“ملقين كل همكم عليه لأنه هو يعتني بكم” ( 1بط7:5 ) كلمات قليلة و بسيطة لكنها مليا…

on April 19 | in ArT-FaCe | by | with No Comments

‫"ملقين كل همكم عليه لأنه هو يعتني بكم" ( 1بط7:5 )
كلمات قليلة و بسيطة لكنها مليانة محبة كبيرة و عظيمة جدا جدا ..
" ملقين كل همكم " قلقكم … ضيقاتكم … مشاغلكم " لانه هو يعتني بكم " بكل حب بيعتني بيك و بيا … بيعتني بكل أمور حياتنا و بكل شيء صغير جواها …
يسوع ابدا مش سايبني عشان هو حبني و ما زال بيحبني و حبه مالوش اي حدود .. من لحظة وجودي و الرب اعتني بيا و ما زال حتي لحظتنا و سيظل للنهاية لأن الرب أمين و وعوده صادقة دايما و للأبد .. حتي لو احنا ضعفنا و كنا غير أمناء معاه هو هيظل أمين لانه بيحبنا اكتر بكتير جدا من حبنا ليه …
كتير اوي بنطلب منه طلبات و لكنه بحكمته و حبه لينا و معرفته بالصالح لينا مش بيدينا اللي احنا عايزينه أو بنطلبه منه فنزعل و نضايق منه و نخاصمه و ندور وشنا بعيد عنه و ما نتكلمش معاه …
لكن هو مهما عملنا بيحبنا و هيفضل يحبنا … مهما كانت تصرفاتنا معاه هو برضو بيحبنا .. حتي في قسوتنا عليه بيحبنا .. في عنادنا بيحبنا .. في ضعفنا بيحبنا و بيستحمل و بيصبر و بيستني علينا لحد ما يجي اليوم اللي بنعرف فيه غلطنا و تيجي اللحظة اللي بتظهر لنا حكمته و محبته لينا فنفرح لانه ماسمعش كلامنا و لا طاوعنا حسب مشيئتنا و الغريب برضو اننا وقتها بننسي نشكره !!
صدقوني أكيد دي حاجة بتزعله مع انه مش مستني شكرنا لانه بيحبنا محبة بدون حدود بس أكيد هو بيفرح بيه و بيفرح انك علي الاقل انك فاكره و مش ناسيه أو متناسيه و متجاهله كالعادة !!
شكــــــرا يـــا رب جدا انك الهنا و أبونا الحبيب اللي مفيش أبدا زيك و اللي مهما قلنا فيك أو عملنا مش هنوفيك حقك و لا قدرك العظيم ابدا ايها العلي القدوس ..
محبتك بجد عجيبة يا يسوع حبيبي .. صدقني أنا بأشكرك من كل أعماق قلبي علي كل اللي عملته و بتعمله معايا و علي رعايتك ليا كل دقيقة في حياتي … بشكرك بجد علي محبتك العظيمة لينا اللي بتدينا كل حاجة و ما بتاخدش و لا أي حاجة !!
بجد فعلا يا شباب " ذوقوا و انظروا ما أطيب الرب " (مز 8:34 )

Elmes Edena‬

Elmes Edena Band ♫♫ ♫♫ فريق إلمس إيدينا

Pin It

Leave a Reply

« »

Scroll to top