ميكي وميني في قطار الصوم المحطة الثالثة – محطة الإبن الضال سيناريو وحوار :…

on March 18 | in ArT-FaCe | by | with No Comments

‫ميكي وميني في قطار الصوم

المحطة الثالثة – محطة الإبن الضال

سيناريو وحوار : ميلاد نبيل

أعمال أدبية ،،، تأليف : ميلاد نبيل

"الفكرة ,, ميكي وميني موجودين داخل الخدمة طوال الصوم ممكن أن يكونا عرائس في مسرح عرائس أو ماسكات علي خشبة مسرح .. حسب إمكانيات الخدمة وسأقوم بكتابة حوار يعتبر تمهيد لكل درس وتقوم الخادمة او الخادم بمناقشة ميكي وميني إلي أن تبدأ هي بشرح القصة ,, يصلح لحضانة وإبتدائي"

الأحد الثالث – المحطة الثالثة – "التجـــربة "

"ميكي نائم وتقوم ميني بإيقاظه"

ميني : يابندق يابندق

" ميكي يخطرف بالكلام"

ميكي : ماليش دعوي أنا عاوز المصاصة

ميني : مصاصة ايه بس يا ميكي اصحي يابندق انت بتحلم بالمصاصة ولا إيه

" تفكر قليلا بندقة ثم تقوم برش بعض المياه علي وجهه فيقوم بفزعة "

ميكي : ايه ايه هي الدنيا بتمطر ولا إيه

ميني : معلش بقي يا ميكي اضطريت ارش عليك مية ساقعة عشان تصحي

ميكي : مية ساقعة وانا بقالي ساعتين عاوز اشرب وبتقوليلي مفيش مية وبعدين تصحيني ليه بس ده انا خلاص كنت هاكل المصاصة ف الحلم يادوبك كنت قطعت الورقة ولسه هحطها ف بقي رحتي مصحياني

ميني : ياسيدي نبقي نشتري واحدة المهم قوم بقي احنا خلاص وصلنا للمحطة التالتة

ميكي : المحطة التالتة اه صحح ده انا نسيت اننا راكبين قطر الصوم يااااه وصلنا بسرعة كدة

ميني : شوف بقي المحطة الاولي والتانية عدت بسرعة ازاي

ميكي : اه فعلا معاكي حق هو صحيح يابندقة المحطة اللي فاتت دي كان اسمها ايه

ميني : انت نسيت يا ميكي طب خلاص احنا نسال الأولاد الامامير دول هه ياولاد مين فيكم يعرف المحطة اللي فاتت واللي قبلها كان اسمهم ايه معلش اصل ميكي من كتر النوم نسي اسمها

" بعد ان تسمع الاجابة"

ميني : برافو برافو عليكي عرفت بقي يا ميكي

ميكي : طبعا انا اصلا كنت عارف بس يعني كنت بختبركم انتوا المهم بقي تعالي نجيب المصاصة من عند الراجل

ميني : طيب يالله بينا

ميكي : بقولك انا عاوز كمان اجيب لعبة هو في هنا حد بيبيع لعب

ميني : فيه بس انت معاك فلوس

ميكي : ايوة طبعا معايا يجي خمستاشر جنيه

ميني : طيب مادول قليلين يا ميكي انت كدة هتخلص كل فلوسك ع اللعبة

ميكي : طب وايه يعني

ميني : لا انت كدة هتعمل زي صاحب المحطة دي

ميكي : مين صاحب المحطة الكمساري ؟

ميني : كمساري ايه بس يا ميكي انا اقصد اللي علي اسمه المحطة انت متعرفش هو مين

ميكي : لا معرفش

ميني : ده اسمه الابن الضال او الابن الشاطر

بندق : ضاني ؟ ضاني ازاي انتي مش قلتي مفيش لحمة ف الصيام

ميني : لحمة ايه بس يابندق أنا بقول ضال يعني ضايع

ميكي : ااه هو كان تايه طب تعالي ندور عليه ونجيب ميكروفون ونقعد نقول عيل تايه ياولاد الحلال

ميني : يا ميكي استني بس ماهو خلاص رجع

ميكي : طب الحمد لله هو كان مخطوف بقي ولا ايه يابندقة تلاقي حد خطفه وطلب في فدية ولا حاجة ادي اللي خدناه من الثورة

ميني : لايا ميكي ده هو ضاع بمزاجه

ميكي : ضاع بمزاجه ؟؟ انا مش فاهم حاجة وبعدين انتي بتقولي انا هعمل زيه لا ياستي متقلقيش انا هجيب من الراجل القريب ده وارجع علي طول يعني مش هضيع

ميني : ايوة بس انت هتعمل زيه وتضيع فلوسك كلها وبعد كدة متلاقيش حاجة تاكلها

ميكي : ايه ده هو كمان ضيع فلوسه كلها

ميني : اه يا ميكي

ميكي : ده شكله مهمل خاااالص بس ازاي مهمل وازاي بتقولي عليه الابن الشاطر

ميني : ده هنعرفه بقي من المس

ميكي : طب وياتري كان بياكل ايه لما خلص فلوسه ده تلاقيه مكنش بيعرف اصلا يجيب حتي مصاصة

ميني : مصاصة ايه بس يا ميكي ده انا سمعت انه كان بياكل اكل وحش والمس بقي هتقولنا عليه

ميكي : طيب بالنسبة لي اناا دلوقتي يعني انا دلوقتي عاوز مصاصة

ميني : اقعد طيب كويس عشان نسمع القصة والمس هتديك حاجة حلووووووووة

ميكي : هيييييييييه خلاص انا هقعد كويس وانا كمان عاوز اعرف ايه حكاية الابن الضان ده ولا الشاطر هو اسمه ايه اصلا

ميني : الاتنين يا ميكي ضال وشاطر بس انا مش عارفة ليه احنا دلوقتي بقي هنعرف من المس

"يبدأ الخادم أو الخادمة بشرح الأحد الثالث من الصوم"

ميلاد نبيل

أعمال أدبية ،،، تأليف : ميلاد نبيل

26-2-2012

Fans of "The Cross"

Pin It

Leave a Reply

« »

Scroll to top