orsozox page goka

on February 6 | in OrSoFaCe | by | with No Comments

orsozox page
goka


Timeline Photos
قصة رقيقة جدااا من كاتبنا المميز مينا فايز

الفصل الرابع : جواب لحبيبتى اللى لسه محبتهاش

حبيبتى اللى لسه محبتهاش :

تحية طيبة وبعد

انا ببعتلك جواب دلوقت وانا قاعد قدام اللاب فى الاوضة لوحدى وبعد ما فكرت ووصلت لقرار انى مش هفضل قاعد لوحدى كدة كتير .. اتخيلتك وقررت اكتبلك جواب .. ودى اول مرة فى حياتى افكر انى اكتب جواب .. انا مش متأكد من هويتك وانتى مين وشكلك اية وقلبك عامل ازاى .. بس انا متأكد انك حبيبتى اللى لسه محبتهاش ووحشانى .. وانا دايما اتعودت لما احب اعمل حاجة اعملها حتى لو كانت فى نظر غيرى مجنونة لكن هتسعدنى لو عملتها .. حبيبتى اللى لسه محبتهاش وحشتينى .. حالة كدة

لو من اولها كدة ناوية تقولى مجنون .. معنديش اعتراض .. انا اصلا تقدرى تقولى مأجر ناصية كدة على اول سحابة على ايدك اليمين وانتى بتبصى من شباك اوضتك .. انا حالة مختلفة فى التعامل وليا نظرة تانية فى الحياة .. ودة هيخلى حياتك مختلفة من لحظة ما احبك .. متفكريش ان دة تشجيع او استدراج لكن انا بنبهك من اولها انك هتحبى واحد مجنون فعلا وانتى ونصيبك

صحيح بيقولوا عليا انى بكتب حلو اوى وبقول شعر بيعجب ناس كتير لكن مش معنى كدة انك مرتبطة باحمد بيه شوقى ومتحطيش فى دماغك ان كل مقابلة او كل مكالمة مطلوب منى اقولك ابيات شعر .. الفكرة فى ان الكلام يخرج من القلب .. وانا قلبى قادر يخليكى تحسى بنبض الحلم وبلون الورد وبدفا الشمس .. انا ممكن اقولك احلى كلام فى الدنيا بس لو محستوش يبقى زى الدهب الصينى .. انا قلبى اللى هيتكلم وبصراحة مش متأكد من موهبة الشعر فى قلبى زى اللى فى عقلى ولا لأ .. بس انا اللى متأكد منه ان قلبى مختلف .. انا قلبى طفل بيشوف الدنيا بسيطة وقت ما الكل بيعقد .. انا يوم ما وقعت وانا نازل من على السلم قولت الحمدلله وصلت بسرعة .. انا وقت ما الكل بيشوف الضلمة انا ببقى الواثق فى نور بكره اصل وقت ما الدنيا تغيم بشوف ورا السحاب نجوم مستنية وشمس بتضحك مستخبية .. انا قلب بيحب المغامرة ملوش فى الروتين وميعرفش يعنى اية عادى واكتر كلمة بضايقه هى " صنع فى الصين " .. انا قلبى طريقه الضحكة ولو فى يوم اضايقت او زعلت كأن الفرحة بتشحن فى اليوم دة وارجع اقوى من الاول .. انا عندى الحزن حادثة عابرة فى الطريق لكن طريقى هو الضحكة .. انا متأكد جدا ان لحظة ما قلبى يحبك مش هتفرق معاه الكرة الارضية باللى عليها لان بداية ونهاية الكرة الارضية بالنسبة ليا ساعتها هتبقى وانا بين ايديكى

احنا مش لازم نكون زى بعض فى الطباع ولا نكون بنسمع نفس المزيكا ولا تكون نوعية افلامنا واحدة .. هحاول اقبل فكرة انك ممكن تتطلعى زملكاوية مثلا وانا اهلاوى .. بس تشتمى فى ابو تريكة لأ .. معنديش مشكلة ان اسمع معاكى برامج الطبيخ .. لو دة هيحسن من مستواكى .. ومعنديش مشكلة اسمع كل برامج المراة والافلام الرومانسية .. هشاركك فى كل حاجة بتحبيها .. بس من اولها كدة ماتشات دورى ابطال اوروبا وماتشات المنتخب لو فى نفس التوقيت لازم اشوفها .. ومعنديش مشكلة انى اسمع المسلسلات التركية مع انى هحبك احسن من الدراما اللى فيهم بس حسك عينك تقوليلى انتا ليه مش وسيم زى مهند .. احنا رجالة بشنبات .. عموما الرجولة انى اخليكى تعملى الحاجة اللى انا عاوزها وانتى مبسوطة

برضة انا متأكد من ان فى حاجات مشتركة هتبقى ما بينا .. وبينى وبينك حاسس ان " الجنون " هيبقى من الحاجات دى ودى حاجة بسطانى انى الاقى حد عنده المركز دة فى دماغه .. بس من اهم الحاجات اللى لازم تجمعنا هى " ربنا " لانى مش متخيل اننا نبقى سوا بدون صاحب اعظم حب وبدون اللى خلق لينا القلوب اللى خلتنا نتلاقى ونحب بعض .. ومن الحاجات الاساسية هى الصراحة ومينفعش تخبى عليا اى حاجة وانا هبقى مبسوط وانا بسمعك .. ولو راجع من الشغل هلكان ومحتاج انام عاوزك تحكيلى تفاصيل تفاصيل يومك ومش هسرح لحظة .. بالنسبة ليا انى اسمع الشخص اللى بحبه زى اكل الشيكولاته بمزاج او اسمع موسيقى لعمرو خيرت بمنتهى الاستمتاع

مقدرش اقولك ان عينى مش هتبقى زايغة .. الحقيقة ان مافيش راجل فى الدنيا عينه مش زايغة .. ولو الوالد قالك انه معملهاش وبص لحد تانى فى حياته غير والدتك احب اقولك بابا كداب .. واخوكى كداب برضة لو حب يستعبط عليكى فى النقطة دى .. مش بقومك عليهم ابدا بس كل الرجالة عينيهم زايغة .. لكن الاهم عيون القلب .. والحقيقة ان عينينا بتزوغ اوقات عشان متبقوش تقال علينا .. يعنى تقدرى تقولى بنحب غيرتكم علينا .. هتبقى اجمل لحظة فى حياتى وانتى بتتحولى لريا وسكينة وبتقوليلى هقتلك لو بصيت هنا ولا هنا .. انا عاوزك برضة تبقى واثقة من نفسك لانك حلوة جدا فى عيونى
واسمحيلى اخليكى مغرورة واحطلك بنفسى الريشة فوق راسك .. انا عارف انك هتقولى برضة ساعات طب موافقة بس انا برضة عينى هتزوغ .. احب اقولك انى غيور جدا وصحيح جزء من الغيرة بيبقى سببه كبرياء فى الحب .. بس انا برضة هغير من خوفى عليكى .. عموما انا عارف انها هتفضل المشكلة ما بينا وانا مبسوط بدة لان الحب احساس غير ديمقراطى بالمرة .. بس انا مش قلقان لان الحياة السهلة مملة والحياة حلاوتها فى مشاكلها .. بس ياريت تراعى غيرتى وخوفى عليكى .. يا حبيبتى انتى لو حصل فى يوم اصلا بعد الشر رجلك اتكسرت انا قلبى هيبقى فى الجبس

بالنسبة للمشاكل بما اننا جبنا سيرتها .. انا معنديش مشكلة اننا نتخانق .. بس لو يوم عدى واحنا مش متصالحين تبقى كارثة .. ازاى اتنين يحبوا بعض يعدوا يوم وهما زعلانين فيه من بعض ! .. احنا مفروض بقينا شخص واحد ازاى فى شخص واحد تلاقى القلب متخانق مع العقل مثلا ومش ناويين يتعاملوا فيه مع بعض لمدة يوم يومين لغاية ما يصفوا ؟! كدة الشخص دة يموت وانا مش هسمح لحبنا للحظة انه يبقى مهدد بالنقطة دى .. انتى فى الاصل مخلوقة من حتة منى لكن حاليا انا كلى منك ومينفعش نبقى متفارقين واحنا فى بيت واحد .. ولو مش عارفة تصالحينى ازاى سيبى عليا البداية انا هقدر " انكوشك " ودة فعل حب مليان رخامة عشان اخرج منك ضحكة لان ضحكتك هى فرحتى .. بس عموما ممكن اغششك بداية للتصالح وتأكدى انا هضعف .. من اولها بفشى اسرارى .. اعملى نفسك عيانة .. يعنى تأكدى لو استهبلتى فيها وعملتى نفسك تعبانة فعلا هجى اقعد جنبك وامسك ايديكى وابوسها واقولك الف سلامة يا احلى حاجة حصلتلى مع انى هبقى واثق تماما من استهبالك بس اعمل اية .. بحبك .. اة انا موافق على عيشة توم وجيرى فى اجزاء فى اليوم بس معنديش مشكلة انى ادى فرصة لقيس وليلى انهم ياخدوا حقهم فى حياتنا برضة

انا من عيوبى انى رغاى اوى جايز تكونى لاحظتى دة من الجواب بس اعمل اية منتى وحشانى .. انا لولا ان بطارية اللاب قربت تفصل كنت كملت وقولت اكتر .. بس عشان لازم يبقى فى مفاجات لان كل اللى قولته اكيد مش بس طريقتى فى الحب .. وعشان الكلام مش هو الحب لكن الفعل هو الاهم .. انا هكتفى باللى قولتهولك واستمر فى حلمى بصوت الاغنية الهادية مع دايرة من الوشوش اللى بتضحك وانا وانتى فى النص بنرقص رقصة حبتنا

تصبحى على خير

ملحوظة :كتاب فايساويات اللى هتلاقوه فى معرض الكتاب
في/ الناشرين المصريين صالة 3 مكتبة أكتب
صالة ايطاليا .. مكتبة اديوجيت 8a
صالة 2 مكتبة الأدهم

http://www.facebook.com/pages/%D9%83%D8%AA%D8%A7%D8%A8-%D9%81%D8%A7%D9%8A%D8%B3%D8%A7%D9%88%D9%8A%D8%A7%D8%AA/147861712036097?fref=ts

dodo

orsozox page

Pin It

Leave a Reply

« »

Scroll to top