سكتش : مات علشاني

on May 2 | in ArT-FaCe | by | with No Comments

‫سكتش : مات علشاني‬


Timeline Photos
سكتش : مات علشاني
تأليف : ميلاد نبيل

إيريني :إخرستوس آنيستي
تنتظر من أندرو الرد فلا يرد
إيه ياأندرو مش هترد علي
أندرو : هو أنا أصلا فاهم إللي بتقوليه ده عشان أرد عليكي
إيريني: ماانت لو كنت جيت معايا مدراس الأحد المرة إللي فاتت كنت فهمت .. بص ياسيدي إخرستوس آنيستي يعني المسيح قام وآليثوس آنيستي يعني بالحقيقة قام والمفروض لما أنا أقولك آخرستوس آنيستي إنت ترد عليا بآليسوس آنيستي ولما قولك المسيح قام تقولي بالحقيقة قام يالله ياسيدي نجرب تاني .. إخرستوس آنيستي
أندرو : أسوس آنيستي
إيريني: آسوس ماشي هتبقي تعرف تحفظها لما نكررها طيب المسيح قام
أندرو : بالحقيقة قام .. قام منين بقي قام من النوم يعني
إيريني: لا ياأندرو قام من الأموات
أندرو : من الأموات ؟ يعني هو كان ميت وقام من الموت إزاي ده
إيريني: عادي ياأندرو ماهو ربنا يقدر علي كل حاجة
أندرو : أيوة بس إللي بيموت مش بيقوم تاني لإن تيتا لما ماتت بابا قال لنا إننا مش هنشوفها تاني خالص إلا لما نطلع السما
إيريني: ياأندرو في فرق كبير بين تيتا وبين ربنا لإن ربنا أصلا هو إللي بيخلقنا وبيدينا حياة
أندرو : طيب أساسا إزاي ربنا مات يعني
إيريني: بص أنا مش هعرف أفهمك كويس لكن في واحدة إللي هي قاعدة هناك دي
أندرو : آه مين دي أنا أول مرة أشوفها
إيريني: دي إسمها القديسة مريم المجدلية وهي عارفة ليه ربنا مات وكمان هي أول واحدة شافته بعد ماقام من الأموات .. تيجي نروح نسألها ونشوف تقولنا إيه
أندرو : ياريت يالله بينا
إيريني: إزايك ياقديسة مريم المجدلية
أهلا وسهلا إزايكم ياحبايي
إيريني: أنا وأخويا أندرو كنا عاوزين نعرف ليه بابا يسوع مات وليه قام
بصوا ياولاد إنتوا لسه صغيرين وعقلكم لسه صغيور وعشان كدة مش هتقدروا تفهموا كل حاجة لكن أنا بقي إللي هسألكم سؤال
أندرو : ياقديسة مريم إحنا جايين نسألك تقومي إنتي إللي تسألينا
معلش بقي ياأندرو هو سؤال واحد
أندرو : إتفضلي
تعرفوا تقولولي ليه باباكم بيخرج الصبح بدري ويروح يشتغل طول النهار ويرجع تعبان من الشغل
إيريني: أنا عارفة ياقديسة عشان هو بيحبنا وبيكون عاوز يجيبلنا اللعب والحاجات الحلوة
أندرو : والعسلية عشان أنا بحب العسلية
طيب ركز معايا وأنا أجيبلك عسلية .. هو برده ربنا ياولاد عشان بيحبنا أوي أوي وعاوزنا نبقي معاه في السما تعب علشانا وكمان موت نفسه
أندرو : ده كدة يبقي بيحبنا أكتر من بابا لإن بابا مموتش نفسه
هو طبعا ياأندرو ربنا بيحبنا أكتر من أي حد تاني لكن ده مش معناه إن بابا مش بيحبك وإنه لازم يموت نفسه عشانك لان بابا لو موت نفسه إنت أصلا مش هتلاقي حد يجيبلك حاجة حلوة ولا عسلية لإن بابا ميقدرش يقوم تاني زي بابا يسوع ماقام من الأموات لإن الوحيد إللي يقدر يقوم نفسه من الموت بعد ميموت هو ربنا بس حتي القديسين اللي كانوا بيقوموا ناس ميتين كانوا لازم يصلوا لربنا وربنا هو اللي يقوم الميت
إيريني: أنا بقي ياقديسة مريم عرفت من المس إن حضرتك قابلتي بابا يسوع لما قام من الأموات قوليلنا بقي شفتي إيه
أنا رحت يوم الحد الصبح بدري أوي وكنت جايبة معايا ورد عشان أحطه عند قبر بابا يسوع وكنت ساعتها محتارة خالص
أندرو : محتارة ليه ياقديسة مكنتيش عارفة تكتبي إيه ع الكارت بتاع الورد
لا ياأندرو ساعتها مكنش في كروت أصلا أنا مكنتش عارفة إزاي هدخل الورد جوة القبر بتاع بابا يسوع
أندرو : عادي كنتي ممكن تزقي الباب وتحطي الورد
لا ياأندرو الموضوع مكنش سهل كدة ده كان في حجر كبييييير علي باب القبر بتاع بابا يسوع وكمان كان في ختم علي الحجر وكان ممنوع إن أي حد يجي جمب الحجر
إيريني: أمال بابا يسوع إزاي زقه وخرج ده تلاقيه كان تقيل أوي
لا ياحبيبتي بابا يسوع أصلا مدحرجش الحجر بابا يسوع قام والحجر موجود مكانه
أندرو : إيه ده إزاي يامس يعني هو خرج والحجر موجود
أيوة ياأندرو لإن ربنا يقدر علي كل حاجة
إيريني: أمال إزاي ياأمنا المس قالت لنا إن حضرتك لما رحتي القبر لقيتييه مفتوح
ماهو بعد بابا يسوع ماقام من الأموات راح جه ملاك من الملايكة ودحرج الحجر وطبعا إنتوا عارفين إن الملاك قوي وربنا مديله قوة كبيرة
أندرو : طب وهو الملاك دحرج الحجر ليه ماكان خلاه مقفول أحسن
لا ياأندرو الملاك دحرج الحجر لإنه كان عاوز الناس كلها تشوف القبر وهو فاضي ويعرفوا إن بابا يسوع قام من الأموات
أندرو : آآآه طيب كمليلنا بقي القصة
أنا بقي ياولاد بعد ملقيت القبر فاضي فضلت أعيط جامد أوي لإني كان نفسي أشوف بابا يسوع وساعتها شفته في البستان
أندرو : أنا كدة إتلغبطت خالص هو حضرتك كنتي في البستان ولا في القبر
في الإتنين ياأندرو لإن القبر كان وسط بستان المهم إن انا كنت متلغبطة ف الأول ومعرفتش إنه هو لكن لما ندالي بإسمي عرفته علي طول وفرحت أوي ورحت بقي عرفت التلاميذ وكل الناس وهما كمان فرحوا أوي وإنتوا كمان ياولاد لازم تفرحوا لإن لما بابا يسوع قام من الأموات إدانا حياة جديدة
أندرو : بابا يسوع ده حلو أوي وأنا بحبه أوي أوي
طيب ياتري حفظت الجملة إللي أختك كانت بتحفظهالك
أندرو : آه حفظتها أولها حتي
إخرستوس آنيستي
آليثوس آنيستي
المسيح قام
بالحقيقة قام
لمشاهدة سكتش : حقا قام إتبع هذا الرابط
http://www.facebook.com/photo.php?fbid=486371881435209&set=pb.216139705125096.-2207520000.1367499312.&type=3&theater
ولمشاهدة برنامج حوار مع بطرس للقيامة إتبع هذا الرابط
http://www.facebook.com/photo.php?fbid=311662035572862&set=a.216150361790697.52609.216139705125096&type=1&theater
ولمشاهدة سكتش وجع أدوات الصلب إتبع هذا الرابط
http://www.facebook.com/photo.php?fbid=487239728015091&set=pb.216139705125096.-2207520000.1367499312.&type=3&theater

ميلاد نبيل
23/4/2013
@[216139705125096:274:أعمال أدبية ،،، تأليف \: ميلاد نبيل]

Fans of "The Cross"

Pin It

Leave a Reply

« »

Scroll to top