بمناسبة سبت ليعازر كلمات الشاعر رمزى بشاره ____________________ مكتفانى…

on April 27 | in ArT-FaCe | by | with No Comments

‫بمناسبة سبت ليعازر
كلمات الشاعر رمزى بشاره
____________________

مكتفانى خطيِّتى زى الكَفن
وِفـ قلب قَبر من الشُّرور قلبى إندَفَن
مِن بَرَّه شَكلى مِتبَيَّض ومَدهون ألف لون
مِن جُوَّه مليان بالعَفَن

فِينَك يا رَب
لو كنت ساكِن جُوَّه قلبى ماكانشى مات
ولاكانشى عُمرُه هَيِتمِلِى شَر وآفات
يا خسارة الوَقت إللى فات
وَأنا ماأعرَفَكش
ماباأكَلِّمَكش
مع إنى كنت باأملَى الدُّنيا كلام
أضحَك وعمرى ماحَسِّيت بالسَّلام
باأزرَع وأعمَر بس جُوَّايا خَراب
عَندى عُيون مابيملَاهاش إلا التُّراب
آه يارب … لو كُنت جُوَّه القَلب دَه مَوجود
لو كُنت لَمَّا نَدهتنى سِمعتَك
لو كُنت قَررت أشتريك مش بالرِّخيص بِعتَك
ماكنتش أبقى فـ نَعشى دَه مَمدُود
ولا كنت هاأبقى فَريسه للعَفن والدُّود
بس أعمِل إيه
أنا من غبائى وقَسوتى خَبَّطت بابى قُلتلك إمشى بدون مَطرود
يااااه
أنا مش مِصَدق … أنا إللى دايماً باأخدَعَك وأبعِد وأسيبَك
لِسَّه برده مَعتِبرنى إبنَك حَبيبَك
يااه إيه دَه إللى جوه عينك ؟ دُموع؟
لِسَّه فاتِح حُضنَك بتنادينى
لِسَّه برده فيه أمل فيه سِكَّه تانى للرُّجُوع
آدى الحَجَر إللى على قلبى آهوه مَرفوع
غَرَّق بِشَمسَك ضَلمِتى
أنا مش هاأعيش فى العَتمه بعد اليوم
أنا عايز أقوم من رَقدِتى
إندَه عليَّا وقُل لى قُوم … هاأقُوم

رمزى بشاره‬

taranemonline.com

Pin It

Leave a Reply

« »

Scroll to top