في قصة كنت قريتها زمــــــــان حابب أشارككم بيها ،،، القصة دي بتحكي عن واحد كان…

on April 22 | in ArT-FaCe | by | with No Comments

‫في قصة كنت قريتها زمــــــــان حابب أشارككم بيها ،،،
القصة دي بتحكي عن واحد كان بيحاول يتكلم مع ربنا و في يوم من الأيام طلب الراجل ده من ربنا بصوت واطي و قاله يا رب كلمني وقتها جه عصفور و زقزق حواليه بس هو ماسمعش حاجة !
بعده راح مزعق بصوت عالي و قاله يا رب كلمني هنا حصل صوت رعد ملا السما كلها بس نفس الحكاية هو ما انتبهش خالص ليه !
فضل يبص حوالين نفسه و اتكلم و قال يا رب طب خليني أشوفك بعينيا دي، ظهر لحظتها نجم بيلمع في السما بس هو للاسف ما شافش حاجة !
بعدها صرخ و قال يارب وريني حتي معجزة و لو صغيرة أشوفها، وشاف وقتها طفل بيتولد قدامه بس هو ما انتبهش اوي و مداش اي اهتمام!
بعدها فضل يبكي اوي اوي و هو يائس و قال يا رب طب عايزك تلمسني بس و تحسسني بوجودك و انك هنا معايا ،،،
وقتها مال ربنا و لمسه بس كل اللي حصل ان الراجل دا حرك ايده عشان يبعد فراشة كانت نزلت و وقفت عليها !! و قام و كمل مشي في طريقه ،،

كل اللي عايز اقوله ليكم من القصة دي ان ربنا موجود معانا دايما و حوالينا ..
موجود في الامور البسيطة و المألوفة لينا ..
ربنا لما بنناديه عمره ابدا ما بيتجاهلنا و بيجي بنفسه يرد علي ندانا بس احنا اللي مش بناخد بالنا و بنفوت الفرصة دي لمجرد انها جاية بطريقة مش متوقعة بالنسبة لينا ..
عارفين " اي اتنين اصحاب اوي من زمان و عارفين بعض كويس جدا " بيبقوا خلاص بيفهموا بعض من نظرة العين ممكن الواحد يفهم التاني عايز يقوله و يحكيله ايه بالاشارات بس، و حتي لو فضلوا ساكتين و ما اتكلموش بيكونوا برضو فاهمين بعض جدا .
يسوع عارفك و حافظك كويس و لو انت كمان عارفه كويس اوي و هو كمان صاحبك و حبيبك اكيد لما تكلمه هتفهم رده و تسمع همساته ليك و هتحس بلمسة ايديه و هتشوفه بقلبك و بــ أي طريقة ..
يسوع بيحبك جدا جدا اكتر ما انت متخيل و عمره ما هيسيبك ابدا لوحدك، مش هيهون عليه انه يشوفك زعلان، تعبان، خايف أو يائس
مش هتهون عليه دموعك ابدا ..
ما هو مش منطقي بالمرة ان اللي اتصلب و اتحمل العذابات و الأوجاع دي كلها و مات علشان " انت " تعيش يجي دلوقتي يسيبك لوحدك أو يقدر يشوفك بتتعذب في حياتك و ميقفش جنبك و يشيلك علي ضهره و يشفيك من كل وجع !!
يسوع اللي اتصلب زمان علشانك " انت " هو نفسه يسوع دلوقتي ما اتغيرش و استحالة يتغير عليك « يسوع المسيح هو هو أمساً واليوم وإلى الأبد » (عب 13: 18)
خليك كل لحظة مع يسوع و انت كلك ايمان ان مهما كانت الدنيا ضلمة و سودا في عينيك هو هيكون شايلك علي كفه و هيعدي بيك لبر الأمان
اطلب يسوع و نادي عليه و اتكلم معاه في كل وقت .. في ~ ضيقك ~ في ~ حزنك ~ في ~ خنقتك ~ في ~ يأسك ~ في ~ مرضك ~ في ~ وحدتك ~ و ماتبقاش تنساه برضو وقت ~ فرحك ~ و ~ نجاحك ~ !
خليك كلك ثقة و ايمان انك وقت احتياجك ليه لما تناديه حالاً هتلاقيه هتسمعه بيهمسلك " أنا معاك متخافش " و هتحس بلمسة ايديه و هي بتطبطب عليك :)
بس انت كون دايما معاه و متشيلوش من جوا قلبك و لا عينيك :)
Elmes Edena‬

Elmes Edena Band ♫♫ ♫♫ فريق إلمس إيدينا

Pin It

Leave a Reply

« »

Scroll to top