم ؟ طب دي يعني موجود فيها إيه
دي حاجات حلوة يابندق لو عملناها يبقي ربنا هيحبنا أوي أوي وهيكون معانا علي طول ولما نموت هيدخلنا السما
الله أنا عاوز أدخل السما طب يالله بقي قوليلي أعمل إيه عشان أعرف أطلع السلم الجميل ده وأوصل السما مع بابا يسوع
بص ياسيدي إحنا كل مرة هنطلع درجة لإننا لازم منكونش مستعجلين
خلاص ماشي وأنا موافق
وأول درجة عندنا في السلم يابندق بتقول إننا لازم نكون واثقين إن ربنا معانا ووسطنا إنت واثق يابندق
أه .. هو يعني إيه ربنا معانا
يعني بيحرسنا يابندق
برده يعني إيه
مثلا إنت يابندق وإنت نايم ومغمض عينيك مين بياخد باله منك
معرفش ماأنا بكون نايم اقولك هنام وأنا مفتح بعد كدة وأشوف
لا يابندق ماانت برده مش هتشوف لإن اللي بياخد باله منك ومني هو ربنا هو بيكون واقف معانا علي طول في كل حياتنا
يعني في الأمتحانات بيكون معانا
اه طبعا يابندق
ايه ده وبيشوفني وأنا بغش
بتغش ؟ إيه ده هو إنت بتغش يابندق
يعني ساعات كدة
لا يابندق مينفعش كدة ربنا يزعل منك وميقفش معاك
خلاص خلاص مش هغش تاني
انت عارف يابندق بابا يسوع كان مع مين قبل كدة
معانا كلنا
لا قصدي في واحد إحنا سمعنا قصته قبل كدة وكان إخواته عاوزين يموتوه بس ربنا وقف معاه
ايوة عارفه عارفه يوسف الصديق
شاطر يابندق انت شطور اوي انهاردة
مش بقولك اصل سندوتش الكفتة اللي انا كلته فتح لي مخي
شاطر خالص يابندق بس يابندق احنا لازم نكون مع ربنا عشان هو كمان يكون معانا
طيب ازاي يعني نعمل ايه يعني
منزعلوش ونصليله ومنزعلش بابا ولا ماما ولا اي حد
خلاص يبقي انا مش هزعله خالص لاني نفسي يكون معايا علي طول
وانا كمان يابندق برده مش هزعله خالص
"توجه كلامها لاطفال وتقول"
وياتري انتوا كمان ياحبايبي مش هتزعلوا بابا يسوع
شطار شطار طب ايه رايك بقي يابندق إحنا دلوقتي نلون صورة جميلة عليها بابا يسوع وهو وسط الاطفال
الله أنا بحب التلوين أوي
وكمان هنحفظ آية حلوة أوي من المس
ياسلام ماشي يالله بينا
"تقوم الخادمة او الخادم بتوزيع الألوان وتحفيظ الآية وتفسير ماقيل إن ارادت"
لمشاهدة فيديو شرح إستخدام السلم لأطفال حضانة وأولي وتانية وتالتة برجاء الضغط علي هذا الرابط

http://www.youtube.com/watch?v=2ErbPUP5zcU

لحجز أي كمية لحضانة إلي إعدادي أو ثانوي 01285514743
أذكروني ف صلواتكم
ميلاد نبيل

Fans of "The Cross"

Pin It

Leave a Reply

« »

Scroll to top