قصيدة حالة عارضة رداً على هدم كنيسة صول بأطفيح ، وعلى أحد الشيوخ الذين أدعوا هد…

on April 6 | in ArT-FaCe | by | with No Comments

‫قصيدة

حالة عارضة
رداً على هدم كنيسة صول بأطفيح ، وعلى أحد الشيوخ الذين أدعوا
هدم الكنيسة حالة عارضة ولم تحدث من قبل
***********************
حياتك حالة عارضة ، موتك حالة عارضة, وجدت مغالطة
صوم وصلى ، صومك وصلاتك سكا ، عايزين زقا
أحنـا اللى نعرف ربنا وأنت زكـا
طالع شجرة وفى الكنيسة عاملين لكم فقرة الله محبة
يضربوك الله محبة يدبحوك الله محبة
وان حتمت خد عيالك وعزالك وأجرى استخبى
عيش فار ولو يوم دمك فار سيب البلد وهج واهرب وأنسى
وخدلك حقنة بينج ونام وأتغطى
وان قاتلوك نجيب ليك أبونا ونصليك مسح المرضى
نعمل تقرير أن أنت بخير وان اللي حصل ده
كان حالة عارضة
***************************

مدام بتصرخ لحد ما فاض وبلاش قانون مطاط
مع الأقباط وكانك با تصرخ في مالطة
و مدام عايشيين زى ميتيين وبالمحبة
ومن غير محبة واكلين الاونطة
يبقى لازماً وحتماً وضرورى حالة عارضة
كنيسة فى اطفيح تبقى كوم صفيح حالة عارضة
فتوة يطيح ويخلى دمك يسيح لازماً ترضى
وتسقف للحكومة المهمومة يكون بخناق يكون باتفاق
يكون نفاق المهم ما تكونش فى صف المعارضة
تمشى تاتاة تاتاة أصل الدولة فى مخططها الإبادة
وجريت العادة اللى يموت نعمله مدفنة نعملوا يفطة
هنا شهيد يوم العيد صلى بإخلاص فمن
بعيد لحقه الرصاص وملحقتوش النجدة
مات لا تعيط ولا تظيط اعمل عبيط اعمل عريضة
قول الموت فريضة وحط على طلباتك شرطة
ولا صراخ ولا زعاق فى لحظة فراق كل طلباتك
تحقق هالك الشرطة

لكن تظيط وتتنطط
وتتظاهر وتعيطو تعمل فرجة
تصرخ بهمك وتطالب بدمك دمك لو أتباع
مش ها يساوى ثمن الطلقة
لكن تعالى واعرض وقابل دمك تقبض
ديتك أيه قرشين فلسين غوشة فضة
أيه يعنى قتيل نعمل ميعاد واللى يرسى عليه المزاد
يشيل ومعاه الدليل ومعاه الحجة
أيه يعنى دمك حلال ما أنت أصلك خيال عايش بخناقة
وحللوا موتك بفتوة
خليه يعدى على راسك ويدوس ما كده كده
هانشوفك فى الفردوس
يبقى أية يعنى على راسك عدة ولا بدمك اتوضة
حالة عارضة
***********************
أحنا مش ها نفضل سميعة لازم نطبق الشريعة
نطبق الردة

آه نودك لكن تتنفس نقطع أيدك ورجلك
وكنيستك ما كنيستك تفضل ساكتة
انتهى عصر الطبطبة والرقة
ودي سماحة متناهية
واللي مش عاجبه يغور فى داهية
يشوف له سكة
فأوعى تكون عايز كنيسة وتصلى وتقعد تبنى وتعلى
وتبنى منارة تكون علو طيارة ليه هي سايبة ولا فوضى
أصل المسيحي عايش ساكن لكن مش
مواطن اهو قلة أصل قلة جودة
ومن الآخر أنت كافر وسافل ولازم تتربى
حالة عارضة
****************************
يمكن كافر بس بعافر ويوم ما سكت كانت اكبر غلطة
واللى زاد واللى غطى
يوم ما استنيت الدور وقررت أعيش جبان أموت مستور
علشان يرضى الأقوى

اللي قبض وفاكر بقى قيمة ده فى نظرنا
بهيمة رضي بالقهرة
محبتنا ان أحنا الأقوى وبنسامح رغم الذل الطافح
عارفين المحبة
المحبة من غير مقابل بس ما تبقاش أنت القاتل
وتطلب أنى احبك وأنى أودك وان اللى
عملته كان نزوة
ما تبصليش أنى ذمي حقير وأنت على وطنك بتغيير
وان المصلحة تعمل مشرحة وتموتنا
يا دقلديانوس فينك فينك ؟ كل الناس هنا عايزينك
افقع علينا المرارة وجبلنا جلطة
انت لسه عايش انت واقع مش مجرد ذكرى صورة خالدة
ايه يعنى اسمك بيتغير ولا صورتك بتتغير مالساه عذابك
سايب فينا صرخة وكرباجك سايب فينا جلدة
فما تقوليش حالة عارضة وان اللى حصل كان نسوة
خلاص فهمنا المحاضرة
يبقى أحنا زيك بس عندنا محبة فوق المودة
ولينا حقوق ولينا مواطنة

يعني احمد ذي جرجس وكاترين ذي فاطمة
ومحبتنا دي مش ضعف ولا خوف
ولا أحنا نستسلم تحت السيوف
ده لو سيوف الدنيا محاوطة
كنيستنا رغم العتمة عازمة
لا تعرف خوف ولا ضعف ولا حسرة
من نيرون لدقلديانوس واخدة يسوعها حارس
لا اشتكت يوم من العذاب ولا اشتكت يوم من المطاردة
كنيستنا رغم الهدم رغم الدم تاريخ كفاح تاريخ مناضلة
حالة عارضة

كيرلس جرجس سعد‬

أحباء الأنبا رافائيل Lovers of Bishop Raphael

Pin It

Leave a Reply

« »

Scroll to top