مسرح عرائس عن الصوم

on April 8 | in ArT-FaCe | by | with No Comments

‫مسرح عرائس عن الصوم ‬


Timeline Photos
مسرح عرائس عن الصوم
تأليف : ميلاد نبيل

يصلح لحضانة وإبتدائي

بندقة : يابندق يابندق
بندق : بس بقي محدش له دعوي بيا سيبوني ف حالي
بندقة : يابندق خلاص بقي مش وقته نبقي نكمل كلامنا بعدين
الخادمة : ايه ياجماعة مالكم بس شكلكم كدة زعلانين من بعض
بندق : أيوة يامس أنا متضايق أوي من بندقة
الخادم : ليه كدة بس أكيد غنتي ضايقتيه يابندقه صح
بندقة : لا بأمانة يامس أنا مقصدتش أضايقه خالص
بندق : ياسلام طب أنا هحكيلك يامس وإنتي تحكمي
الخادمة : ماشي ياسي بندق إحكيلي
بندق : يرضيكي يامس الصبح أقوم م النوم وأغسل وشي وأعملي سندوتشين جبنة بالقوطة وأعصر لمون وف الاخر بندقة تاخد السندوتشات ومتخلنيش أكلها
الخادمة : طب ياتري يابندق هي كل السندوتشات بتاعتك دي
بندق : ياريتها كانت كلته يامس ع الاقل كنت حسيت اني عملت خير مثلا لكن هي مكلتهوش وقالت لي مينفعش تاكل جبنة انهاردة هي الجبنة بقت حرام يامس
الخادمة : لايابندق مش حرام بس انهاردة الجمعة صيام
بندق : صيام ؟ يعني ايه صيام اصلا
الخادمة : إيه ده انت متعرفش يعني ايه صيام يابندق ؟
بندقة : لا يامس ميعرفش ماهو انا قلت له المفروض نبقي صايمين فقالي لي يعني ايه وانا بصراحة معرفتش ارد عليه
الخادمة : طيب بص يابندق الصيام ده ياسيدي بيكون عبارة عن اننا بنمتنع يعني مبناكلش انواع معينة من الاكل اثناء الصوم زي يوم الاربع ويوم الجمعة
بندق : وعلي كدة بقي الجبنة بقي م الاكل اللي مش المفروض ناكله ده ؟
بندقة : ايوة يابندق اي اكل مش من الخضار يبقي مينفعش ناكله زي البيض واللحمة واللانشون واللبن كل الاكل ده بنسميه فطاري
بندق : ياسلام ياختي طيب ماانا كنت عامل الجبنة بقوطة والقوطة من الخضار
الخادمة : يابندق مينفعش ناكل حاجة فطاري ومعاها حاجة صيامي
بندق : طب لما كل الحاجات الحلوة دي مش هاكلها امال هاكل ايه بقي
بندقة : تاكل كل الخضار زي الفاصوليا واللوبيا والرز بس بالزيت طبعا وكمان الفول والطعمية والبتنجان
بندق : بس بس كفاية فول وطعمية وبتنجان ايه الاكل الصعب ده وليه اصلا احنا بنصوم
الخادمة : بص يابندق ربنا هو اللي طلب مننا اننا نصوم لاننا لما بنصوم وبنمنع نفسنا عن الاكل الحلو بنستفاد حاجات كتيرة زي اننا مثلا بنفتكر اخواتنا الفقرا اللي مش بياكلوا حاجات غالية ونصليلهم وزي اننا برده بنعود نفسنا ان مفي حاجة تتحكم فينا
بندقة : طب انا يامس عاوزة اعرف اشمعني بنصوم يوم الاربع والجمعة وايام تانية
الخادمة : شاطر يابندقة ده سؤال حلو بصي ياستي احنا بنصوم يوم الجمعة عشان ده اليوم اللي بابا يسوع اتصلب فيه فبنفتكر صلبه عشانان وبنصوم ونقول له يارب سامحنا علي خطايانا
بندق : ولازم نعمل ده كل جمعة يامس
الخادمة : اه يابندق بس مش طول السنة في فترة اسمها فترة الخماسين اللي هي بعد عيد القيامة دي مبنصومش فيها يوم الجمعة او الاربع
بندقة : طب وباقي الصيامات يامس يعني أنا عرفت إن في اليومين دول صوم إسمه صوم الميلاد بس مش عارفة ليه بنصومه
الخادمة : صح يابندقة فعلا احنا صايمين صيام الميلاد اليومين دول وهو مدته تلاتة واربعين يوم
بندق : ايهي امس تلاتة واربعين يوم ورا بعض يعني انا هقغد تلاتة واربعين يوم ماكلش جبنة بالقوطة
الخادمة : لايابندق انت عشان لسه صغير فممكن ابونا يديك حل انك تصوم جزء معين إنت اسال ابونا وهو عيعرفك
بندقة : طب هو ليه يامس الصيام ده تلاتة واربعين يوم
الخادمة : بصوا ياولاد هي المدة مقسومه نصين النص الاوللاني هما الاربعين يوم ودول زي اللي صامهم موسي النبي عشان يستقبل الوصايا العشر احنا برده بنصوم عشان نستقبل ربنا في عيد الميلاد والتلت ايام بيفكرونا بالتلت ايام اللي صامهم الشعب عشان جبل المقطم يتنقل
بندق : حلوة اوي المعلومات دي بس هو مين يامس اللي قال ان احنا نصوم
الخادمة : انت كدة مش مركز يابندق ماانا قلت لك ان ربنا هو اللي قالنا نصوم وفي كمان انبيا صاموا ف العهد القديم زي ماقلنا عن موسي النبي والتلت فتيه ده كمان بابا يسوع صام
بندقة : ازاي يامس انتي مش قلتيلنا اننا بنصوم عشان ربنا يغفرلنا خطيتنا طب هو ربنا بقي صام ليه وهو معندوش ولا خطية
الخادمة : شاطرة يابندقة يامركزة هو فعلا ربنا معملش خطية لكن هو صام عشان احنا نعمل زيه يعني احنا لما نشوف ربنا بنفسه صام نعمل زيه ونصوم زي برده ماهو راح اتعمد فاحنا برده عملنا زيه
بندق : احنا بنشكرك يامس ع المعلومات الحلوة دي وبدل مااحنا منقول قصة انتي قلتيلنا معلومات جميلة يالله كلكم سقفولنا قصدي سقفوا للمس وانا هستاذن بقي عشان اروح الحق عم سعيد بتاع الطعمية قبل ميقفل

,,, ميلاد نبيل
23/11/12 – طموه

Fans of "The Cross"

Pin It

Leave a Reply

« »

Scroll to top