on March 18 | in ArT-FaCe | by | with No Comments



ميــــــكي وميـــــني في قطـــار الصـــــوم
الأحد الثاني – المحطة الثانية – التجـــربة

تأليف : ميلاد نبيل
@[216139705125096:274:أعمال أدبية ،،، تأليف \: ميلاد نبيل]
"ميني تسير وراء ميكي الذي يبدو عليه الضيق وتقول له "
ميني : يا ميكي يا ميكي هتلففني وراك كدة برده
ميكي : بس بقي انا زعلان منك ومخاصمك
ميني : خلاص بقي مش هزعلك تاني
ميكي : لا ياستي انتي كل مرة بتقولي كدة وبرده بتزعليني
ميني : طب خلاص خلاص خد طيب البسكوتة دي أنا هصالحك بيها
ميكي : إيه دي وريني كدة
"يقوم بأكلها ويقول وهو يأكل"
ميكي : إنتي عاوزة تضحكي عليا بالبسكوتة لا ياستي أنا مش عاوزها
"بعد ماياكلها يديها الكيس فاضي ويقول"
ميكي : خدي ياستي خدي أنا مش عاوزها
ميني : طب ماكنت تاكل الكيس بالمرة .. يا ميكي بقي متزعلش وبعدين ماهو اللي انت كنت عاوز تعمله ده كان غلط وكان لازم موافقكش عليه
ميكي : ايه يعني ضربت الكمسري وكنت عاوز أنزل من قطر الصوم قبل ميقف
ميني : غلط يا ميكي غلط ده انا لولا اني اتحايلت ع الكمساري مكنش هيرضي يركبنا قطر الصوم تاني
ميكي : طيب كنتي سبيني أنط من القطر وأعمل حتة أكشن كدة
ميني : أكشن إيه إنت فاكر نفسك ميكي السقا ؟؟ يابندق إنت كدة كان ممكن تتعور وتتكسر مية حتة وملاقيش حد أكمل معاه رحلة الصوم وإحنا لسه قدامنا خمس محطات
ميكي : وكمان مكنش همك اني اموت وهمك بس إنك تبقي لوحدك
ميني : يا ميكي انا بهزر معاك هو أنا ليا غيرك يابندق ياخويا
ميكي : طيب خلاص المحطة الجاية بقي ابقي سبيني براحتي وسبيني انط من قطر الصوم وهو بيقف انا نفسي اجرب الحركة دي انا اصلي شفتها ف فيلم قبل كدة وكانت حلوة أوي
ميني : ماهو ساعتها اللي عمل الحركة دي مات يا ميكي
ميكي : لا لا ده هو بس عملها غلط وبعدين ماهو ربنا هياخد باله مني مش المس قالت لنا ان في ملاك حارس بيمشي معانا هو بقي يبقي ياخد باله مني
ميني : غلط يا ميكي غلط انت كدة هتكون بتجرب ربنا
ميكي : بجرب ربنا ؟؟ يعني إيه بجرب ربنا إنتي بتقولي كلام كدة مش مفهوم أصلا
ميني : يعني يعني .. ماانا مش عارفة اصلا يعني ايه أنا كمان بس المس أكيد هتعرفنا انهاردة يعني ايه
ميكي : امال عمالة بقي تقوليلي ف كلام وعملالي فيها مس وده غلط وده صح وانتي اصلا مش عارفة حاجة وبعدين هي المس هتحكيلنا القصة دي ولا هتحكيلنا القصة بتاعة المحطة التانية متلخبطيش المس معاكي بقي
ميني : آآه معني كلامك كدة يا ميكي إنك ناسي إسم المحطة التانية
ميكي : انا ؟ هو انا بنسي برده لا فاكر بس " ويدور جوة لبسه" هو راح فين بس كنت حطه هنا
ميني : انت بتدور علي ايه يا ميكي هه بتدور علي إيه
ميكي : كان في ف جيبي قطر عليه صورة المحطة التانية دي انا اصلي بصراحة نسيت المعلومات كلها من كترها دخلت ف بعضها
ميني : ولا يهمك خلاص انا هفكرك وامري لله ولا اقولك لما نشوف كدة اصحابنا دول فاكرين ولا لأ .. هه حد فاكر
"تستمع للاجابة"
ميني : شطار شطار هه افتكرت يا ميكي
ميكي : ايوة ايوة افتكرت كل حاجة محطة التجربة أنا أصلا كنت حافظها حتي أنا عارف إيه اللي حصل فيها دي اللي ربنا جرب فيها ابونا ابراهيم صح عشان تعرفي بس اني عارف كل حاجة
ميني : غلط يا ميكي غلط مش دي
ميكي : ايه مش دي انتي بقي اللي شكلك مش عارفة حاجة انا واثق إنها هي دي انتي مش بتقولي اسمها التجربة يبقي هي دي
ميني : ياعم ميكي مش هي .. حد التجربة ده اللي اتجرب فيه اصلا هو ربنا
ميكي : نعم ؟ ربنا ؟؟ هو في حد اصلا ينفع يجرب ربنا
ميني : ايوة الشيطان جرب ربنا زي ماانت كنت عاوز تجربه وترمي نفسك من قطر الصوم
ميكي : يعني الشيطان برده رمي نفسه من القطر ايه ده هو كان راكب معانا ؟
ميني : لا يا ميكي ده الشيطان طلب من ربنا ان هو اللي يرمي نفسه بس بصراحة مش فاكرة منين
ميكي : انتي كل حاجة مش فاكراها كدة امال هنعرف الحكاية ازاي بس ولا إحنا نازلين المحطة دي ع الفاضي خلاص يالله نركب القطر بقي أناملي شوية
ميني : إستني بس يا ميكي ماهو إحنا جايين هنا عشان نسمع الحدوتة دي من المس وكمان هناخد حاجة حلوة
ميكي : هييييييييييه حاجة حلوة خلاص خلاص أنا هستني ومش هنام
ميني : جدع يا ميكي فاكر المرة اللي فاتت كنا قاعدين كويس والمس انبسطت مننا
ميكي : اه صح المس دي اللي حكيتلنا المرة اللي فاتت المحطة الأولي اللي هي بتاعة … بتاعة آآه بتاعة الكنوز صح
ميني : صح يا ميكي ماانت صاحي اهو
ميكي : لا انا عارف كل حاجة بس انا يعني مبحبش أحسسك إني أعرف أكتر منك يعني
ميني : ماشي ياسيدي ,, المهم يالله بقي نسمع قصة التجربة من المس عشان نلحق نركب القطر قبل مايتحرك عشان المحطة الجاية هنقابل واحد إسمه الإبن الضال
ميكي : طيب يالله بينا
"يبدأ الخادم أو الخادمة بشرح الأحد الثاني من الصوم"
لحجز القطار – 01282404987
01285514743
@[216139705125096:274:أعمال أدبية ،،، تأليف \: ميلاد نبيل]
@[184999651611589:274:Fans of "The Cross"]

Fans of "The Cross"

Pin It

Leave a Reply

« »

Scroll to top